وتاندىق ىرگەلى فيلوسوفيانىڭ اقتاڭگەرى

قانىش سات­باەۆتىڭ اكادەميالىق مەك­تەبىنەن شىققان عالىم جابايحان مۇباراك ۇلى ەلىمىزدە فيلو­سوفيا مەك­تەبىنىڭ نەگىزىن قالادى. س.م.كيروۆ اتىنداعى قازمۋ-دىڭ فيلوسوفيا-ەكو­نوميكا فاكۋلتەتىن بىتىرگەننەن كەيىن م.ۆ.لومو­نوسوۆ اتىنداعى ماسكەۋ مەمەلەكەتتىك ۋني­ۆەرسيتەتىنىڭ اسپيرانتۋراسىنا ءتۇسىپ, كانديداتتىعىن, دوكتورلىعىن قورعاپ, دۇنيە­جۇزى عالىمدارىنا عىلىمي نەگىزدەمەلەرىن مويىنداتقان ءىرى عالىم.

قازاق كسر عىلىم اكادەمياسى فيلو­سوفيا جانە قۇقىق  ينستيتۋتىندا ەڭبەك ەتىپ, دامىتىپ, ۇزاق جىل بويى باسشىلىق ەتىپ, كەيىننەن ۇلتتىق عىلىم اكا­دەمياسىنىڭ اكادەميك-حاتشىسى, قوعامدىق عىلىمدار جونىندەگى ۆيتسە-پرەزيدەنتى بولدى. وسى كەزەڭدە ول بىلىكتى باسشى بولىپ قانا قويعان جوق, اۋقىمدى ەڭبەكتەر جازدى, قازاق عىلىمىندا وزىندىك قول­تاڭباسىن قالدىردى. اكادەميك جابايحان مۇبا­راك ۇلى ءومىرىنىڭ سوڭعى جىلدارىنا دەيىن عىلىمنان قول ۇزگەن جوق. ل.ن.گۋميلەۆ اتىنداعى ەۋرازيا ۇلت­تىق ۋنيۆەرسيتەتىندە جۇ­مىس ىستەدى. بۇگىندە جابايحان ءابدىلدين قۇرعان فيلوسوفيا عىلىمي مەكتەبى الەم عالىمدارى مويىنداعان مەكتەپ رەتىندە جۇمىسىن جالعاستىرىپ كەلەدى. عالىم جاس ماماندارعا جانە ءوز وتباسىنىڭ ونەگەسى بولا ءبىلدى. قازاقتىڭ ماڭدايىنا بىتكەن مايتالمان, ابىز عالىم جاسىنىڭ ۇلكەندىگى, عىلىمداعى دۇنيەجۇزى مويىنداعان جە­تىستىكتەرىنە, اتاقتارىنا قاراماستان, قاراپايىمدىلىعىمەن ەرەك­شەلەنەتىن. بۇگىندە عالىم­نىڭ مەكتەبىنەن شىق­قان 100-دەن استام عىلىم دوكتورى فيلوسوفيا سالاسىندا كۇردەلى عىلىمي ماسە­لەلەر­مەن اينالىسىپ ءجۇر.

اكادەميك ج.ءابدىلديننىڭ عىلىمداعى كەشەندى ەڭبەك­تەرى باعالانىپ, مەملەكەتتىك ناگرادالارعا – «بارىس», «پاراسات», «قۇرمەت» وردەن­دەرى جانە حالىقارالىق دەڭگەيدەگى كوپتەگەن سىي­لىققا يە بولدى. اتاعى الەمگە ءماشھۇر بولعان عا­لىمنىڭ ارتىندا باعا جەتپەس قۇندى ەڭبەكتەرى قالدى. ونىڭ بارلىعىن شاكىرتتەرى ەلىمىزدىڭ يگىلىگى جولىندا قولدانىپ, اكادەميكتىڭ باستاعان ءىسىن جالعاستىرادى دەپ سەنەمىز. عالىمنىڭ اتى وشپەيدى. جاقىندارىنا قايعىرا كوڭىل ايتامىز. اللا الدىنان جارىلقاپ, جات­قان جەرى پەيىش بولسىن!

مۇرات جۇرىنوۆ,

ۇعا اكادەميگى