قاسىم-جومارت توقاەۆ پەن نيكول پاشينيان باق وكىلدەرىنە ارنالعان بريفينگ وتكىزدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
پرەزيدەنت ارمەنيانى ەلىمىزدىڭ ماڭىزدى ءارى سەنىمدى سەرىكتەسى رەتىندە اتادى. ەكىجاقتى قارىم-قاتىناس بەرىك دوستىققا جانە ءوزارا قۇرمەتكە نەگىزدەلگەن.
«قازاقستاننىڭ ارمەنيا مەملەكەتىنە جانە ونىڭ حالقىنا دەگەن ىقىلاسى ايرىقشا. ءبىز ارميان جۇرتىنىڭ تەرەڭ تاريحىنا, باي مادەنيەتى مەن سالت-داستۇرىنە زور قۇرمەتپەن, ىلتيپاتپەن قارايمىز. وسى قۇندىلىقتاردىڭ نەگىزىندە بارلىق باعىتتاعى ىقپالداستىعىمىز ۇدايى دامىپ كەلە جاتىر. ءبىز ءوزارا ءتيىمدى ىنتىماقتاستىقتى ودان ءارى نىعايتۋعا مۇددەلىمىز. مەنىڭ بىلتىر ارمەنياعا جاساعان رەسمي ساپارىمنىڭ قورىتىندىسى جانە بۇگىنگى كەلىسسوزدەردىڭ ناتيجەسى – سونىڭ ايقىن دالەلى. قازاق-ارميان قارىم-قاتىناسى ستراتەگيالىق سيپاتقا يە بولادى. سوعان سايكەس بىرلەسكەن مالىمدەمەگە قول قويدىق. بۇل شەشىم ەكى ەلدىڭ دوستىعىن بەكەمدەپ, سان سالالى جاڭا ىنتىماقتاستىق كەزەڭىنە جول اشارى انىق. وسى ورايدا, قۇرمەتتى نيكول ۆوۆاەۆيچ پاشينياننىڭ قازاقستان مەن ارمەنيانىڭ قارىم-قاتىناسىن نىعايتۋعا قوسقان ولشەۋسىز ۇلەسىن اتاپ وتكىم كەلەدى. نيكول ۆوۆاەۆيچ پاشينيان حالىقارالىق قاۋىمداستىققا كۇشتى باسشى, كورەگەن ساياساتكەر, كورنەكتى مەملەكەت قايراتكەرى رەتىندە كەڭىنەن تانىمال», دەدى مەملەكەت باسشىسى.
پرەزيدەنت بۇگىنگى مازمۇندى كەلىسسوزدەردىڭ ناتيجەسىن جوعارى باعالادى.
ء«بىز ساۋدا-ەكونوميكالىق جانە ينۆەستيتسيالىق ىقپالداستىقتى جانداندىرۋ ماسەلەسىنە باسا ءمان بەردىك. ءوزارا الىس-بەرىس كولەمىن ارتتىرۋعا, تاۋار ءتۇرىن كوبەيتۋگە قاتىستى ناقتى شارالاردى قولعا الۋعا كەلىستىك. ءوزارا ساۋدا اينالىمىن ۇلعايتۋ ءۇشىن قازاقستان ارميان نارىعىنا جالپى قۇنى 350 ميلليون دوللار بولاتىن تاۋار ۇسىنا الادى. سونداي-اق ءبىز ارمەنيانىڭ ەكسپورتتىق الەۋەتىن قولداۋعا نيەت بىلدىردىك. وعان قوسا, ينۆەستيتسيالىق جوبالاردى جۇزەگە اسىرۋدىڭ ماڭىزدىلىعىن اتاپ وتتىك. كاسىپكەرلەر اراسىنداعى بايلانىستى نىعايتاتىن ناقتى قادامداردى قولعا الۋعا كەلىستىك. جاڭادان قۇرىلعان قازاقستان – ارمەنيا ىسكەرلىك كەڭەسى ەكى ەل بيزنەس وكىلدەرىنىڭ باسىن قوسىپ, ەكى جاققا دا ءتيىمدى جوبالاردى جۇزەگە اسىرۋعا ءتيىس», دەدى پرەزيدەنت.