استاناداعى ۇلتتىق عىلىمي ونكولوگيا ورتالىعىنىڭ مەديتسينا ماماندارى بۇرىننان وزىق تەحنولوگيالاردى پايدالانادى. دارىگەرلەردىڭ بىلىكتىلىگى جاعىنان دا كوپ ورتالىقتان كوش ىلگەرى. ەندى, مىنە, وزىق ورتالىقتىڭ جانىن اشىلعان تاعى ءبىر ءزاۋلىم عيمارات ەلىمىزدىڭ ونكولوگيالىق اۋرۋلاردى ەمدەۋدەگى تاجىريبەسىن مولايتادى.
جوبا 2019 جىلى پرەزيدەنت قاسىم-جومارت توقاەۆتىڭ تاپسىرماسىمەن قولعا الىنعان. عيماراتقا قاراپ كوپجىلدىق ەڭبەكتىڭ, زاماناۋي ينجەنەرلىك, مەديتسينالىق شەشىمدەردىڭ ءساتتى ۇلگىسىن بايقاۋ قيىن ەمەس. نىساننىڭ جالپى اۋماعى – 60 مىڭ شارشى مەتر. 210 توسەك-ورىنعا شاقتالعان. بۇدان بولەك ورتالىقتىڭ ەمحاناسىندا كۇنىنە 500 ناۋقاستى ەمىن-ەركىن قابىلداۋعا مۇمكىندىك بار. ورتالىققا مەديتسينالىق جابدىقتاردى Varian Medical Systems Inc., Philips, Siemens سىندى الەمنىڭ جەتەكشى وندىرۋشىلەرى جەتكىزگەن. وسىلايشا, ورتالىق ازيادا العاش رەت ساۋلەلىك, راديونۋكليدتىك جانە پروتوندىق تەراپيانى بىرىكتىرەتىن ءبىرتۇتاس پلاتفورما قۇرىلىپ وتىر.
وسى كۇنى ورتالىقتىڭ اشىلۋ سالتاناتىنا وراي «قازاقستان رەسپۋبليكاسىنداعى ونكولوگيالىق كومەكتىڭ جاڭا بەلەستەرى. ۇعوو – بولاشاقتىڭ وزىق تەحنولوگيالارى» تاقىرىبىندا حالىقارالىق عىلىمي-تاجىريبەلىك كونفەرەنتسيا ءوتتى. وعان 29 ەلدەن جەتەكشى ونكولوگتار, زەرتتەۋشىلەر مەن سالانىڭ بىلىكتى ماماندارى كەلدى. ونكولوگيالىق اۋرۋلاردى دياگنوستيكالاۋ, ەمدەۋ جانە الدىن الۋ باعىتتارىنداعى زاماناۋي تاسىلدەردى تالقىلادى. كونفەرەنتسيادا پرەزيدەنت كومەكشىسى تامارا دۇيسەنوۆا ونكولوگيالىق اۋرۋلاردى ەمدەۋگە ەل دارىگەرلەرى عانا ەمەس, حالىقارالىق قوعامداستىق قۇلشىنىپ وتىرعانىن العا تارتتى.
–ونكولوگيالىق اۋرۋلار دەنساۋلىق ساقتاۋ سالاسىنىڭ باسىمدىق بەرەتىن باعىتتارىنىڭ ءبىر بولىپ قالا بەرەدى. سەبەبى بۇل ءبىر ءوڭىردى, ءبىر مەملەكەتتى عانا ەمەس, دۇنيەجۇزى حالىقتارىن الاڭداتىپ وتىرعان ماسەلە. ارىپتەستەردەن سۇراتقان اپقاراتتى مىسال ەتسەم, دۇنيەجۇزىندە جىلىنا 19 ميلليوننان استام قاتەرلى ىسىك جاعدايى تىركەلەدى ەكەن. ونىڭ ىشىندە 10 ميلليوننان استام ادام قازا تابادى. ال ەلىمىزدە 40 مىڭعا جۋىق پاتسيەنتتەن قاتەرىلى ىسىك انىقتالعان. قاراپ وتىرساق, ءبىر مونوقالانىڭ حالقى. ونىڭ ىشىندە 12 مىڭنان استام ادام قازا تابادى ەكەن. مۇنى دا سالىستىرمالى تۇردە ءبىر اۋىلدىڭ حالقى دەپ ايتساق بولادى. وسىنى ەسكەرسەك, الەم حالىقتارى ونكولوگيالىق اۋرۋلاردىڭ پروفيلاكتيكاسىن, دياگنوستيكاسىن جەتىلدىرىپ, اۋرۋدى ەمدەپ-جازۋ بويىنشا تاجىريبە الماسىپ وتىرۋى كەرەك دەگەنگە توقتالامىز. بۇگىنگى كونفەرەنتسيانىڭ ءوزى سالاداعى ۇزدىك تاجىريبەلەردى, جاڭاشىلدىق پەن مۇمكىندىكتەردى تالقىلاۋدىڭ تاپتىرماس مۇمكىندىگى دەپ بىلەمىز, – دەدى تامارا دۇيسەنوۆا.
بيولوگيا عىلىمدارىنىڭ دوكتورى, پروفەسسور, اكادەميك كۇنسۇلۋ زاكاريا ونكولوگيالىق اۋرۋلاردى ەمدەۋدى ءتۇپتامىرىنان, پروفيكاتيكا, دياگنوستيكادان باستاۋ كەرەگىن ايتتى.
–ونكولوگيالىق ورتالىق – قاراپايىم مەديتسينالىق مەكەمە ەمەس, بۇل ەلىمىزدىڭ دەنساۋلىق ساقتاۋ سالاسىمەن قاتار عىلىمنىڭ دامۋىنا جول اشاتىن ورتالىق. جاڭا عيماراتتىڭ پايدالانۋعا بەرىلۋى كوپجىلدىق ەڭبەكتىڭ, سالاداعى دارىگەرلەر جەتىستىگىنىڭ ناتيجەسى دەپ بىلەمىز. ءبىز قازىر ونكولوگيالىق اۋرۋلار كۇردەلەنىپ بارا جاتقان كەزەڭدە ءومىر ءسۇرىپ جاتىرمىز. وسىنى ەسكەرسەك, اۋرۋدى ەمدەۋگە كەلگەندە پروفيلاكتيكا, دياگنوستيكاعا عىلىمي دالەلدەنگەن قاداممەن بارۋ كەرەك. ءبىز بۇگىن ونكولوگيالىق اۋرۋدى ەمدەپ قانا قويماي, ونكولوگياداعى عىلىمدى تەرەڭ زەرتتەپ, ءتۇسىنۋىمىز كەرەك. جاڭا ورتالىقتىڭ ميسسياسى دا جوعارى عىلىمدى, يننوۆاتسيا مەن وزىق تاجىريبەلەردى قاتەرلى ىسىكپەن كۇرەستە قولدانۋعا باعىتتالادى. مۇندا ەلىمىزدىڭ ەڭ ۇزدىك دەگەن ماماندارى جۇمىس ىستەيدى. اۋرۋدى دياگنوستيكالاۋ مەن ەمدەۋدىڭ جاڭا تاسىلدەرى ەنگىزىلەدى. باستىسى, وسى ورتالىقتا پاتسيەنتتەردىڭ, ولاردىڭ وتباسى مۇشەلەرىنىڭ مازداپ تۇرعان ءۇمىتى جانادى,– دەيدى كۇنسۇلۋ زاكاريا.
ورتالىقتاعى نەگىزگى تەحنولوگيالار قاتارىندا Varian ProBeam نەگىزىندەگى پروتوندىق تەراپيا, پەت/كت, پەت/مرت سىندى قاتەرلى ىسىكتى ەمدەيتىن, دياگنوستيكا جاساۋدا تاپتىرمايتىن سوڭعى ۇلگىدەگى وزىق قۇرالدار بار. جاڭا عيماراتتا حالىقارالىق قاۋىپسىزدىك ستاندارتتارىنا ساي اۋا تازارتۋ جانە راديواكتيۆتى قالدىقتاردى جويۋ جۇيەلەرىمەن جابدىقتالعان 8 مامانداندىرىلعان پالاتاسى بار راديونۋكليدتى تەراپيا ءبولىمى بولادى. سونىمەن قاتار راديوفارماتسەۆتيكالىق پرەپاراتتاردى وندىرۋگە ارنالعان تسيكلوتروندىق-وندىرىستىك كەشەن ىسكە قوسىلعان. جوسپار بويىنشا 11 ءتۇرلى پرەپارات شىعارىلسا, ونىڭ جەتەۋى ەلىمىزدە العاش رەت سينتەزدەلەدى. وسى يگىلىكتەردەن كەيىن وزىق ينفراقۇرىلىمى بار ۇلتتىق عىلىمي ونكولوگيا ورتالىعى ورتالىق ازياداعى جەتەكشى كلينيكالىق, عىلىمي جانە اكادەميالىق ورتالىققا اينالۋدى ماقسات ەتىپ وتىر.