دانيانىڭ ءبىلىم جۇيەسىندە ەرەكشە ءبىر ساباق بار. ول – «Klassens tid», قازاقشالاساق, «سىنىپ ساعاتى». بۇل ءداستۇر 1993 جىلدان بەرى ۇزىلمەي كەلەدى. اپتاسىنا ءبىر رەت 6 جاستان 16 جاسقا دەيىنگى بالالار سىنىبىندا باس قوسىپ, ءبىر-بىرىمەن ەركىن اڭگىمەلەسەدى.
بۇل ۋاقىت ولاردىڭ جۇرەكتەگى مۇڭدى, قۋانىشتى, ويدى بولىسۋگە ارنالعان. ءبىر وقۋشى ۇيدەگى قيىندىقتارىن جاسىرماي ايتادى, بىرەۋى دوستارىمەن رەنجىسكەنىن جەتكىزەدى, ال ەندى بىرەۋى كىشكەنتاي جەتىستىگىمەن قۋانتادى. ال مۇعالىم بۇل جەردە تورەلىك ايتۋشى ەمەس, تىڭداۋشى, باعىت بەرۋشى. بالالارعا ءبىر-ءبىرىن ءتۇسىنۋ, جاناشىرلىق تانىتۋ, قولداۋ كورسەتۋ ۇيرەتىلەدى. كەيدە ولار وسى اڭگىمەنى وزدەرى پىسىرگەن تورتتارىن جەپ وتىرىپ جالعاستىرادى. بۇل داتتارعا ءتان «hygge» – قاراپايىم جىلىلىق پەن جانعا جايلىلىقتىڭ بەلگىسى.
ەڭ قىزىعى, دانيا زاڭدارىندا «ەمپاتيا» جەكە ءپان رەتىندە كورسەتىلمەگەنىمەن, ول بالاباقشادان باستاپ بارلىق ءبىلىم جۇيەسىنە ەنگەن. ارنايى «Step by Step», «CAT-kit» باعدارلامالارى ارقىلى بالالار ەموتسيانى تانۋدى, سەزىمدى جەتكىزۋدى, جۇزدەگى وزگەرىستەردى اڭعارا ءبىلۋدى ۇيرەنەدى.سوندىقتان ءار بالا ءوز سەزىمىن ءتۇسىنىپ قانا قويماي, وزگەلەردىڭ دە جاعدايىنا ۇڭىلە الاتىن تۇلعا بولىپ قالىپتاسادى. دانياداعى ءبىلىم بەرۋدىڭ باستى ماقساتى – بالانى تەك اقىلدى ەمەس, جاقسى ادام ەتىپ تاربيەلەۋ.
دانيا قوعامىندا ەمپاتيا تەك مەكتەپپەن شەكتەلمەيدى. ول ادامداردىڭ كۇندەلىكتى قارىم-قاتىناسىندا, ەڭبەك ورنىندا, وتباسىندا دا كورىنىس تابادى. سول سەبەپتى دە بۇل ەل الەمدىك رەيتينگتە ۇنەمى «ەڭ باقىتتى مەملەكەتتەردىڭ» قاتارىندا جۇرەدى. ساراپشىلاردىڭ ايتۋىنشا, باقىتتىڭ سىرى – ءبىر-ءبىرىن تىڭداي بىلەتىن, تۇسىنۋگە دايىن قوعام قۇرۋدا. ءبىر-ءبىرىنىڭ قۋانىشىن قىزعانبايتىن, قايعىسىن بولىسە بىلەتىن ادامداردان سەنىمگە تولى ورتا قالىپتاسادى.