اقمولا وبلىسىنىڭ تايتوبە اۋىلىندا حالىق قاھارمانى, ەكىنشى دۇنيەجۇزىلىك سوعىسىنىڭ باتىرى راقىمجان قوشقارباەۆتىڭ ەرلىگىنە ارنالعان گۇل شوقتارىن قويۋ ءراسىمى ءوتتى. 1945 جىلدىڭ 30 ساۋىرىندە راقىمجان قوشقارباەۆ سۇراپىل شايقاس كەزىندە رەيحستاگ عيماراتىنا العاشقىلاردىڭ ءبىرى بولىپ جەڭىس تۋىن تىككەنى تاريحتان ءمالىم, دەپ جازادى Egemen.kz.
شاراعا قورعانىس مينيسترلىگىنىڭ, قوسشى قالالىق ىشكى ساياسات ءبولىمىنىڭ وكىلدەرى, ەڭبەك جانە سوعىس ارداگەرلەرى, سونداي-اق مەكتەپ وقۋشىلارى قاتىستى. ايرىقشا ساتتەردىڭ ءبىرى – 102 جاستاعى ەكىنشى دۇنيەجۇزىلىك سوعىسىنىڭ ارداگەرى, 102 جاستاعى نۇرقاسىم اجىتاەۆتىڭ قاتىسۋى بولدى. بۇل ۇرپاقتار ساباقتاستىعى مەن مايدانگەرلەر ەرلىگىنە دەگەن قۇرمەتتىڭ جارقىن كورىنىسى رەتىندە باعالاندى.
«ابىروي مەن مىندەتتى, پارىز بەن اسكەري انتتى, ادىلدىكتى مانساپتان بيىك قويعان تۇلعالارمەن قاتار تۇرۋ – ءبىز ءۇشىن ۇلكەن مارتەبە. جەرلەسىمىز راقىمجان قوشقارباەۆتىڭ ونەگەلى ءومىرى مەن مايدانداعى ەرلىگى جاستارعا ۇلگى», دەدى تاربيە جانە يدەولوگيالىق جۇمىس دەپارتامەنتىنىڭ ارداگەرلەرمەن جۇمىس باسقارماسىنىڭ باستىعى, پولكوۆنيك قايرات ىدىرىشەۆ.
قاراعاندىلىق مايدانگەرگە قورعانىس ءمينيسترىنىڭ قۇتتىقتاۋ حاتى تابىستالدى
قورعانىس مينيسترلىگىنىڭ مالىمەتىنشە, ءىس-شارا بارىسىندا قاتىسۋشىلار باتىردىڭ رۋحىنا ءبىر مينۋت ۇنسىزدىكپەن تاعزىم ەتتى. ارداگەرلەر جاس بۋىنعا باتاسىن بەرىپ, ەلدىك پەن ەرلىك تۋرالى وسيەت ايتتى. مەكتەپ وقۋشىلارى پاتريوتتىق رۋحتاعى ولەڭدەر وقىپ, سوعىس تاقىرىبىنداعى شىعارمالاردى ورىندادى.
سونىمەن قاتار, ەلورداداعى راقىمجان قوشقارباەۆ ەسكەرتكىشىنەن تايتوبە اۋىلىنا دەيىنگى 30 شاقىرىمدىق ۆەلوشەرۋ ۇيىمداستىرىلدى. ءتورت ارداگەر ۆەلوشاباندوز بۇل باستامانى باتىردىڭ ەرلىگىنە ارنادى.
بۇدان ەكى جىل بۇرىن اشىلعان ەسكەرتكىش بۇگىندە اسكەري-پاتريوتتىق شارالاردىڭ نەگىزگى ورتالىعىنا اينالعان. تاعىلىمدى ءىس-شارا راقىمجان قوشقارباەۆتىڭ ەرلىگى ۇرپاق جادىندا ماڭگى ساقتالاتىنىن تاعى ءبىر مارتە ايعاقتادى.
الماتى وبلىسىندا 73 مايدانگەردىڭ ەسىمى كوشەلەرگە بەرىلگەن