ەڭبەك جانە حالىقتى الەۋمەتتىك قورعاۋ مينيسترلىگىنىڭ باستاماسىمەن ەرەكشە قاجەتتىلىكتەرى بار ادامدارعا ينۆاتاكسي قىزمەتى 2025 جىلدىڭ باسىنان باستاپ استانا مەن الماتى قالالارىندا 182,2 مىڭ رەت كورسەتىلگەن, دەپ جازادى Egemen.kz.
مينيسترلىك ينۆاتاكسي ساپاسىن ارتتىرۋ ماقساتىندا اكىمدىكتەرمەن بىرلەسىپ وسى قىزمەتتىڭ تەتىگىنە وزگەرتۋ ەنگىزگەن. بۇل باستاماعا ازاماتتار قىزمەت الۋدان ءبىر كۇن بۇرىن تەلەفون ارقىلى جازىلۋ, ساپارلارىن الدىن الا جوسپارلاۋ, كەزەك كۇتۋ, ينۆاتاكسيدىڭ جەتىسپەۋشىلىگى سىندى جاعدايلار سەبەپ بولعان.
شارتتاردى جەڭىلدەتۋ ءۇشىن تاكسي اگرەگاتورلارىن تارتۋ بويىنشا پيلوتتىق جوبا قولعا الىنعان.
مۇنداعى باستى شارت ساپارلاردىڭ اقىسىنان پايىزدىڭ بولماۋى, ولار ادەتتە اگرەگاتور پلاتفورمالارىنىڭ پايداسىنا اۋدارىلاتىن. ياندەكس كومپانياسى پيلوتتىق جوباعا وتەۋسىز نەگىزدە قاتىسۋعا نيەت بىلدىرگەن.
پيلوتتىق جوبا شەڭبەرىندە ازاماتتار ياندەكس Go ءموبيلدى قوسىمشاسى ارقىلى ينۆاتاكسي قىزمەتىن قولدانا الادى. بۇل قىزمەتتى الۋشى ءۇشىن كولىكتى تەزىرەك تاڭداۋعا, ونلاين رەجيمىندە تاپسىرىس مارتەبەسىن قاداعالاۋعا جانە جاسالعان ساپارلارعا مونيتورينگ جۇزەگە اسىرۋعا مۇمكىندىك بەرەدى. اتالعان قوسىمشادا مۇگەدەكتىگى بار ادامدار جۇرگىزۋشىگە ساپارداعى ەرەكشە قاجەتتىلىكتەرى تۋرالى ەسكەرتۋى ءۇشىن ارنايى مۇمكىندىكتەر ەكرانى ىسكە قوسىلعان. ءوز كەزەگىندە جۇرگىزۋشىلەر ادامدى كولىككە وتىرعىزۋ جانە جولاۋشىنى تۇسىرۋدە قالاي كومەك كورسەتۋگە بولاتىنى سەكىلدى ارنايى نۇسقاۋلار الادى.
ۆەدومستۆو پيلوتتىق جوبانى الداعى ۋاقىتتا ەلىمىزدىڭ باسقا وڭىرلەرىنە ماسشتابتاۋ جوسپارلانىپ وتىرعانىن مالىمدەدى.
ايتا كەتەيىك, بىلتىر ينۆاتاكسي 207,2 مىڭ رەت قىزمەت كورسەتكەن.