مەملەكەتتىك كەڭەسشى ەرلان قاريننىڭ توراعالىعىمەن ىشكى ساياسات جانە يدەولوگيا جۇمىسىنا قاتىستى رەسپۋبليكالىق كەڭەس ءوتتى. باسقوسۋعا پرەزيدەنت اكىمشىلىگىنىڭ جاۋاپتى قىزمەتكەرلەرى مەن قۇرىلىمدىق بولىمشەلەرىنىڭ باسشىلارى, ۇكىمەت مۇشەلەرى, وبلىس جانە رەسپۋبليكالىق ماڭىزى بار قالا اكىمدەرىنىڭ ورىنباسارلارى, ايماقتارداعى قوعامدىق دامۋ باسقارمالارىنىڭ جەتەكشىلەرى قاتىستى.
ءىس-شارادا مەملەكەت باسشىسىنىڭ باستامالارىن ءتيىمدى جۇزەگە اسىرۋعا, ەتنوسارالىق جانە كونفەسسياارالىق كەلىسىمدى نىعايتۋعا, قوعامدىق بىرلەستىكتەرمەن جانە ساراپشىلار قاۋىمداستىعىمەن ءوزارا بايلانىسقا, اقپاراتتىق جانە جاستار ساياساتىنا قاتىستى ماسەلەلەر تالقىلاندى.
ەرلان قارين ءوز سوزىندە ىشكى ساياسات سالاسىنداعى جۇمىستى ۇيىمداستىرۋعا بايلانىستى ورتاق ۇستانىمدار مەن قاعيدالاردى بەلگىلەپ, اتالعان باعىتتاعى نەگىزگى باسىمدىقتار جونىندە ايتتى. سونداي-اق وسى جىلدىڭ باستى تاقىرىپتارى مەن كۇن تارتىبىنە نازار اۋداردى.
– مەملەكەت باسشىسىنىڭ باستاماسىمەن اسا ماڭىزدى ساياسي رەفورمالار جۇزەگە استى. قازىرگى ۋاقىتتا ەكونوميكانىڭ الەۋەتىن جان-جاقتى نىعايتۋعا باعىتتالعان اۋقىمدى جوبالار قولعا الىنىپ جاتىر. ەل دامۋىنىڭ جاڭا كەزەڭى ىشكى ساياساتتىڭ تاسىلدەرىن دە قايتا قاراۋدى تالاپ ەتەدى. سوندىقتان يدەولوگيا سالاسىنداعى نەگىزگى باسىمدىق قوعامداعى تۇراقتىلىق پەن ىنتىماقتى قامتاماسىز ەتۋمەن قاتار, جالپىۇلتتىق قۇندىلىقتاردى ورنىقتىرۋ جانە جاڭا قوعامدىق ەتيكانى قالىپتاستىرۋ جۇمىستارىنا بەرىلىپ وتىر. وسى سەبەپتى مەملەكەتتىڭ بۇگىنگى ساياساتى «زاڭ جانە ءتارتىپ» قاعيداسىن بەكىتۋگە, «تازا قازاقستان» يدەولوگياسىن ىلگەرىلەتۋگە باعىتتالعان. جالپى, ۇلتتىڭ جاڭا ساپاسىن قالىپتاستىرۋدى كوزدەيتىن تىڭ تاسىلدەردى ىزدەۋ جۇمىستارى ۇلتتىق قۇرىلتاي جانە باسقا دا الاڭدار اياسىندا ۇنەمى جۇرگىزىلىپ كەلەدى, – دەدى ە.قارين.
جيىن سوڭىندا مەملەكەتتىك كەڭەسشى جاۋاپتى مەملەكەتتىك ورگاندارعا ىشكى ساياسات سالاسىنداعى جۇمىستى پرواكتيۆتى رەجىمدە جۇزەگە اسىرۋ تۋرالى تاپسىرمالار بەردى.