پرەمەر-مينيستر ولجاس بەكتەنوۆ پرەزيدەنت قاسىم-جومارت توقاەۆتىڭ ەلىمىزدىڭ ونەركاسىپتىك الەۋەتىن ارتتىرۋ جونىندەگى تاپسىرماسىن ورىنداۋ اياسىندا ارنايى ەكونوميكالىق جانە يندۋستريالىق ايماقتار ينفراقۇرىلىمىن دامىتۋ ماسەلەسى بويىنشا كەڭەس وتكىزدى. جيىنعا قارجى, ونەركاسىپ جانە قۇرىلىس مينيسترلەرى, «بايتەرەك» حولدينگى مەن ونەركاسىپتى دامىتۋ قورىنىڭ باسشىلىعى قاتىستى.
ونەركاسىپ جانە قۇرىلىس مينيسترلىگىنىڭ دەرەكتەرى بويىنشا ەلىمىزدە 17 ارنايى ەكونوميكالىق جانە 66 يندۋستريالىق ايماق جۇمىس ىستەيدى, وندا جەكە ينۆەستيتسيا كولەمى 5,7 ترلن تەڭگەدەن اساتىن جانە 57,2 مىڭنان استام جۇمىس ورنىن اشۋعا مۇمكىندىك بەرەتىن 860 جوبا جۇزەگە اسىرىلدى.
ونەركاسىپ الاڭدارىنىڭ ينۆەستيتسيالىق تارتىمدىلىعىن ايقىنداۋ كەزىندە ينفراقۇرىلىمنىڭ دايىندىعى ماڭىزدى ماسەلە بولىپ وتىرعانى اتاپ ءوتىلدى. وسىعان بايلانىستى قوسىمشا ينفراقۇرىلىمنىڭ, ونىڭ ىشىندە قوسالقى ستانسالار مەن كولىك جەلىلەرىنىڭ قۇرىلىسى بەلسەندى تۇردە جۇزەگە اسىرىلىپ كەلەدى.
ۇكىمەت رەسپۋبليكالىق بيۋدجەتكە تۇسەتىن جۇكتەمەنى ازايتۋ ءۇشىن حالىقارالىق قارجى ۇيىمدارىمەن ىنتىماقتاستىقتى قوسا العاندا, بيۋدجەتتەن تىس قاراجات تارتۋ بويىنشا شارالار قابىلداپ وتىر.
2030 جىلعا دەيىن ينفراقۇرىلىممەن قامتاماسىز ەتۋ ارقىلى اەا جانە يا اۋماقتارىندا شامامەن 200-دەن استام جاڭا جوبانى جۇزەگە اسىرۋ جوسپارلانعان, بۇل جاڭا جۇمىس ورىندارىن قۇرۋعا, وڭدەۋ ونەركاسىبىنىڭ ءوسۋىن قامتاماسىز ەتۋگە مۇمكىندىك بەرەدى. سونداي-اق وڭدەۋ ونەركاسىبىندە 2025–2029 جىلدار ارالىعىندا 140 جوبا پايدالانۋعا بەرىلمەك.
تۇتاستاي العاندا, وسى جوبالاردى جۇزەگە اسىرۋ وڭدەۋ سالاسىنىڭ جالپى قوسىلعان قۇنىن ۇلعايتۋ ارقىلى ەل ەكونوميكاسىنا ۇلەس قوسپاق.
پرەمەر-مينيستر ۇلتتىق ەكونوميكا, ونەركاسىپ جانە قۇرىلىس, قارجى مينيسترلىكتەرىنە كەلەسى جىلى 15 قاڭتارعا دەيىن «بايتەرەك» حولدينگىنە قارجىلاندىرۋ كوزدەرى بويىنشا تۇپكىلىكتى شەشىمدى بەرۋدى, اەا مەن يا-عا قاجەتتى ينفراقۇرىلىمدى جۇرگىزۋ جوبالارىن جۇزەگە اسىرۋعا دەرەۋ كىرىسۋدى تاپسىردى.