بيىلعى جۇمىسشى ماماندىقتارى جىلى اياسىندا ەلورداداعى كاسىپتىك-تەحنيكالىق كوللەدجدە اشىق ەسىك كۇنى ءوتتى. وندا اتالعان ءبىلىم مەكەمەسى مەن قالاداعى ءىرى جۇمىس بەرۋشى كاسىپورىندار اراسىنداعى ىنتىماقتاستىقتى نىعايتۋ تۋرالى ءسوز بولدى.
كاسىپتىك-تەحنيكالىق كوللەدجى 16 جىلدان بەرى ەلەكتر جانە گازبەن دانەكەرلەۋشى, توكار, جول-قۇرىلىس ءماشينيسى, تەحنيك-مەحانيك, ەلەكتر مامانى, جالپى قۇرىلىس شەبەرى, سونداي-اق اۆتوكولىك جوندەۋ سلەسارى, جابدىقتاردى رەتتەۋشى, كران ءماشينيسى سياقتى سۇرانىسقا يە مامانداردى دايارلايدى.
ءىس-شارا بارىسىندا ءبىلىم مەكەمەسىنىڭ «الكون+» جانە «استانا تازالىق» جشس سياقتى كاسىپورىندارمەن ىنتىماقتاستىعىنا باسا نازار اۋدارىلدى. الدىمەن كومپانيا وكىلدەرى جاستارعا وزدەرىنىڭ قىزمەتى تۋرالى باياندادى. سونىمەن بىرگە تەوريالىق ءبىلىمدى وندىرىستىك تاجىريبەمەن ۇشتاستىراتىن دۋالدى وقىتۋدىڭ ماڭىزىنا توقتالدى.
ايتالىق, «الكون+» كومپانياسى – باس شاھارداعى قاسبەتتىك ديزاين سالاسىنا ماماندانعان ىرگەلى كاسىپورىننىڭ ءبىرى. قۇرىلىس سالاسىندا ايتارلىقتاي جەتىستىككە قول جەتكىزگەن. بۇگىنگە دەيىن ءبىراز ستۋدەنت وسى كاسىپورىندا تاجىريبەدەن ءوتىپ, ءوز ماماندىقتارىنىڭ قىر-سىرىن ۇيرەنگەن. كومپانيانىڭ باس ديرەكتورى بەيسەن جولبولديەۆ اتالعان وقۋ ورنىمەن اراداعى تىعىز بايلانىس بىرنەشە جىلدان بەرى جالعاسىپ كەلە جاتقانىن ايتتى.
«شىنىندا دا, دۋالدى وقىتۋدىڭ ماڭىزى ەرەكشە. ويتكەنى ستۋدەنتتەر ۋاقىتىنىڭ 65 پايىزعا جۋىعىن وندىرىستە وتكىزەدى. بۇل تەوريالىق ءبىلىمدى دامىتىپ, جاستارعا قىزمەت جولىندا جەتىستىككە جەتۋگە مۇمكىندىك بەرەدى. ءبىز جاس مامانداردى جۇمىسقا تارتۋعا مۇددەلىمىز. ولارعا تەك تاجىريبەدەن وتۋگە عانا ەمەس, وقۋىن اياقتاعاننان كەيىن جۇمىس ورنىن ۇسىنۋعا دا دايىنبىز», دەدى ول.
سونداي-اق «استانا تازالىق» كاسىپورنى دا كوللەدجبەن وتە جاقىن بايلانىستا. كومپانيانىڭ HR مەنەدجەرى سىمبات حاكىموۆا ستۋدەنتتەر سانىن شەكتەمەي, ولاردى كەز كەلگەن ۋاقىتتا تاجىريبەدەن وتكىزۋگە دايىن ەكەنىن جەتكىزدى.
مازمۇندى ءىس-شارا سوڭىندا وندىرىستىك تاجىريبەدە ۇزدىك ناتيجە كورسەتكەن ستۋدەنتتەرگە العىسحات تابىس ەتىلدى.
قايسار قۇسايىن