كەشە پالاتا سپيكەرى قابيبوللا جاقىپوۆتىڭ توراعالىعىمەن ءماجىلىس بيۋروسى ءوتىپ, وندا الداعى جالپى وتىرىستىڭ كۇن ءتارتىبى ناقتىلاندى, دەپ حابارلادى وسى پالاتانىڭ ءباسپاسوز قىزمەتى.
حالىق قالاۋلىلارى نازارىنا تابيعي مونوپوليالار مەن رەتتەلەتىن نارىقتار ماسەلەلەرى بويىنشا زاڭنامالىق تۇزەتۋلەر جوباسى ەكىنشى وقىلىمدا ۇسىنىلادى. سونداي-اق, جالپى وتىرىستا حالىقارالىق اۋە تاسىمالدارىنىڭ كەيبىر قاعيدالارىن بىرىزدەندىرۋگە ارنالعان كونۆەنتسيانى راتيفيكاتسيالاۋ تۋرالى زاڭ جوباسى قارالماق.
سونىمەن قاتار, كۇن ءتارتىبى جوباسى اياسىندا بىرقاتار راتيفيكاتسيالىق قۇجاتتار بويىنشا, اتاپ ايتار بولساق, قازاقستان مەن قىتاي اراسىنداعى توتەنشە جاعدايلاردىڭ الدىن الۋ جانە ولاردى جويۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋعا, قازاقستان مەن رەسەي اراسىنداعى قازاقستان رەسپۋبليكاسىنا مۇناي جانە مۇناي ونىمدەرىن جەتكىزۋ سالاسىنداعى ساۋدا-ەكونوميكالىق ىنتىماقتاستىق تۋرالى كەلىسىمگە جانە قازاقستان-وزبەكستان مەملەكەتتىك شەكاراسى ارقىلى وتكىزۋ پۋنكتتەرى تۋرالى كەلىسىمگە وزگەرىستەر ەنگىزۋگە قاتىستى زاڭ جوبالارىنا قاتىستى بەيىندى كوميتەتتەرگە قورىتىندى ازىرلەۋ مەرزىمى تاعايىندالماق.