اقتاۋدا العاش رەت قايتىس بولعاننان كەيىنگى دونورلىق جاعداي تىركەلدى, دەپ حابارلايدى Egemen.kz وڭىرلىك قوعامدىق كوممۋنيكاتسيا ورتالىعىنا سىلتەمە جاساپ.
ماڭعىستاۋ وبلىستىق كوپبەيىندى اۋرۋحاناسىنىڭ ءباسپاسوز قىزمەتىنىڭ مالىمەتىنشە, وبلىستىق كوپبەيىندى اۋرۋحاناسىندا 45 جاستاعى ەر ادامنىڭ مي ءولىمى انىقتالدى. ماڭعىستاۋ وبلىسى بويىنشا ترانسپلانتاتسيا جونىندەگى وڭىرلىك ۇيلەستىرۋشى ينديرا امانقوسقىزى مەن ستاتسيونارلىق كوورديناتور ءىلياس يۋسۋپ ۇلى تۋىستارىنا قاجەتتى ءتۇسىندىرۋ جۇمىستارىن جۇرگىزدى.
جاقىندارى باتىلدىق تانىتىپ, دونورلىققا كەلىسىم بەرگەن سوڭ اۋرۋحانا بازاسىندا دەنساۋلىق ساقتاۋ مينيسترلىگىنىڭ ترانسپلانتاتتاۋدى جانە جوعارى تەحنولوگيالىق مەديتسينالىق قىزمەتتەردى ۇيلەستىرۋ جونىندەگى رەسپۋبليكالىق ورتالىعى ماماندارىمەن بىرلەسىپ جۇرەك الۋ وپەراتسياسى جاسالدى.
دونوردىڭ جۇرەگى ۇزاق ۋاقىت كۇتۋ پاراعىندا تۇرعان ناۋقاسقا ءساتتى ترانسپلانتاتسيالاندى. وپەراتسيانى دەنساۋلىق ساقتاۋ مينيسترلىگىنىڭ ترانسپلانتاتسيا ورتالىعىنىڭ ماماندارى ءساتتى جۇزەگە اسىردى.
- بۇل – ءوڭىرىمىز ءۇشىن ەرەكشە ماڭىزدى وقيعا. دونورلىق مي ءولىمىنىڭ رەسمي راستالۋىنان كەيىن بارلىق مەديتسينالىق راسىمدەر زاڭدى تۇردە ورىندالدى. ءبىز دونورلىققا شەشىم قابىلداعان وتباسىنا شىنايى قۇرمەت كورسەتەمىز جانە ادام ءومىرىن قۇتقارۋعا باعىتتالعان ىزگى قادامدارى ءۇشىن العىس ايتامىز, - دەدى ماڭعىستاۋ وبلىستىق كوپبەيىندى اۋرۋحاناسى ديرەكتورىنىڭ م.ا. بەرىك كاۋنوۆ.
مۇنداي جاعداي ماڭعىستاۋ وڭىرىندە العاش رەت تىركەلىپ وتىر. بۇعان دەيىن وبلىستا قايتىس بولعاننان كەيىنگى دونورلىق فاكتى كەزدەسپەگەن.
ماڭعىستاۋ وبلىسى بويىنشا ترانسپلانتاتسيا جونىندەگى وڭىرلىك ۇيلەستىرۋشى ينديرا امانقوسقىزىنىڭ ايتۋىنشا, قازىر جالپى كۇتۋ پاراعىندا 175 ماڭعىستاۋلىق بار. ونىڭ ىشىندە 165 ەرەسەك, 3 بالا - بۇيرەك, 4 ەرەسەك, 1 بالا – باۋىر, 2 ەرەسەك جۇرەك ترانسپلانتاتسياسىن كۇتۋدە.
الەمدىك تاجىريبەدە قايتىس بولعاننان كەيىنگى دونورلىق ادامگەرشىلىكتىڭ ەڭ جوعارى كورىنىسى سانالادى. ءبىر دونور التى ادامعا دەيىن ءومىر سىيلاي الادى.