اتا-اناعا ءۇشىن بالانىڭ قاۋىپسىزدىگىنەن ماڭىزدى دۇنيە جوق. وسىنى بىلەتىن الاياقتار كەيىنگى كەزدە جاڭا قيتۇرقىلىققا كوشتى. بۇرىن بانك اتىنان حابارلاسىپ شاتاستىرسا, ەندى «اتا-انا باقىلاۋى» دەگەندى العا تارتىپ, مەكتەپ چاتتارىنا كىرىپ, ءتىپتى بالالارعا دا قوڭىراۋ شالاتىن بولعان.
اڭگىمە ادەتتەگىدەي باستالادى, بىراق تۇبىندە قالتا قاعىلادى, جەكە دەرەكتەر ۇرلانادى. قارجى نارىعىن دامىتۋ جانە رەتتەۋ اگەنتتىگى (قندرا) وسىلاي دەپ دابىل قاعىپ وتىر.
«الدىمەن الاياقتاردىڭ باستى امالىنا توقتالايىق. ولار WhatsApp نەمەسە SMS ارقىلى «مەكتەپتە مىندەتتى اتا-انا باقىلاۋى ەنگىزىلدى», «بالاڭىزدىڭ اككاۋنتىنا قاۋىپ ءتونىپ تۇر», «ىشكى ىستەر مينيسترلىگىنەن كەلگەن نۇسقاۋلىق» سەكىلدى حابارلامالار جىبەرەدى. ءبىر قاراساڭ, راس سەكىلدى. مازمۇنى دا رەسمي تىلگە ۇقسايدى. كەيدە ءتىپتى بالالارعا تىكەلەي حابارلاسىپ, وزدەرىن مۇعالىم رەتىندە تانىستىرىپ: «ەلەكتروندى كۇندەلىك جاڭارۋدا, SMS كودىن ايتا سال» دەيدى. كودتى ايتقان ساتتە-اق بالانىڭ اتا-اناسىنىڭ eGov-ى دا, بانك شوتى دا سول الاياقتىڭ قولىنا وتەدى», دەيدى قارجى نارىعىن رەتتەۋ جانە دامىتۋ اگەنتتىگىنىڭ الەۋمەتتىك جوبالار جانە قارجىلىق ساۋاتتىلىقتى ارتتىرۋ دەپارتامەنتى ديرەكتورىنىڭ ورىنباسارى مەنيسا حۋسنۋتدينوۆا.
الاياقتاردىڭ كەلەسى ءتاسىلى – بالانىڭ تەلەفونىن قورعاۋ كەرەك دەگەن جالعان قامقورلىق. ولار اتا-اناعا سىلتەمە جىبەرەدى دە «مىنا ءمودۋلدى ورناتساڭىز, بالاڭىزدىڭ قاۋىپسىزدىگى كۇشەيەدى» دەيدى. ال اتا-انا سىلتەمەگە باسقان كەزدە رەسمي دۇكەنگە ەمەس, جالعان سايتقا تاپ بولادى. سول جەردە جەكە دەرەكتەرىن ەنگىزىپ قويادى. كەيدە سىلتەمە زياندى باعدارلاما جۇكتەپ, تەلەفونعا كىرىپ الادى. سودان كەيىن بانك قوسىمشاسى, تولەم كارتاسى, ءتىپتى تسيفرلىق قۇجاتتىڭ بارلىعى الاياقتىڭ قولىنا وتەدى.
تاعى ءبىر ايلا – بالاسى ارقىلى قورقىتۋ. «بالاڭىزدىڭ تەلەفونىنا ۆيرۋس كىردى», «قاۋىپسىزدىك ءۇشىن شۇعىل جاڭارتۋ قاجەت» دەپ حابار جىبەرەدى. بالاسىنىڭ قاۋىپسىزدىگىنە الاڭداعان اتا-انا ويلانۋعا مۇرشاسى بولماي, بىردەن سىلتەمەگە وتەدى. سول ساتتە تەلەفون تولىقتاي الاياقتىڭ باقىلاۋىنا وتەدى.
ەڭ سوراقىسى – بالالاردىڭ اككاۋنتىن بۇزىپ الىپ, سىنىپتاستارىنا حابار جازاتىن الاياقتار. «اكەم اتا-انا باقىلاۋىن قوسىپ جاتىر, SMS كود كەرەك بولىپ تۇر» دەيدى. بالالار سەنگىش, كومەكتەسۋ ءۇشىن كود جىبەرەدى. ودان كەيىن ولاردىڭ اتا-اناسىنىڭ بانك شوتى دا, قۇپيا ءسوزى دە الاياققا وڭاي تۇسەدى.
«ەگەر بىرەۋ سىزدەن شۇعىل تۇردە كود سۇراسا, بەلگىسىز سىلتەمە جىبەرسە, ءتىپتى «بالانىڭ قاۋىپسىزدىگىنە بايلانىستى» دەپ ۇگىتتەسە دە, سەنبەڭىز. بۇل – الاياقتىق. ەشبىر مۇعالىم, ەشبىر مەملەكەتتىك ورگان اتا-انادان كارتا ءنومىرىن, SMS كودىن, لوگين-پارول سۇرامايدى. قورىقپاڭىز, اسىقپاڭىز, الدىمەن تەكسەرىپ الىڭىز», دەپ كەڭەس بەردى م.حۋسنۋتدينوۆا.