قارجى مينيسترلىگى ۇلتتىق بانكپەن بىرلەسىپ, بيىلعى 4 مامىردان باستاپ مەملەكەتتىك باعالى قاعازدار نارىعىندا باستاپقى ديلەرلەر ينستيتۋتىن ەنگىزۋدى باستايدى. بۇل قادام ىشكى قارىز نارىعىن دامىتۋ مەن ونىڭ تيىمدىلىگىن ارتتىرۋعا باعىتتالعان ماڭىزدى رەفورمالاردىڭ ءبىرى بولىپ وتىر, دەپ حابارلايدى Egemen.kz.
جۇرگىزىلگەن مونيتورينگ ناتيجەسىندە باستاپقى ديلەرلەر رەتىندە تسەنتركرەديت بانكى, ەۋرازيالىق بانك, Kaspi Bank, ForteBank جانە قازاقستان حالىق بانكى بەلگىلەندى. اتالعان قارجى ينستيتۋتتارى نارىقتا جاڭا جۇيە بويىنشا جۇمىس ىستەيتىن بولادى.
جاڭا مودەلگە سايكەس, باستاپقى ديلەرلەر مەملەكەتتىك باعالى قاعازدارعا تۇراقتى سۇرانىستى قامتاماسىز ەتەدى جانە قايتالاما نارىقتا ەكىجاقتى باعا بەلگىلەۋ مەحانيزمىن قولداپ, اشىق ءارى ءوتىمدى باعا قالىپتاستىرۋعا جاعداي جاسايدى.
سونىمەن قاتار, نارىقتىڭ باسقا قاتىسۋشىلارى ءۇشىن قايتالاما نارىقتاعى مەملەكەتتىك باعالى قاعازدارمەن مامىلەلەر جاساۋ مۇمكىندىگى تولىق ءارى كەدەرگىسىز ساقتالادى.
ەسكى 2000 تەڭگەلىك بانكنوتتار قاشانعا دەيىن جارامدى؟
جاڭا جۇيەنىڭ ەنگىزىلۋى ارقىلى وتىمدىلىكتى ارتتىرۋ, سپرەدتەردى تارىلتۋ, باعا بەلگىلەۋدىڭ تۇراقتىلىعىن كۇشەيتۋ جانە ينۆەستيتسيالىق وپەراتسيالاردى جەڭىلدەتۋ كوزدەلىپ وتىر. بۇل ينۆەستورلار ءۇشىن نارىقتى نەعۇرلىم بولجامدى ءارى تارتىمدى ەتەدى.
ساراپشىلاردىڭ پىكىرىنشە, بۇل جوبا نارىقتىق وتىمدىلىكتى ەداۋىر ارتتىرىپ, ينۆەستورلار بازاسىن كەڭەيتۋگە مۇمكىندىك بەرەدى. سونىمەن قاتار, مەملەكەتتىك وبليگاتسيالاردىڭ حالىقارالىق تارتىمدىلىعى ءوسىپ, ولاردى JPMorgan GBI-EM سياقتى جاھاندىق يندەكستەرگە ەنگىزۋگە جول اشىلادى.
بۇل ءوز كەزەگىندە ۇكىمەتتىڭ قارىز الۋ شىعىندارىن ازايتۋعا جانە قارجى نارىعىنىڭ تيىمدىلىگىن ارتتىرۋعا ىقپال ەتەدى.
قارجى مينيسترلىگى مەن ۇلتتىق بانك ىشكى قارىز نارىعىن دامىتۋعا باعىتتالعان رەفورمالاردى كەزەڭ-كەزەڭىمەن جالعاستىرىپ, ونىڭ اشىقتىعى مەن تۇراقتىلىعىن كۇشەيتۋگە باسىمدىق بەرەتىنىن اتاپ ءوتتى.
باعالى قاعاز ءھام بانكنوت