ۇستىمىزدەگى جىلدىڭ اقپان ايىنىڭ باسىندا كولىكتەگى ءىىد-ءنىڭ ەسىرتكىگە قارسى كۇرەس باسقارماسىنىڭ قىزمەتكەرلەرىمەن جۇرگىزىلگەن جەدەل ىزدەستىرۋ شارالارى بارىسىندا استانا بەكەتىنىڭ تەمىرجول ۆوكزالى پەررونىندا «الماتى-1-استانا» باعىتىندا كەلگەن جولاۋشىلار پويىزىنان تۇسكەن الماتى وبلىسى, قاسكەلەڭ قالاسىنىڭ 28 جاستاعى تۇرعىنى ۇستالدى.
تەكسەرۋ بارىسىندا ونىڭ قارا ءتۇستى جول سومكەسىنىڭ ىشىنەن اق ءتۇستى ۇنتاقتى پوليەتيلەندى پاكەت الىنىپ, تاركىلەندى. ساراپتامانىڭ قورىتىندىسىنا سايكەس, ونىڭ جالپى سالماعى 8 كيلو 446 گرامم بولاتىن اسا ءىرى كولەمدەگى «گەروين» ەسىرتكى زاتى ەكەندىگى انىقتالدى.
تەكسەرۋ كەزىندە كۇدىكتى ەسىرتكى زاتىن الماتى قالاسىنان استانا قالاسىنا دەيىن تەمىرجول كولىگىمەن تاسىمالداۋدى جۇزەگە اسىرىپ, ول ءۇشىن اقشالاي سىياقى الۋى كەرەك بولعانى بەلگىلى بولدى. سونداي-اق, قوسىمشا جەدەل ىزدەستىرۋ شارالارىن جۇرگىزۋ بارىسىندا الماتى قالاسىندا وسى ەسىرتكى زاتىن جونەلتۋشى ۇستالدى.
ولارعا قىلمىستىق ءىس قوزعالدى, دەپ حابارلادى كولىكتەگى ءىىد ءباسپاسوز قىزمەتى.