تمد مەملەكەتتەرى باسشىلارى كەڭەسىنىڭ وتىرىسىنداعى سويلەگەن سوزىندە پرەزيدەنت تمد-نىڭ گۋمانيتارلىق ىنتىماقتاستىق جونىندەگى مەملەكەتارالىق قورى بازاسىندا كرەاتيۆتى يندۋستريا قاۋىمداستىعىن قۇرۋدى ۇسىندى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
قاسىم-جومارت توقاەۆ مادەني-گۋمانيتارلىق قاتىناستار ەلدەرىمىزدى بىرىكتىرەتىن نەگىزگى فاكتور ەكەنىنە نازار اۋداردى. پرەزيدەنت ءداستۇر مەن يننوۆاتسيانى, تاريحي مۇرا مەن زاماناۋي تەحنولوگيانى ساباقتاستىراتىن كرەاتيۆتى يندۋستريانى دامىتۋدىڭ بولاشاعى زور دەپ ەسەپتەيدى.
«قازاقستان وسى سالانى دامىتۋ باعىتىندا جۇمىس اتقارىپ جاتىر. بۇگىندە كرەاتيۆتى سەكتورىمىزداعى قوسىلعان قۇن 2 ميلليارد دوللاردان اسادى. بۇل يندۋستريادا 143 مىڭ ادام جۇمىس ىستەيدى. كرەاتيۆتى يندۋستريا ەكونوميكامىزعا وڭ ىقپال ەتۋدە. ەڭ ماڭىزدىسى, ول مادەني ديپلوماتيانىڭ, ەلدەرىمىز اراسىنداعى دوستىق پەن تاتۋ كورشىلىكتى نىعايتۋدىڭ ءتيىمدى تەتىگىنە اينالدى. تمد ەلدەرىنىڭ بۇل باعىتتاعى الەۋەتى زور. تمد-نىڭ گۋمانيتارلىق ىنتىماقتاستىق جونىندەگى مەملەكەتارالىق قورى بازاسىندا كرەاتيۆتى يندۋستريا قاۋىمداستىعىن قۇرۋدى ۇسىنامىن. ونىڭ باستى ماقساتى جاس تالانتتاردى قولداۋ, بىرلەسكەن جوبالاردى ىسكە اسىرۋ, كرەاتيۆتى ەكونوميكانىڭ ەكوجۇيەسىن قالىپتاستىرۋ بولۋى قاجەت», دەدى مەملەكەت باسشىسى.
قاسىم-جومارت توقاەۆ: «ماقساتىمىز ورتاق – دوستاستىقتى جاسامپازدىق پەن ورلەۋدىڭ, جاڭا يدەيالار مەن مۇمكىندىكتەردىڭ كەڭىستىگىنە اينالدىرۋ»
پرەزيدەنت تمد-نىڭ الەمدىك ارەناداعى ابىروي-بەدەلىن نىعايتۋدىڭ ماڭىزىنا توقتالدى. قاسىم-جومارت توقاەۆتىڭ ايتۋىنشا, قازاقستان دوستاستىقتىڭ حالىقارالىق بايلانىستارىن جانداندىرۋدى دايەكتى تۇردە قولدايدى.
«ەستەرىڭىزدە بولسا, 2023 جىلى قازاقستان رەسپۋبليكاسىنىڭ ۇسىنىسى بويىنشا تمد-نىڭ بايقاۋشىلارى مەن سەرىكتەسى ينستيتۋتى بەكىتىلدى. بۇل باستامانىڭ العاشقى ناتيجەلەرى بايقالا باستاعانىن ريزاشىلىقپەن اتاپ وتكىم كەلەدى. بۇگىن شانحاي ىنتىماقتاستىق ۇيىمىنا بايقاۋشى مارتەبەسىن بەرۋ تۋرالى شەشىم قابىلدايمىز. بۇل وقيعا ەۋرازيانىڭ ايماقتىق قۇرىلىمدار ىقپالداستىعى تاريحىنىڭ جاڭا پاراعىن اشادى. بۇدان بولەك, ماسكەۋدەگى سامميتتە قازاقستان ۇسىنعان «تمد پليۋس» فورماتىندا قارىم-قاتىناس ورناتۋدى قولدايمىز. اتالعان قادام تمد-نىڭ حالىقارالىق ارەناداعى ءرولىن نىعايتا تۇسەدى», دەدى مەملەكەت باسشىسى.
ءسوز سوڭىندا قاسىم-جومارت توقاەۆ كەڭەستىڭ كەلەسى جىلى ۇيىمعا تۇرىكمەنستاننىڭ توراعالىق ەتۋ جونىندەگى شەشىمىنە قولداۋ ءبىلدىردى.
«تۇرىكمەنستان پرەزيدەنتى سەردار گۋربانگۋلىەۆيچ بەردىمۇحامەدوۆتى وسى ماڭىزدى ءارى قۇرمەتتى ميسسيانى قولعا الۋىمەن قۇتتىقتايمىن. ماقساتىمىز ورتاق – دوستاستىقتى جاسامپازدىق پەن ورلەۋدىڭ, جاڭا يدەيالار مەن مۇمكىندىكتەردىڭ كەڭىستىگىنە اينالدىرۋ. بىرلەسكەن كۇش-جىگەر ارقىلى تمد-نى قارقىندى, ءتيىمدى ءارى بولاشاققا نىق قادام باسقان حالىقارالىق ۇيىم رەتىندە نىعايتا الاتىنىمىزعا سەنىمدىمىن», دەدى مەملەكەت باسشىسى.
وتىرىستا تاجىكستان پرەزيدەنتى ەمومالي راحمون, ازەربايجان پرەزيدەنتى يلحام اليەۆ, ارمەنيا پرەمەر-ءمينيسترى نيكول پاشينيان, بەلارۋس پرەزيدەنتى الەكساندر لۋكاشەنكو, قىرعىزستان پرەزيدەنتى سادىر جاپاروۆ, رەسەي پرەزيدەنتى ۆلاديمير پۋتين, تۇرىكمەنستان پرەزيدەنتى سەردار بەردىمۇحامەدوۆ, وزبەكستان پرەزيدەنتى شاۆكات ميرزيوەۆ, تمد باس حاتشىسى سەرگەي لەبەدەۆ ءسوز سويلەدى.