بالالار حيرۋرگياسى, پەدياتريا, تراۆماتولوگيا, انەستەزيولوگيا سالالارىنىڭ نەگىزىن قالاعان مەديتسينا عىلىمدارىنىڭ دوكتورى, پروفەسسور, ۇعا اكادەميگى كامال ءسارۋار ۇلى ورمانتاەۆ باقيعا وزدى. بۇل ۇلتتىق مەديتسينانىڭ تۇتاس ءبىر ءداۋىرى كوشىپ بارا جاتقانداي اسەر قالدىردى...
عالىمنىڭ بالالار حيرۋرگياسىنىڭ, ونىڭ ىشىندە نارەستەلەر حيرۋرگياسىنىڭ نەگىزىن قالاۋعا سىڭىرگەن ەڭبەگى ولشەۋسىز. وسى سالادا العاشقى عىلىم دوكتورى اتانىپ, سالانى تاجىريبەدە عانا ەمەس, عىلىمي تۇرعىدا زەرتتەپ, وركەندەۋ جولىنا باعىتتاي ءبىلدى. نارەستەلەر حيرۋرگياسى تۇسىنىگىنىڭ قالىپتاسۋىنا ىقپال ەتكەن پروفەسسور بالالار حيرۋرگياسى كافەدراسىن جەكە ءبولىپ شىعارىپ, شاعىن ءبىر كۋرستىڭ ۇلكەن باعىتقا اينالۋىنا ايانباي تەر توكتى. پەدياتريا جانە بالالار حيرۋرگياسى عىلىمي ورتالىعى باسشىلىعىندا ۇيىمداستىرۋ ءىسى مەن تاجىريبەنى قاتار الا ءجۇرىپ, بىلىكتى شاكىرتتەر تاربيەلەدى. ۇستاز سالعان سۇرلەۋمەن كوپتەگەن شاكىرتى عىلىم سوقپاعىنا ءتۇستى. عىلىمي پەدياتر بالالار حيرۋرگياسى, انەستەزيولوگيا-رەانيماتولوگيا, ورتوپەد-تراۆماتولوگ مەكتەبىنىڭ نەگىزىن قالادى. ەگەمەندىك العان جىلداردان باستاپ مەديتسينا, سونىڭ ىشىندە بالالار حيرۋرگياسى ءىس-قاعازدارى مەن عىلىمىن مەملەكەتتىك تىلدە جۇرگىزۋگە بەلسەنە كىرىستى.
بارلىق سالادا جاقسى مامان بولىپ قالىپتاسۋ ءۇشىن بىلىكتى ۇستاز كەرەك. ال ۇستاز جاۋاپتى شاكىرت دايارلاۋدا زور جاۋاپكەرشىلىك جۇگىن ارقالايتىنى زاڭدىلىق. بۇگىندە وتاندىق سالا ماماندارىن الىس-جاقىن شەتەل – كامال ورمانتاەۆتىڭ شاكىرتتەرى رەتىندە تانيدى. ءوز ىسىندە اردان تايماعان, قولى التىن ارداقتى ۇستازدىڭ ارتىندا قالعان مول مۇراسى, ايتۋلى ەڭبەكتەرى ءالى دە ۇزاق جىل ۇلت مەديتسينا سالاسىنىڭ دامۋىنا ازىق بولاتىنى ءسوزسىز.
اسىلجان ەرەكەشوۆ,
«ۇلتتىق پەدياتريا جانە بالالار حيرۋرگياسى ورتالىعى» اق
باسقارما توراعاسىنىڭ ورىنباسارى