استانا. 14 اقپان. بۇگىن استاناداعى بەيبىتشىلىك جانە كەلىسىم سارايىندا قازاقستان حالقى اسسامبلەياسى كەڭەسىنىڭ وتىرىسى بولدى. كەڭەس جۇمىسىنا پارلامەنت دەپۋتاتتارى, رەسپۋبليكالىق ەتنو-مادەني بىرلەستىكتەردىڭ, ۇكىمەتتىك ەمەس ۇيىمداردىڭ جەتەكشىلەرى, قحا عىلىمي-ساراپتامالىق كەڭەسىنىڭ مۇشەلەرى, باق وكىلدەرى قاتىستى. بۇل تۋرالى «قازاقپارات» حابارلادى.
وتىرىس بارىسىندا كەڭەس مۇشەلەرى ءبىر اۋىزدان پرەزيدەنت سايلاۋىن مەرزىمىنەن بۇرىن وتكىزۋ تۋرالى ازاماتتاردىڭ قحا-عا جاساعان ۇسىنىسىن قولدايتىنىن جەتكىزدى.
كەڭەس مۇشەلەرى اتاپ وتكەندەي, الەمدىك ەكونوميكالىق داعدارىس كەزىندە ءبىزدىڭ ەلىمىزدە مەرزىمىنەن بۇرىن سايلاۋ وتكىزۋ «نۇرلى جول - بولاشاققا باستار جول» باعدارلاماسىن ءتيىمدى جۇزەگە اسىرۋعا , «قازاقستان-2050» ستراتەگياسىندا كورسەتىلگەن ەلىمىزدى دامىتۋعا باعىتتالعان باعدارلامالاردى دامىتۋعا مۇمكىندىك بەرەدى.
وتىرىس قورىتىندىسى بويىنشا قازاقستان حالقى اسسامبلەياسىنىڭ مۇشەلەرى دەپۋتتاتتىق توپقا پارلامەنت ماجىلىسىندە قازاقستان رەسپۋبليكاسى پرەزيدەنتىنىڭ سايلاۋىن مەرزىمىنەن بۇرىن وتكىزۋگە باستاما كوتەرۋ تۋرالى ۇندەۋ جولدادى.
قۇجاتتا مەرزىمىنەن بۇرىن سايلاۋ وتكىزۋ ۋاقىت تالابى ەكەندىگىن كورسەتكەن:
- جاھاندىق سىن-قاتەرلەر كەزەڭىندە ەلىمىزدىڭ پرەزيدەنتى نۇرسۇلتان نازارباەۆقا قازاقستاندى داعدارىستان الىپ شىعۋىنا مۇمكىندىك بەرەتىن جاڭا سەنىم مانداتى بەرىلۋى قاجەت.
- الەمدە تۇراقسىزدىق ورىن العان جاڭا ءارى كۇردەلى كەزەڭدە ەلىمىز ستراتەگيالىق باعىتىنان اينىماي, قازاقستاندى جاڭعىرتۋ جانە دۇنيە ءجۇزىنىڭ وزىق 30 ەلىنىڭ قاتارىنا ەنۋى ءۇشىن ەلباسى ن.ءا.نازارباەۆقا سەنىم ءبىلدىرۋ قاجەت.
- ەلباسىنا سەنىم مانداتىن ءبىلدىرۋ ارقىلى الەمدىك دامۋدىڭ جاڭا كەزەڭىندە حالقىمىزدى بىرىكتىرىپ, مەملەكەتتى دامىتۋداعى ماڭىزدى ماسەلەلەرگە دەن قويۋعا مۇمكىندىك الامىز.
«قازاقستان حالقى اسسامبلەياسى وسى ماڭىزدى ماسەلە بويىنشا ۇستانىمىن ءبىلدىرۋدى ءوزىنىڭ ازاماتتىق بورىشى دەپ سانايدى.
بۇگىندە «نۇرلى جول - بولاشاققا باستار جول» باعدارلاماسىن جانە «قازاقستان-2050» ۇزاق مەرزىمدى ستراتەگياسىن جۇزەگە اسىرۋ ءۇشىن بار كۇش-جىگەرىمىزدى بىرىكتىرۋ كەرەك.
مەملەكەت باسشىسى جۇرگىزىپ وتىرعان ساياسات توڭىرەگىندە توپتاسۋ ارقىلى ەلىمىزدىڭ ودان ءارى قارقىندى دامۋى مەن ازاماتتاردىڭ ءال-اۋقاتىن ارتتىرۋعا قول جەتكىزە الاتىنىمىزعا سەنىمدىمىز.
سوندىقتان وسى كۇردەلى زاماندا ءبىز بارشا قازاقستاندىقتاردى ەلباسى ن.ءا.نازارباەۆتىڭ توڭىرەگىندە توپتاسۋعا شاقىرامىز.
پرەزيدەنتتىك سايلاۋدى مەرزىمىنەن بۇرىن وتكىزۋ ارقىلى ەكونوميكا ءوسىمىن نىعايتۋ, جۇرگىزىلىپ وتىرعان ساياساتتىڭ ساباقتاستىعىن قامتاماسىز ەتۋ ماڭىزدى. بۇل باستاماعا شىن مانىندە باسقا بالاما جوق.
سونىمەن بىرگە ەندىگى 2016 جىلى پرەزيدەنتتىك جانە پارلامەنتتىك سايلاۋلار ءبىر مەزگىلگە سايكەس كەلەدى. كونستيتۋتسيا نورمالارىن بۇلجىتپاي ورىنداۋ ماقساتىندا ەكى سايلاۋدى ءارتۇرلى كەزەڭدەردە وتكىزگەن ءجون.
قازاقستان حالقى اسسامبلەياسى وتانىمىزدىڭ ورنىقتى دامۋى مەن العا جىلجۋىنا باعىتتالعان باستامالاردى قاشاندا قولداپ كەلدى جانە بولاشاقتا دا سولاي بولا بەرمەك.
وسى جالپىحالىقتىق باستامانى كوتەرە وتىرىپ, قازاقستاندىقتار تاراپىنان دا, حالىقارالىق قاۋىمداستىق تاراپىنان دا قولداۋعا يە بولامىز دەگەن سەنىمدەمىز, ويتكەنى ءبىز حالقىمىز بەن ەلىمىزدىڭ بيىك مۇددەسىن كوزدەپ وتىرمىز.
ءبىز, قازاقستان حالقى اسسامبلەياسى كەڭەسى مۇشەلەرى, قازاقستان رەسپۋبليكاسى پارلامەنتىنىڭ ماجىلىسىندەگى قازاقستان حالقى اسسامبلەياسىنىڭ دەپۋتاتتار توبىنا قازاقستان رەسپۋبليكاسى پرەزيدەنتىنىڭ مەرزىمىنەن بۇرىن سايلاۋىن وتكىزۋ تۋرالى باستاما كوتەرسىن دەپ ۇندەۋ جولدايمىز.
ءبىز بارشا قازاقستان حالقىن, ساياسي پارتيالاردى, ازاماتتىق سەكتوردى جانە ەلىمىزدىڭ پاتريوتتارىن قازاقستان رەسپۋبليكاسى پرەزيدەنتىنىڭ مەرزىمىنەن بۇرىن سايلاۋىن وتكىزۋ تۋرالى باستامانى قولداۋعا شاقىرامىز!» - دەپ جازىلعان ۇندەۋدە.