تۋريزم يندۋسترياسى كوميتەتى ازاماتتارعا قاۋىپسىز ءارى سەنىمدى ساياحات جاساۋ ءۇشىن تۋروپەراتورلار مەن تۋراگەنتتەردى دۇرىس تاڭداۋعا كەڭەس بەرەدى, دەپ حابارلايدى Egemen.kz.
رەسمي دەرەكتەرگە سايكەس, «ە-ليتسەنزيالاۋ» مەملەكەتتىك پورتالىندا قازىرگى تاڭدا ەلىمىزدە 11 914 تۋراگەنت پەن 634 تۋروپەراتور تىركەلگەن. سونىمەن قاتار, تۋريزم سالاسىنداعى سەنىمدى قىزمەت كورسەتۋشىلەردىڭ ءتىزىمى تۋريزم يندۋسترياسى كوميتەتىنىڭ جانە جەرگىلىكتى اتقارۋشى ورگانداردىڭ رەسمي سايتتارىندا جاريالانعان. مۇندا تۋروپەراتورلارمەن قاتار, گيدتەر, ەكسكۋرسوۆودتار مەن تۋريزم نۇسقاۋشىلارى دا قامتىلعان.
ساراپشىلاردىڭ ايتۋىنشا, تۋريستىك كومپانياعا جۇگىنگەن كەزدە ازاماتتار كومپانيا وكىلىنەن تۋراگەنتتىك قىزمەت تۋرالى حابارلامانى جانە تۋروپەراتوردىڭ ليتسەنزياسىنىڭ بار-جوعىن مىندەتتى تۇردە سۇراتۋى كەرەك. بۇل — تۇتىنۋشى قۇقىعىن قورعاۋدىڭ العاشقى قادامى.
«تۇتىنۋشىلاردى قورعاۋدىڭ نەگىزگى قۇرالىنىڭ ءبىرى – تۋريستىك كود. تۋركود – بۇل ارىپتەر مەن سانداردان تۇراتىن بىرەگەي كود, ونى تەكسەرۋ ارقىلى تۋريست تۋروپەراتوردىڭ ۇشۋ مەن تۇرۋ شىعىندارىن قابىلداۋشى تاراپقا جانە اۋە كومپانياسىنا تولەنگەنىنە كوز جەتكىزە الادى. بۇل بىرەگەي مەحانيزم تۋروپەراتوردىڭ ءوز مىندەتتەمەلەرىن ورىنداي الماۋى نەمەسە توتەنشە جاعدايلار/وقىس وقيعالار ورىن العان جاعدايدا تۋريستەردىڭ ەلگە قايتا ورالۋىن كەپىلدەندىرەدى», دەلىنگەن حابارلامادا.
اتالعان شارالار تۋريستىك سالاداعى اشىقتىقتى ارتتىرىپ, ازاماتتاردىڭ قۇقىقتارىن قورعاۋعا جانە وتاندىق تۋريستىك كومپانيالارعا دەگەن سەنىمدى نىعايتۋعا باعىتتالعان.