پرەمەر-مينيستر ولجاس بەكتەنوۆتىڭ توراعالىعىمەن وتكەن كەڭەستە مەملەكەت باسشىسىنىڭ ۇكىمەتتىڭ كەڭەيتىلگەن وتىرىسىندا بەرگەن ەنەرگەتيكانى دامىتۋ جانە يادرولىق كلاستەر قۇرۋ جونىندەگى تاپسىرمالارىن جۇزەگە اسىرۋ بارىسى قارالدى.
پرەزيدەنتتىڭ ەلەكتر ەنەرگەتيكاسى ينفراقۇرىلىمىن قارقىندى دامىتۋ جانە قاجەتتى رەزەرۆتەر قۇرۋ جونىندەگى تاپسىرماسىن ەسكەرە وتىرىپ, 2025–2031 جىلدارعا ارنالعان ەلەكتر ەنەرگياسىنىڭ بولجامدى تەڭگەرىمى تىڭدالدى. ەلەكتر ەنەرگياسىن تۇتىنۋدىڭ ۇدايى وسۋىنە بايلانىستى جەكە ينۆەستيتسيالار ەسەبىنەن جۇمىس ىستەپ تۇرعان ەلەكتر ستانسالارىن جاڭعىرتۋ ارقىلى 2035 جىلعا دەيىن 26,5 گۆت دەڭگەيىندە جاڭا گەنەراتسياسى بار قۋاتتار قۇرىلىمى قاراستىرىلۋ كوزدەلگەن.
ەنەرگەتيكا ءمينيسترى الماسادام ساتقاليەۆ ءبىرىنشى اتوم ەلەكتر ستانساسىنىڭ قۇرىلىسى بويىنشا الەۋەتتى جەتكىزۋشىلەرمەن جۇرگىزىلگەن كەلىسسوزدەر تۋرالى باياندادى.
پرەمەر-مينيستر اەس سالۋ ماسەلەسىندە ەلىمىز ءۇشىن بارىنشا ەكونوميكالىق تيىمدىلىكتى قامتاماسىز ەتۋ قاجەت ەكەنىنە توقتالدى. جەتكىزۋشىنى تاڭداۋدا ەل ىشىندەگى قۇندىلىقتى ارتتىرۋعا, ءوندىرىستى لوكاليزاتسيالاۋعا جانە تەحنولوگيا ترانسفەرتىنە ءمان بەرۋ تاپسىرىلدى.
سونداي-اق اتوم عىلىمىن, سالا ماماندارىن دايارلاۋ بويىنشا ءبىلىم بەرۋ باعدارلامالارىن دامىتۋدىڭ كەلەشەگىن تالقىلادى. «قازاقستان اتوم ەلەكتر ستانتسيالارى» جشس باسشىسى تيمۋر جانتيكين, ۇلتتىق يادرولىق ورتالىعىنىڭ باسشىسى ەرلان باتىربەكوۆ, يادرولىق فيزيكا ينستيتۋتىنىڭ باسشىسى سايابەك ساحيەۆ ساراپتامالىق كوزقاراستارىن ورتاعا سالدى.