شىعىس قازاقستان وبلىسىندا «تازا وسكەمەن» كوممۋنالدىق كاسىپورنىنىڭ بۇرىنعى ديرەكتورى مەن ونىڭ سەرىكتەستەرى قالا كوشەلەرىن كۇتىپ ۇستاۋعا بولىنگەن بيۋدجەت قاراجاتىن جىمقىردى دەگەن كۇدىكپەن ۇستالدى. تەرگەۋ دەرەكتەرىنە سايكەس, مەملەكەتكە 120 ميلليون تەڭگەدەن استام زالال كەلتىرىلگەن, دەپ حابارلايدى Egemen.kz.
قارجىلىق مونيتورينگ اگەنتتىگىنىڭ شقو بويىنشا دەپارتامەنتى «تازا وسكەمەن» شارۋاشىلىق جۇرگىزۋ قۇقىعىنداعى كوممۋنالدىق مەملەكەتتىك كاسىپورنىنىڭ باسشىلىعىنا قاتىستى سوتقا دەيىنگى تەرگەپ-تەكسەرۋدى جۇرگىزىپ جاتىر.
كۇدىكتىلەر قاتارىندا كاسىپورىننىڭ بۇرىنعى ديرەكتورى, ونىڭ ورىنباسارى جانە جەكە كاسىپكەر بار. تەرگەۋ نۇسقاسى بويىنشا, ولار وزدەرىنىڭ لاۋازىمدىق وكىلەتتىكتەرىن پايدالانىپ, مەملەكەتتىك ساتىپ الۋ راسىمدەرىن وتكىزبەستەن جانە بيۋدجەت قاراجاتىن وزدەرىمەن بايلانىسى بار كوممەرتسيالىق ۇيىمداردىڭ ەسەپشوتتارىنا زاڭسىز اۋدارىپ وتىرعان.
«قىلمىستىق سحەمانىڭ ءمانى – ماتەريالداردى جەتكىزۋ جانە تەحنيكانى جالعا الۋ بويىنشا جالعان قۇجاتتار راسىمدەۋدە بولعان. اتاپ ايتقاندا, قۇجاتتاردا جولداردى جوندەۋگە ارنالعان بيتۋم مەن قۇم ساتىپ الۋ, سۋدى سورۋعا ارنالعان ارنايى تەحنيكا جالداۋ, سونداي-اق بۇعان دەيىن ورناتىلعان 23 ايالداما پاۆيلونىن جاساۋعا قاجەتتى ماتەريالدار ساتىپ الۋ تۋرالى جالعان دەرەكتەر كورسەتىلگەن. كەيىن بۇل قاراجات جەكە كاسىپكەر ارقىلى قولما-قول اقشاعا اينالدىرىلىپ, سحەماعا قاتىسۋشىلار اراسىندا بولىنگەن», دەلىنگەن حابارلامادا.
تەرگەۋ ماتەريالدارىنا سايكەس, كەلتىرىلگەن جالپى زالال كولەمى 120 ميلليون تەڭگەدەن اسىپ كەتكەن.
كۇدىكتىلەر ۇرلانعان قارجىعا وسكەمەن قالاسىنداعى ەليتالىق تۇرعىن ءۇي كەشەنىنەن پاتەر, BMW X6M جانە Subaru Forester ماركالى اۆتوكولىكتەرىن, سونداي-اق بىرنەشە جەر ۋچاسكەسىن ساتىپ العان. قازىرگى ۋاقىتتا بۇل م ۇلىككە سوت سانكتسياسىمەن تىيىم سالىندى.
كاسىپورىننىڭ بۇرىنعى ديرەكتورىنا قاتىستى بۇلتارتپاۋ شاراسى رەتىندە ەكى اي مەرزىمگە قاماۋعا الۋ تۇرىندەگى شەشىم قابىلداندى.
قارجىلىق مونيتورينگ اگەنتتىگى تەرگەۋ جالعاسىپ جاتقانىن حابارلادى. قر قىلمىستىق-پروتسەسسۋالدىق كودەكسىنىڭ 201-بابىنا سايكەس, وزگە اقپارات تەرگەۋ مۇددەسىنە بايلانىستى جاريا ەتىلمەيدى.