الماتى وبلىسى جاركەنت قالاسىنىڭ ماڭىنداعى اەروۇتقىر اسكەرلەر موتواتقىشتار ءبولىمىنىڭ بازاسىندا قازاقستاندىق مەرگەندەرمەن قاتار, قىرعىز رەسپۋبليكاسى قارۋلى كۇشتەرىنىڭ التى مەرگەنى دە جيىندى اياقتادى. بۇل ۇقشۇ شەڭبەرىندە وتكىزىلگەن وقۋ-جاتتىعۋلار بارىسىندا قول جەتكىزىلگەن ۋاعدالاستىققا سايكەس ءوتىپ وتىر.
جيىنعا قازاقستان اەروۇتقىر اسكەرلەرى دەسانتتىق-شابۋىلداۋ, موتواتقىشتار بريگادالارىنان جانە بارلاۋ بولىمشەلەرىنەن بارلىعى 170-تەن استام مەرگەن قاتىستى. بۇدان بۇرىن مەرگەندەردى دايىنداۋ اسكەري بولىمدەردە وتكىزىلىپ كەلگەن بولاتىن. بۇل جولى تۇڭعىش رەت اەروۇتقىر اسكەرلەرىنىڭ بارلىق مەرگەندەرى ءبىر ءبولىمنىڭ اۋماعىنا وقشاۋ جينالىپ ءبىلىمى مەن بىلىكتىلىگىن ارتتىردى, كاسىبي داعدىسى مەن تاجىريبەسىن جەتىلدىردى.
ءۇش اپتا بويعى جيىنعا قاتىسقان اسكەري قىزمەتشىلەر كاسىپقوي سەرجانتتاردان قۇرالعان تاجىريبەلى نۇسقاۋشىلاردىڭ جەتەكشىلىگىمەن دالالىق جاعدايدا مەرگەندىك ونەردىڭ قىر-سىرىن مەڭگەردى. مەرگەندەرمەن تاكتيكالىق, تاۋلىق, ينجەنەرلىك دايارلىقتار مەن اتىس دايارلىعىنان ساباقتار وتكىزىلدى. تاۋ مەن دالادا, كۇندىز جانە تۇنگى جاعدايدا مەرگەندەر تانىس ەمەس جەردە باعدار تابۋعا جاتتىعىپ, قارۋلاردىڭ تاكتيكا-تەحنيكالىق سيپاتتامالارىن زەردەلەدى, بارلاۋ دايارلىعىنان ءوتتى.
– مەرگەندەر بارلىق جاعىنان كاسىبي بولۋى ءتيىس. نەگىزگى كۇشتەردەن الىس جەردە دۇرىس ءىس-قيمىل جاساۋعا شەشىم قابىلداي ءبىلۋ, «ءبىر اتىلعان وق – ءبىر جويىلعان نىسانا» قاعيداتى بويىنشا جۇمىس ىستەۋ ولاردىڭ نەگىزگى قاعيداسى, – دەيدى جيىن باسشىسى, اەروۇتقىر اسكەرلەرى قولباسشىسى باسقارماسى جاۋىنگەرلىك دايارلىق باسقارماسىنىڭ اعا وفيتسەرى پودپولكوۆنيك جاناربەك سلياموۆ. سوندىقتان دا قازاقستان قۇرلىق اسكەرلەرىنىڭ باس قولباسشىسى مەن اەروۇتقىر اسكەرلەردىڭ قولباسشىسى مەرگەندەر دايارلىعىنا ۇلكەن كوڭىل ءبولىپ وتىر.
جيىن سوڭىندا سەرتيفيكاتتار تابىس ەتىلىپ, ونىڭ اياقتالعانىن ءبىلدىردى. سەرتيفيكاتتارعا قازاقستاندىق مەرگەندەرمەن قاتار قىرعىزستاندىق ارىپتەستەر دە يە بولدى. ەلدەرىنە ورالعان سوڭ ولار ءوز ارمياسىندا قازاقستاندىق داستۇرگە سايكەس جيىندار وتكىزىپ, كورگەن-بىلگەندەرىن ۇيرەتەتىن بولادى.
«ەگەمەن-اقپارات».