قوستاناي. 14 اقپان. فەدوروۆ اۋدانىنداعى پەشكوۆ اۋىلى تۇرعىندارىنىڭ ءوتىنىشىن قوستاناي وبلىستىق ءماسليحات دەپۋتاتى دميتري گۋساك سكايپ ارقىلى تىڭدادى. بۇل «نۇر وتان » پارتياسى مەن «قازپوشتا» اكتسيونەرلىك قوعامى بىرلەسىپ جاساعان «ينتەرنەت جەتكەن نۇكتە» رەسپۋبليكالىق جوباسىنىڭ تۇساۋكەسەرى دە بولدى. بۇل تۋرالى egemen.kz ءتىلشىسى حابارلادى.
«نۇر وتان» پارتياسى وبلىستىق فيليالى مەن «قازپوشتا» اكتسيونەرلىك قوعامى وبلىستىق فيليالىنىڭ بۇل جوباسى بىردەن تيىمدىلىگىن كورسەتتى. وبلىس ورتالىعىنان 120 شاقىرىم جەردە جاتقان پەشكوۆ اۋىلىنان وبلىس ورتالىعىنا ات سابىلتۋ تۇرعىندار ءۇشىن وڭاي ەمەس. اۋىل پوشتاسىنا ورناعان «سكايپپەن» الدىمەن پەشكوۆ سەلولىق وكرۋگىنىڭ اكىمى امىربەك ەرجانوۆ شىقتى. ول وبلىستىق ءماسليحات دەپۋتاتى دميتري گۋساكقا اۋىلدىڭ جيىرما جىل بويى اۋىز سۋ ازابىن تارتىپ وتىرعانىن ايتتى. 2008 جىلى گەولوگيالىق بارلاۋ ەكسپەديتسياسى اۋىلدان ءبىر رەت بۇرعىلاعاندا سۋ اششى بولىپ شىققان. سودان بەرى بۇل ماسەلە بويىنشا تىنىشتىق ورنادى, اۋىلداستار اۋىز سۋدان تارىعىپ وتىر. وبلىس ءماسليحاتىنىڭ دەپۋتاتى دميتري گۋساك: «اۋىز سۋ شالعاي اۋىل ءۇشىن وتكىر ماسەلە ەكەنى انىق. بۇرعىلاۋ جۇمىسى قارجىعا كەلەتىن ماسەلە. سوندىقتان ول جەردە جەر استى تۇششى سۋى بار ما, جوق پا سونى ءبىلىپ الۋىمىز قاجەت. ول ءۇشىن الدىمەن جوبالىق-سمەتالىق قۇجاتتار كەرەك. اۋدان اكىمىنە, وبلىستىق ماسليحاتقا, «نۇر وتان» پارتياسىنىڭ وبلىستىق فيليالىنا اۋىل تۇرعىندارىنىڭ اتىنان, اۋدان اكىمى تاراپىنان حات جازىلۋ قاجەتتىگىن ءتۇسىندىردى. مەن ونى ءماسليحات سەسسياسىندا كوتەرەمىن. سوندا پەشكوۆ اۋىلىنا اۋىز سۋ قۇبىرىن تارتۋ, تۇششى سۋ تابۋ جۇمىستارىنا قاجەتتى قارجى 2016 جىلدىڭ بيۋدجەتىنە جۇكتەلەتىن بولادى», دەدى.
مۇنان كەيىن پەشكوۆ اۋىلىنىڭ تۇرعىنى ريتا گۋز دەپۋتاتقا «اۋىلعا كوگىلدىر وتىن قۇبىرى قاشان تارتىلادى؟» دەپ سۇراق قويدى. پەشكوۆ اۋىلىندا 2 800 ادام تۇرادى. ءبىر مەكتەپ, ەكى بالاباقشا بار, جاقىندا اۋرۋحانا سالىندى. وسىنىڭ بارلىعى وت جاعىپ جىلىتىلادى. اۋىل تۇرعىنى وركەنيەتتىڭ جەمىسىن كورگىسى كەلەدى. ريتا گۋز: «اۋىلىمىز ۇلكەن. جاس ماماندار كەلەدى, بىراق تۇراقتامايدى. جاستاردىڭ كەتۋى توقتار ەمەس. بىزگە رەسپۋبليكالىق بيۋدجەتتەن قارجى ءبولىنىپ, گاز تارتۋعا مۇمكىندىك بار ما ەكەن؟» دەدى. دەپۋتات مۇنىڭ دا ماسەلەسىن ءتۇسىندىردى. دميتري گۋساك: «اۋدان ورتالىعى فەدوروۆ سەلوسىنا 2017 جىلى گاز قۇبىرىن تارتۋ جوسپارلانعان. الدىمەن ول جەرگە تاراتۋ ستانساسىن سالىنۋى ءتيىس. سودان كەيىن عانا اينالاسىنداعى ەلدى مەكەندەردىڭ گازداندىرىلۋى شەشىلەدى. ەكىنشىدەن, فەدوروۆ پەن پەشكوۆتىڭ اراسى 25 شاقىرىم بولادى. گاز قۇبىرىن تارتۋعا بۇل الىس قاشىقتىق بولىپ سانالادى, ميلليونداعان قارجى كەتەدى. مۇنى دا ەسەپتەۋ كەرەك. سول ءۇشىن گاز قۇبىرىنان بۇرىن, ونىڭ جوبالىق-سمەتالىق قۇجاتتارىن جاساۋعا, سول ءۇشىن قارجى سۇراۋدى شەشۋ كەرەك», دەدى. سونىمەن قاتار, دەپۋتات اۋىل تۇرعىنىنا وسى تۋرالى اۋدان جانە وبلىس اكىمدەرىنە حات جازۋعا كەڭەس بەردى.
پەشكوۆ تۇرعىندارىنىڭ اتىنان ريتا تاعى دا سۇراق قويدى. اۋىلدا ەلەكتر ەنەرگياسىنىڭ اي سايىن قىمباتتاۋىنىڭ سەبەبىن سۇرادى. دەپۋتات بۇل سۇراققا جاۋاپ بەرۋگە قينالدى. ول وسى سۇراققا جاۋاپتى ءتيىستى ورىنداردان انىقتاپ, «نۇر وتان» پارتياسىنىڭ فيليالى ارقىلى حابارلاۋعا ۋادە ەتتى.
مىنە, اينالدىرعا ءسۇت ءپىسىرىم ۋاقىتتا الىستاعى پەشكوۆ اۋىلىنىڭ تۇرعىندارى وبلىستىق ءماسليحات دەپۋتاتىنان ءوزىن ويلاندىرعان ساۋالدارعا جاۋاپ الدى. «نۇر وتان» پارتياسى وبلىستىق فيليالى قوعامدىق قابىلداۋ ءبولىمىنىڭ مەڭگەرۋشىسى گۇلنار تلەوف: «اۋىلدان تۇرعىنداردىڭ قول ءۇزىپ شىعۋى قىس ايلارىندا وتە قيىن. ال ولار بۇگىن «ينتەرنەت جەتكەن نۇكتە» جوباسىنىڭ ارقاسىندا «سكايپ» ارقىلى دەپۋتاتىمەن بارلىق ماسەلە تۋرالى پىكىرلەسىپ, سۇراقتارىن قويدى. ەندى الداعى ۋاقىتتا دەپۋتاتتاردىڭ «سكايپ» ارقىلى قابىلداۋ جۇرگىزۋى اپتاسىنا ءبىر رەت ۇيىمداستىرىلىپ تۇرادى», دەدى.
ءنازيرا جارىمبەتوۆا.
دەرەك, سۋرەت: egemen.kz.