الەمدەگى ەڭ ەرەكشە قان دونورى, اۋستراليالىق دجەيمس حارريسون 88 جاسىندا ومىردەن وزدى. ول وسى كۇنگە دەيىن 2,4 ميلليون نارەستەنىڭ ءومىرىن قۇتقارىپ قالعان.
دجەيمس حارريسوننىڭ سيرەك كەزدەسەتىن قان پلازماسى تەرىس رەزۋس-فاكتورلى جاڭا تۋعان سابيلەرگە ارنايى سارىسۋ جاساۋعا كومەكتەسىپ, 2,4 ميلليون نارەستەنىڭ ءومىرىن ساقتاۋعا سەبەپكەر بولعان.
ول 14 جاسىندا كۇردەلى وپەراتسيادان كەيىن قان قۇيۋدىڭ ادام ءومىرى ءۇشىن قانشالىقتى ماڭىزدى ەكەنىن ءتۇسىنىپ, 18 جاسىنان باستاپ 81 جاسىنا دەيىن ۇزدىكسىز دونور بولعان. دونور ءار ەكى اپتا سايىن پلازما تاپسىرىپ, بۇل سالادا الەمدىك رەكورد ورناتتى. ايتا كەتەرلىگى, حارريسوننىڭ قىزى مەن نەمەرەلەرى دە ونىڭ قانىنان جاسالعان سارىسۋدى قولدانعان. عالىمدار قانداعى ەرەكشە انتيدەنەلەردىڭ تابيعاتىن ءالى كۇنگە دەيىن تولىق زەرتتەپ ۇلگەرمەگەن. قازىرگى تاڭدا اۋستراليالىق زەرتتەۋشىلەر وسى سيرەك پلازمانىڭ زەرتحانالىق نۇسقاسىن جاساپ, بولاشاقتا جۇكتى ايەلدەرگە كومەكتەسۋدى جوسپارلاپ وتىر. اۋستراليادا حارريسون سياقتى ەرەكشە قان قۇرامى بار دونورلاردىڭ سانى 200-گە دە جەتپەيدى. بۇل كورسەتكىش وتە تومەن, سوندىقتان بولاشاقتا مۇنداي دونورلاردىڭ تاپشىلىعى دەنساۋلىق ساقتاۋ سالاسىندا ۇلكەن ماسەلەگە اينالۋى مۇمكىن.