مەملەكەت باسشىسى قاسىم-جومارت توقاەۆ تۇركى مەملەكەتتەرى ۇيىمىنىڭ كەزەكتى جيىنىندا ءسوز سويلەپ, ۇيىم شەڭبەرىندە قابىلدانعان كەلىسىمدەر مەن قۇجاتتارداعى ەرەجەلەردى قاتاڭ ساقتاۋ قاجەتتىگىن ەرەكشە اتاپ ءوتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«تاعى ءبىر اسا ماڭىزدى ماسەلە, بۇل – ءبىزدىڭ ۇيىمنىڭ شەڭبەرىندە قابىلدانعان قۇجاتتارداعى ەرەجەلەردى قاتاڭ ساقتاۋ. پروتسەدۋرا ماسەلەسى بولسىن, ساياسي جانە ەكونوميكا سۇراقتارى بولسىن – كەلىسىمدەردىڭ ەرەجەلەرىنىڭ بارلىعىن قۇرمەتتەۋ, ساقتاۋ قاجەت, مىندەتتى تۇردە ىسكە اسىرۋ كەرەك», دەدى پرەزيدەنت.
مەملەكەت باسشىسى سوڭعى كەزدەگى تاريفكە قاتىستى وقيعالار جاھاندىق ساۋدا ساياساتىنداعى وتە ۇلكەن وزگەرىستەرگە سەبەپ بولعانىنا نازار اۋداردى. پرەزيدەنت مۇنداي داعدارىستار ءتۇرلى سىن-قاتەر تۋدىرۋمەن قاتار جاڭا مۇمكىندىكتەرگە جول اشاتىنىن العا تارتىپ, ونەركاسىپ, كولىك-ترانزيت, اۋىل شارۋاشىلىعى, تسيفرلاندىرۋ سياقتى باعىتتار بويىنشا بىرلەسە ارەكەت ەتۋدى ۇسىندى.
قاسىم-جومارت توقاەۆ ورتا ءدالىزدى شىعىس پەن باتىستىڭ اراسىنداعى نەگىزگى كوپىرگە اينالدىرۋدى ستراتەگيالىق مىندەت رەتىندە اتادى. بۇل رەتتە پرەزيدەنت ەلىمىز قىرعىزستانمەن جانە وزبەكستانمەن شەكاراداعى راسىمدەردى تسيفرلاندىرۋ, جۇك ءترانزيتىن جەڭىلدەتۋ ءۇشىن ناقتى شارالار قابىلداپ جاتقانىن, سونداي-اق قازاقستان-قىتاي شەكاراسىندا ءۇشىنشى تەمىر جول بەكەتىن اشۋدى جوسپارلاپ وتىرعانىن جەتكىزدى.
وسى ورايدا قاسىم-جومارت توقاەۆ باۋىرلاس ەلدەردى ءىرى ينفراقۇرىلىمدىق جوبالاردى بىرلەسىپ جۇزەگە اسىرۋعا, سونىڭ ىشىندە «سولتۇستىك – وڭتۇستىك» باعىتى بويىنشا حالىقارالىق كولىك قاتىناسىن دامىتۋعا شاقىردى. اتالعان جوبا تۇركى ەلدەرىنىڭ وڭىرلىك ترانزيت حابى رەتىندەگى ءرولىن ەداۋىر نىعايتادى.