اپتاپ ىستىق, نوسەر, بۇرشاق: مامىر ايىندا اۋا رايى قۇبىلمالى بولادى

«قازگيدرومەت» سينوپتيكتەرى قازاقستان بويىنشا مامىر ايىنا ارنالعان كەڭەس سيپاتىنداعى اۋا رايى بولجامىن جاريالادى. وعان سايكەس, ەل اۋماعىنىڭ كوپ بولىگىندە جىلى اۋا رايى ساقتالىپ, جاۋىن-شاشىن مولشەرى قالىپتى دەڭگەيدە بولادى.

ايدىڭ باسىندا ەلدىڭ باسىم بولىگىندە اۋا رايى تۇراقسىز سيپات الادى – جاڭبىر جاۋىپ, كەي جەرلەردە نوسەر, نايزاعاي, بۇرشاق كۇتىلەدى, جەل ەكپىنى كۇشەيىپ, داۋىلعا ۇلاسۋى ىقتيمال. مامىردىڭ العاشقى ونكۇندىگىندە (1-10 مامىر) باتىس, سولتۇستىك جانە شىعىس وڭىرلەردە ۇسىك ءجۇرۋى مۇمكىن.

العاشقى ون كۇندە اۋا تەمپەراتۋراسى وڭىرلەر بويىنشا مىناداي دەڭگەيدە قۇبىلادى:

– باتىستا تۇندە +2…+10 گرادۋس, توپىراق بەتىندە +1…+20 گرادۋس, كۇندىز +12…+32 گرادۋس; – سولتۇستىك پەن سولتۇستىك-شىعىستا تۇندە +3…+8 گرادۋس, توپىراق بەتىندە +2…+15 گرادۋس, كۇندىز +13…+31 گرادۋس; – ورتالىق پەن شىعىستا تۇندە +3…+15 گرادۋس, كۇندىز +20…+33 گرادۋس; – وڭتۇستىكتە تۇندە +8…+20 گرادۋس, كۇندىز +18…+33 گرادۋس.

بولجامدار ناقتىلانا تۇسپەك: «قازگيدرومەت» سۋپەركومپيۋتەردى پايدالانا باستادى

مامىردىڭ ەكىنشى جانە ءۇشىنشى ونكۇندىكتەرىندە باتىس, وڭتۇستىك, وڭتۇستىك-شىعىس جانە ورتالىق ايماقتاردا ەڭ ىستىق كۇندەرى اۋا تەمپەراتۋراسى +33…+41 گرادۋسقا دەيىن كوتەرىلەدى, ال ەلدىڭ قيىر وڭتۇستىگىندە +44 گرادۋسقا دەيىن جەتۋى مۇمكىن.

سالقىنداۋ كۇندەرى تۇنگى تەمپەراتۋرا +3…+10 گرادۋس شاماسىندا بولسا, كۇندىز +18…+25 گرادۋس ارالىعىندا بولادى.

سولتۇستىك پەن شىعىس وڭىرلەردە تۇنگى اۋا تەمپەراتۋراسى +2…+9 گرادۋس ارالىعىندا قۇبىلىپ, كەي جەرلەردە توپىراق بەتىندە +1…+18 گرادۋسقا دەيىن تومەندەۋى ىقتيمال. كۇندىزگى تەمپەراتۋرا +16…+33 گرادۋس شاماسىندا ساقتالادى.