اقتوبە قالاسىنداعى قازاقستان حالقى اسسامبلەياسىنىڭ عيماراتىندا وتكەن «ماڭگىلىك ەل – بولاشاعى ءبىرتۇتاس ۇلت» وبلىستىق پاتريوتتار فورۋمىنا وبلىستىق ءماسليحات دەپۋتاتتارى, قوعامدىق ۇيىمدار مەن ەتنومادەني بىرلەستىكتەردىڭ وكىلدەرى, بەلسەندى جاستار قاتىستى. فورۋمنىڭ باستى ماقساتى «ماڭگىلىك ەل» پاتريوتتىق اكتىسى جوباسىن جان-جاقتى تالقىلاۋ, جالپىحالىقتىق «ماڭگىلىك ەل» يدەياسىن, «مەملەكەت قۇرىلىسىنىڭ ءارى قاراي دامۋىنىڭ 100 ناقتى قادامى» – ۇلت جوسپارىن ناسيحاتتاۋ بولىپ تابىلدى.
فورۋمدا ءسوز العان وبلىس اكىمىنىڭ ورىنباسارى سارا نۇرقاتوۆا ەلباسى نۇرسۇلتان نازارباەۆتىڭ بەس ينستيتۋتتىق رەفورمانى ىسكە اسىرۋ ءۇشىن بەلگىلەگەن 100 ناقتى قادامىنا توقتالا كەلىپ, ونى الەمدەگى جوعارى ماقساتتارعا نەگىزدەلگەن باعدارلامالاردىڭ ءبىرى رەتىندە باعالادى. ۇلت جوسپارىن جۇزەگە اسىرۋ ارقىلى ناتيجەلى بەلەستەرگە قول جەتكىزۋ ءۇشىن ازاماتتىق قوعام مەن مەملەكەتتىڭ ءىس-قيمىلىن جۇمىلدىرۋدىڭ ماڭىزدىلىعىن اتاپ ءوتتى.
– پرەزيدەنتتىڭ «ماڭگىلىك ەل» ۇلتتىق يدەياسى مەن بەس ينستيتۋتتىق رەفورمانى جۇزەگە اسىرۋعا ارنالعان «100 ناقتى قادام» باعدارلاماسى ەلىمىزدىڭ ەكونوميكاسىن نىعايتۋعا, حالىقتىڭ تۇرمىس-تىرشىلىگىن جاقسارتۋعا, كۇردەلى كەزەڭنەن سەنىمدى وتۋگە سەرپىن بەرەرى ءسوزسىز. بۇل باعدارلامانىڭ قازىرگى تاڭداعى الەمدىك جانە ىشكى سىن-قاتەرلەرگە تولىقتاي جاۋاپ بەرە الاتىنىنا, قازاقستاننىڭ دامىعان وتىز ەلدىڭ قاتارىنا ەنۋىن قامتاماسىز ەتەتىن باياندىلىعىنا بارشا قازاقستاندىقتار سەنىمدى. مۇنداي ۇلتتىق ىرگەلى ىستەردى جۇزەگە اسىرۋعا ارقايسىمىز بەلسەنە قاتىسۋىمىز قاجەت. سونىڭ ىشىندە جالىندى جاستارعا جۇكتەلەر جاۋاپكەرشىلىك جوعارى, ولار ەلىمىزدىڭ ەكونوميكالىق دامۋى مەن وزگە مەملەكەتتەر الدىنداعى بەدەلىنىڭ بيىك بولۋىنا ءوز ۇلەستەرىن قوسىپ, الدىڭعى لەكتەن كورىنۋلەرى ءتيىس, – دەدى ول.
بۇدان كەيىن ءسوز العان وبلىستىق ءماسليحاتتىڭ دەپۋتاتى, اقتوبە كولىك, كوممۋنيكاتسيا جانە جاڭا تەحنولوگيالار كوللەدجىنىڭ ديرەكتورى جەڭىسگۇل مۇحامبەتپايىزوۆا ەل دامۋىنىڭ وزەكتى ماسەلەلەرىنىڭ شەشىمى باعدارلانعان ۇلت جوسپارى ۇلت پەن ۇلىستاردى توپتاستىراتىنىن العا تارتتى. ول بىرلىك پەن تاتۋلىقتى ساقتاۋ جولىندا ەلباسى ۇسىنعان «100 ناقتى قادام» باعدارلاماسىنىڭ باياندىلىعىن قامتاماسىز ەتە وتىرىپ, ءار قازاقستاندىقتىڭ وسىعان ۇلەس قوسۋىنىڭ ماڭىزدىلىعىن ايرىقشا اتاپ ءوتتى.
فورۋمدا «ەر باقىت» اسكەري-پاتريوتتىق كلۋبىنىڭ توراعاسى مارات قويلىباەۆ, «جاس كۇش» جاستار قوعامدىق بىرلەستىگىنىڭ بەلسەندى مۇشەسى دانيار ءىزباساروۆ جانە «وكسانا» ۋكراين ەتنومادەني بىرلەستىگىنىڭ وكىلى ۆەرونيكا كاباچەك ءسوز ءسويلەپ, مەملەكەت باسشىسى ۇسىنعان ۇلت جوسپارىنىڭ جۇزەگە اسىرىلۋى ەلىمىزدەگى تاتۋلىق پەن تۇراقتىلىقتى نىعايتۋعا بەرىك نەگىز قالايتىنىن جەتكىزدى. سونداي-اق, شارا بارىسىندا استانا قالاسىندا وتەتىن رەسپۋبليكالىق پاتريوتتار فورۋمىنا وبلىس اتىنان قاتىساتىن دەلەگاتتار تانىستىرىلىپ, جاس ونەرپازدار پاتريوتتىق اندەر ورىندادى.
بۇل فورۋم ونسىز دا جاڭالىققا جانى قۇمار, جاڭا ىستەرگە ىنتىق جاستاردىڭ جىگەرىن جانىپ, جارقىن بولاشاقتىڭ قوجالارى وزدەرى ەكەنىنە سەنىمدەرىن نىعايتا ءتۇستى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.
سۋرەتتى تۇسىرگەن
حايرەدەن راۋشانوۆ.