ەلىمىزدەگى بالالار ادەبيەتى نازار اۋدارۋدى قاجەت ەتەدى. سەناتور رۋسلان رۇستەموۆ ءوزىنىڭ دەپۋتاتتىق ساۋالىندا وسى ماسەلەگە توقتالدى.
سەناتوردىڭ ايتۋىنشا, وسكەلەڭ ۇرپاقتىڭ ساناسىن وياتىپ, رۋحاني جەتىلدىرۋدە ماڭىزى زور بولسا دا مەكتەپتەردە قازاق تىلىندەگى زاماناۋي بالالار ادەبيەتىنىڭ اۋقىمى وتە شاعىن بەرىلگەن. مەكتەپ كىتاپحانالارى قورىنىڭ تەك 11,8%-ى عانا قازاق تىلىندەگى كىتاپتى قۇرايدى, ال مەملەكەتتىك تاپسىرىس بويىنشا بالالار كىتاپتارىنىڭ جىل سايىنعى جالپى شىعارىلىمى نەبارى 30-40 اتاۋدان تۇرادى.
«2022 جىلعى PISA زەرتتەۋى بويىنشا وقۋ ساۋاتتىلىعى 386 بالدى قۇرادى. قازاقستاندا بالالاردىڭ تەك 3/1-ىنە جۋىعى عانا كىتاپتى ءوز ەركىمەن وقيدى. ال اۋىلدىق جەردەگى بالالاردىڭ باسىم كوپشىلىگى كوركەم ادەبيەتتى تەك مەكتەپ تاپسىرماسىن ورىنداۋ ءۇشىن وقيتىنى انىقتالدى. حالىقارالىق ۇيىم بۇل ناتيجەلەرگە سۇيەنە وتىرىپ, قازاق بالالارىنىڭ كوركەم ادەبيەتكە قىزىعۋشىلىعى تومەن جانە وقۋ مادەنيەتىنىڭ جەتكىلىكسىز دەڭگەيدە ەكەنىن كورسەتتى. بالالار جازۋشىلارى مەن باسپاگەرلەردىڭ ايتۋىنشا, كىتاپتاردىڭ ورتاشا تارالىمى 1000-2000 دانا ارالىعىندا عانا, بۇل بۇكىل رەسپۋبليكاداعى بالالاردى قامتۋعا جەتكىلىكسىز. بالالارعا ارنالعان انيماتسيالىق ادەبيەت, ينكليۋزيۆتى باعىتتاعى جانە كوپتىلدى كونتەنت سەكىلدى زاماناۋي باعىتتار نازاردان تىس قالىپ وتىر», دەدى رۋسلان رۇستەموۆ.
سەناتور سونىمەن قاتار بالالار ادەبيەتى – تەك قىزىقتى وقيعالار تىزبەگى عانا ەمەس, بالانىڭ دۇنيەتانىمىن قالىپتاستىرىپ, مورالدىق قۇندىلىقتى ۇعىندىرۋعا كومەكتەسەتىن رۋحاني تاربيە قۇرالى ەكەنىن اتاپ ءوتتى. وڭتۇستىك كورەيا, فينليانديا, گەرمانيا سياقتى ەلدەردەگىدەي بۇل باعىتتا كىتاپحانا جۇيەسىن دامىتۋ, اۆتورلار مەن باسپاگەرلەردى ىنتالاندىرۋ, تسيفرلىق پلاتفورمالار قۇرۋ, ءبىلىم بەرۋ باعدارلامالارى مەن مەملەكەتتىك ماراپات بەلگىلەۋ ماڭىزدى بولىپ وتىر.
دەپۋتات مادەنيەت جانە اقپارات مينيسترلىگى مەن وقۋ-اعارتۋ مينيسترلىگىنە بالالار ادەبيەتىن قولداۋدىڭ ۇلتتىق ستراتەگياسىن ازىرلەۋ ماقساتىندا كۇش-جىگەردى بىرىكتىرۋگە شاقىردى. ول بالالار ادەبيەتىن تسيفرلىق فورماتتا دامىتۋ ماقساتىندا ۇلتتىق ونلاين-پلاتفورما جاساۋ جانە اۋىلدىق ايماقتاردا جىلجىمالى كىتاپحانالار جۇيەسىن كەڭەيتۋ ارقىلى بارلىق بالاعا تەڭ قولجەتىمدىلىكتى قامتاماسىز ەتۋ ماڭىزدى ەكەنىن اتاپ ءوتتى. سونداي-اق بالالار ادەبيەتى سالاسىندا ەڭبەك ەتەتىن جاس قالامگەرلەر مەن باسپاگەرلەرگە ارنايى ستيپەنديالار تاعايىنداپ, سالىقتىق جەڭىلدىكتەر بەرۋ جانە شىعارماشىلىق رەزيدەنتسيالار جۇيەسىن ەنگىزۋ ارقىلى قولداۋ كورسەتۋ كەرەكتىگى ايتىلدى.