اتىراۋدا اۆياتسيا سالاسىنىڭ ماماندارى ءامىر مەيرامعاليەۆ پەن نۇرسۇلتان تۇرسىنوۆ ونەركاسىپ پەن قاۋىپسىزدىك سالاسىنا ارنالعان ۇشقىشسىز ۇشۋ اپپاراتىن قۇراستىرىپ جاتىر. ماماندار ءبىر جىل بۇرىن باستالعان جوبانىڭ العاشقى ءپروتوتيپىن جاساۋعا 1270 ساعات ۋاقىتىن ارناعان, دەپ جازادى Egemen.kz.
ماماندار تەحنولوگيانى بەيبىت باعىتتا قولدانۋدى قولداپ وتىر. اتاپ ايتقاندا, دروندى مۇناي-گاز قۇبىرلارىن كۇزەتۋگە, قامىس ورتتەرىن ەرتە انىقتاۋعا جانە توتەنشە جاعداي كەزىندە ناقتى كوورديناتتاردى جەدەل جولداۋعا پايدالانۋ جوسپارلانعان. ەكولوگيالىق احۋالى كۇردەلى اتىراۋ ءوڭىرى ءۇشىن مۇنداي قۇرىلعىنىڭ ماڭىزى زور. سونىمەن قاتار ونى شالعاي مەكەنجايلارعا ءدارى-دارمەك جەتكىزۋگە بەيىمدەۋگە بولادى.
مۇناي-گاز سالاسىنداعى ىنتىماقتاستىق
العاشقى ۇلگى قولدانىستاعى مودەل نەگىزىندە پلاستيكتەن جاسالعان. الايدا ءوڭىردىڭ جەلدى كليماتىنا بايلانىستى ونىڭ بەرىكتىگى جەتكىلىكسىز بولعان. كەيىن قۇرىلعىنى شىنى تالشىق پەن پلاستيك قوسپاسىنان دايىنداۋ شەشىمى قابىلدانعان. ال قازىر ءۇشىنشى نۇسقاسى ازىرلەنىپ جاتىر. بۇل مودەلدە ۇشۋ اپپاراتى قاناتىنىڭ ۇزىندىعى 20 سانتيمەترگە ۇلعايتىلىپ, قۋاتتى اككۋمۋلياتور مەن موتور ورناتۋ جوسپارلانعان. ناتيجەسىندە ۇشۋ قاشىقتىعى ارتىپ, جۇمىس تيىمدىلىگى جاقسارادى.
رەسەيدەن قازاقستانعا وتەتىن گاز قۇبىرى قاشان ىسكە قوسىلادى؟
جوبا ازىرگە سىناق كەزەڭىندە. نۇرسۇلتان تۇرسىنوۆتىڭ ايتۋىنشا, قالادا 15-18 قاباتتى تۇرعىن ۇيلەر كوبەيىپ كەلەدى. مۇنداي بيىكتىككە ءورت ءسوندىرۋ تەحنيكاسىنىڭ جەتۋى كەي جاعدايدا قيىندىق تۋدىرادى. سوندىقتان ازىرلەنىپ جاتقان دروندى بيىك عيماراتتارداعى ءورتتى ءسوندىرۋ جۇمىستارىنا دا قولدانۋعا مۇمكىندىك بار. سونىمەن قاتار جوبا اۆتورلارى وندىرىستە وتاندىق ماتەريالداردى پايدالانۋعا نازار اۋدارىپ وتىر.