ەلباسى نۇرسۇلتان نازارباەۆ قىتاي حالىق رەسپۋبليكاسىنىڭ توراعاسى سي تسزينپينگە بەيجىڭ قالاسىنىڭ 2022 جىلعى قىسقى وليمپيا ويىندارىنىڭ استاناسى بولىپ تاڭدالۋىنا بايلانىستى قۇتتىقتاۋ جەدەلحاتىن جولدادى, دەپ حابارلادى قازاقستان پرەزيدەنتىنىڭ ءباسپاسوز قىزمەتى.
مەملەكەت باسشىسى سي تسزينپيندى بەيجىڭنىڭ 2022 جىلعى قىسقى وليمپيا ويىندارىن ءوتكىزۋ قۇقىعىنا يە بولۋىنا بايلانىستى شىن جۇرەكتەن قۇتتىقتادى.
«بۇل وقيعا جاڭا قىتايدىڭ زور مۇمكىندىكتەرىن الەمگە تاعى دا پاش ەتتى. قىتاي تاراپىنىڭ وليمپيا ويىندارىن جوعارى دەڭگەيدە ۇيىمداستىرىپ, حالىقتار دوستىعى مەن بەيبىتشىلىكتى ءدارىپتەيتىن وليمپيادالىق ءداستۇردى ودان ءارى نىعايتۋعا ۇلەس قوساتىنىنا كامىل سەنەمىن», – دەپ اتاپ وتىلگەن قۇتتىقتاۋدا.
نۇرسۇلتان نازارباەۆ, سونداي-اق, قحر توراعاسىنا قىسقى وليمپيادانى تابىستى وتكىزۋگە, ال دوستاس قىتاي حالقىنىڭ باق-بەرەكەسى ارتىپ, ءوسىپ-وركەندەي بەرۋىنە تىلەكتەستىك ءبىلدىردى.