استانا قالاسىنداعى TargetAI IT-كومپانياسىنىڭ كەڭسەسىندە №49 مەكتەپ-گيمنازياسىنىڭ 7-سىنىپ وقۋشىسى ءادىلحان رۇستەم ۇلىمەن كەزدەسۋ ءوتتى. ءادىلحان مەكتەپتەردەگى توبەلەس جاعدايلارىن انىقتاۋعا ارنالعان قاۋىپسىزدىك جۇيەسىنىڭ كونتسەپتسياسىن ازىرلەگەن, دەپ حابارلايدى Egemen.kz.
TargetAI كومپانياسى وقۋشىنى تانىستىرۋ ەكسكۋرسياسىن وتكىزۋ, ازىرلەۋشىلەر كومانداسىمەن كاسىبي ديالوگ ورناتۋ, سونداي-اق ەلوردانىڭ ءبىلىم بەرۋ ۇيىمدارىندا قولدانىلىپ جۇرگەن جاساندى ينتەللەكت نەگىزىندەگى شەشىمدەردىڭ پراكتيكالىق مۇمكىندىكتەرىن كورسەتۋ ماقساتىندا ارنايى شاقىردى.
كەزدەسۋگە ءادىلحاننىڭ مەكتەپ جوباسىنىڭ جەتەكشىسى ايدوس بولاتبەك ۇلى, ينفورماتيكا ءپانىنىڭ مۇعالىمى بەكارىس باتىرحان ۇلى, TargetAI كومپانياسىنىڭ بيزنەستى دامىتۋ جونىندەگى ديرەكتورى زارينا جاحينا, سونداي-اق كومپانيا ازىرلەۋشىلەرى – شەرحان سىزدىقوۆ, نياز تولەۋوۆ جانە ءانۋار سۇلەيمەنوۆ قاتىستى.
ءادىلحاننىڭ جوباسى بۋللينگ پەن توبەلەس جاعدايلارىن ەرتە كەزەڭدە انىقتاۋعا جانە ولاردىڭ الدىن الۋعا باعىتتالعان. كەزدەسۋ بارىسىندا قاتىسۋشىلار جوبانىڭ تەحنيكالىق ىسكە اسىرىلۋىن, ەتيكالىق اسپەكتىلەردى جانە دەربەس دەرەكتەردى قورعاۋ ماسەلەلەرىن تالقىلادى.
ءىس-شارا اياسىندا زارينا جاحينا TargetAI كومپانياسىنىڭ فلاگماندىق ءونىمى – TargetEYE پلاتفورماسىنىڭ مۇمكىندىكتەرىن تانىستىردى. بۇگىنگى تاڭدا پلاتفورما استانا قالاسى اكىمدىگى مەن Astana Innovations قولداۋىمەن ىسكە اسىرىلىپ جاتقان «كەشەندى قاۋىپسىزدىك جۇيەسى» جوباسى شەڭبەرىندە استاناداعى 122 مەملەكەتتىك, 77 جەكەمەنشىك جانە 7 رەسپۋبليكالىق مەكتەپتىڭ بەينەباقىلاۋ جۇيەلەرىمەن ينتەگراتسيالانعان.
جاساندى ينتەللەكتىگە نەگىزدەلگەن اۆتوماتتاندىرىلعان مونيتورينگ مەكتەپتەردىڭ كىرەبەرىس ايماقتارى مەن پەريمەترىن باقىلاۋعا, سونداي-اق توبەلەس پەن بۋللينگتىڭ پايدا بولۋ جانە ۋشىعۋ تاۋەكەلدەرىن تومەندەتۋگە مۇمكىندىك بەرەدى. وقيعا انىقتالعان جاعدايدا TargetEYE جۇيەسى دابىل سيگنالى بار وقيعانى قالىپتاستىرىپ, ءتيىستى قىزمەتتەرگە جەدەل تۇردە حابارلاما جولدايدى.
2026 جىلعى اقپان ايىنداعى جاعداي بويىنشا TargetAI ەلىمىزدىڭ سەگىز قالاسى مەن وڭىرىندە بەينەاناليتيكا جوبالارىن جۇزەگە اسىرىپ وتىر. اتاپ ايتقاندا, الماتى, شىمكەنت قالالارىندا, ماڭعىستاۋ, اتىراۋ, پاۆلودار, جەتىسۋ, باتىس قازاقستان وبلىستارىندا جانە «بۋراباي» مەملەكەتتىك ۇلتتىق تابيعي پاركىندە بىرىڭعاي بەينەمونيتورينگ جۇيەسى, سونداي-اق استانا قالاسىنىڭ مەكتەپتەرىندە كەشەندى قاۋىپسىزدىك جۇيەسى ەنگىزىلگەن. TargetAI ەكوجۇيەسىنە قوسىلعان كامەرالاردىڭ جالپى سانى 120 000 قۇرىلعىدان اسادى. وسىلايشا, TargetAI پلاتفورماسى «زاڭ جانە ءتارتىپ» تۇجىرىمداماسىن ىسكە اسىرۋ اياسىندا ءىس جۇزىندە ۆەدومستۆوارالىق تسيفرلىق قۇرال رەتىندە قىزمەت اتقارىپ وتىر.
TargetAI كومپانياسى دارىندى مەكتەپ وقۋشىلارىن ەرتە كەزەڭدە قولداۋدىڭ جانە جاستاردىڭ قولدانبالى تەحنولوگيالىق قۇزىرەتتەرىن دامىتۋدىڭ ماڭىزدىلىعىن ەرەكشە اتاپ ءوتتى.
«بولاشاقتا ءبىز ادىلحانعا تاعىلىمدامادان ءوتۋ مۇمكىندىگىن, سونداي-اق ونىڭ جوباسىن ءارى قاراي دامىتۋ ءۇشىن ساراپتامالىق جانە ينفراقۇرىلىمدىق قولداۋ كورسەتۋگە دايىنبىز», دەدى TargetAI كومپانياسىنىڭ بيزنەستى دامىتۋ جونىندەگى ديرەكتورى زارينا جاحينا.