رەسەيدىڭ حانتى-مانسيسك قالاسىندا 29 ماۋسىمدا باستالىپ, بۇگىن مارەسىنە جەتكەن حالىقارالىق عىلىمي فيزيكا وليمپياداسىندا (ISPhO-2025) ەلىمىزدىڭ وقۋشىلارى جالپىكوماندالىق ەسەپتە 1-ورىندى جەڭىپ الدى, قورجىندا 4 كۇمىس, 1 قولا مەدال بار, دەپ جازادى Egemen.kz.
21 ەلدىڭ وقۋشىلارى قاتىسقان ءبىلىم بايگەسى ەكى نەگىزگى كەزەڭنەن تۇردى: تەوريالىق جانە ەكسپەريمەنتتىك. ءار قاتىسۋشى جەكە ەسەپتە ەكى باعىت بويىنشا باعالانىپ, 5 وقۋشى ەلگە 10 ماراپاتپەن ورالدى.
وقۋ-اعارتۋ مينيسترلىگىنىڭ حابارلاۋىنشا, كۇمىس مەدال يەگەرلەرى: رومان چەرەمنوۆ – الماتى قالاسى «ميراس» مەكتەبىنىڭ 11-سىنىپ وقۋشىسى; تاير ابدىقادىر – قوستاناي وبلىستىق ء«بىلىم-يننوۆاتسيا» ليتسەيىنىڭ 10-سىنىپ وقۋشىسى; التاير اكانوۆ – استانا قالاسىنداعى رفمم-ءنىڭ 11-سىنىپ وقۋشىسى; يلياس قازىمبەك – الماتى قالاسىنداعى رفمم-ءنىڭ 10-سىنىپ وقۋشىسى. ال قولا مەدال يەگەرى: دانيەل تيۋليۋباەۆ – استانا قالاسى «NURORDA» مەكتەپ-ليتسەينىڭ 11 سىنىپ وقۋشىسى.
سونداي-اق, تەوريالىق اينالىم ناتيجەلەرى بويىنشا رومان چەرەمنوۆ, يلياس قازىمبەك 1-دارەجەلى ديپلومعا, دانيەل تيۋليۋباەۆ, تاير ابدىقادىر, التاير اكانوۆ 2-دارەجەلى ديپلومعا يە بولدى.