سەنات سپيكەرى ماۋلەن اشىمباەۆتىڭ توراعالىعىمەن بيۋرو ءوتتى. وندا دەپۋتاتتار 13 اقپاندا بولاتىن سەنات وتىرىسىنىڭ كۇن ءتارتىبىن بەكىتتى جانە پالاتانىڭ ءىس-شارالار جوسپارىن ىسكە اسىرۋ اياسىنداعى مىندەتتەردى تالقىلادى.
وتىرىستى اشقان ماۋلەن اشىمباەۆ مەملەكەت باسشىسى بيزنەس وكىلدەرىمەن كەزدەسۋ بارىسىندا سالىق رەفورماسىن جۇرگىزۋدە بىلىكتى ساراپشىلاردىڭ, كاسىپكەرلەر مەن دەپۋتاتتاردىڭ بىرلەسكەن جۇمىسى ايرىقشا ماڭىزعا يە ەكەنىن اتاپ وتكەنىنە نازار اۋداردى. وسىعان بايلانىستى سەنات توراعاسى بارلىق مۇددەلى تاراپتى پرەزيدەنتتىڭ تاپسىرمالارىن ىسكە اسىرۋدى زاڭنامالىق تۇرعىدان قامتاماسىز ەتۋ ءۇشىن بىرلەسىپ ءتيىمدى جۇمىس ىستەۋگە شاقىردى.
بيۋرودا سەناتورلار وسى اپتادا وتكىزىلەتىن ءىس-شارالاردى دا پىسىقتادى. سەنات كوميتەتتەرى مۇددەلى مەملەكەتتىك ورگاندار وكىلدەرىنىڭ قاتىسۋىمەن «تورەلىك تۋرالى» زاڭدى ىسكە اسىرۋعا جانە ونى ودان ءارى دامىتۋ پەرسپەكتيۆالارى», سونداي-اق اسكەري اۆياتسيانى دامىتۋ جانە ەلدىڭ اسكەري-اۋە كۇشتەرىنىڭ جاۋىنگەرلىك دايىندىعىن ارتتىرۋ ماسەلەلەرى جونىندە وتىرىستار وتكىزەدى.
زەينەتاقى اكتيۆتەرىن باسقارۋدىڭ تيىمدىلىگىن ارتتىرۋعا ارنالعان دوڭگەلەك ۇستەلدە وسى سالاداعى وزەكتى ماسەلەلەر مەن ناقتى ۇسىنىستار قارالىپ, تالقىلانادى.
سونىمەن قاتار «قازاقستان رەسپۋبليكاسىندا اۆتوموبيل جولدارىن سالۋ جانە پايدالانۋ: اعىمداعى جاي-كۇيى, وزەكتى ماسەلەلەرى مەن ولاردى شەشۋ جولدارى» تاقىرىبىمەن وتەتىن ۇكىمەت ساعاتىنا دايىندىق اياسىندا سەناتورلاردىڭ «قازاۆتوجول» ۇك» اق باسشىلىعىمەن كەزدەسۋى جوسپارلانعان.
الداعى بەيسەنبىدە وتەتىن سەنات وتىرىسىندا دەپۋتاتتار «تۇركىستان قالاسىنىڭ ەرەكشە مارتەبەسى تۋرالى» زاڭدى جانە وعان ىلەسپە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇركىستان قالاسىنىڭ ەرەكشە مارتەبەسى جانە شەتەلدەگى مادەنيەت ورتالىقتارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى قارايدى. اتالعان زاڭنىڭ ماقساتى – تۇركىستان قالاسىنىڭ قازاقستان رەسپۋبليكاسىنىڭ رۋحاني-مادەني جانە تاريحي ورتالىعى رەتىندەگى ەرەكشە مارتەبەسىن ايقىندايتىن قۇقىقتىق نەگىزدەردى رەتتەۋ. ناقتى ايتقاندا, تۇركىستان قالاسىنىڭ تاريحي ەسكەرتكىشتەرى مەن تاريحي-مادەني مۇرالارىن, ونىڭ ىشىندە قوجا احمەت ياساۋي كەسەنەسىنىڭ كۇزەت ايماقتارىندا ورنالاسقان تاريحي نىسانداردى باسقارۋدىڭ, ساقتاۋدىڭ, ولاردى ۇستاپ تۇرۋدىڭ ءتيىمدى جۇيەسىن قۇرۋ تەتىكتەرى ايقىندالادى. قۇجاتتاعى بىرقاتار نورما تاريحي-مادەني مۇرانى ساقتاۋعا, دامىتۋعا, جانداندىرۋعا جانە ۇلتتىق قولونەردى وركەندەتۋگە, سونداي-اق تۇركىستان قالاسىنىڭ حالىقارالىق ىنتىماقتاستىعىن ودان ءارى جانداندىرۋعا ارنالعان.
بۇعان قوسا بيۋرودا وسىعان دەيىن ماجىلىستەن كەلىپ تۇسكەن زاڭدار جۇمىس ءۇشىن سەناتتىڭ تۇراقتى كوميتەتتەرىنە ءبولىنىپ بەرىلدى.