رەسمي ستاتيستيكاعا سۇيەنسەك, جۇمىسسىزداردىڭ كوپشىلىگى – 20–29 جاس ارالىعىنداعى ازاماتتار. ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەگى بويىنشا, حالىقتى جۇمىسپەن قامتۋ ورتالىقتارىندا جۇمىس ىزدەپ جۇرگەن 68,4 مىڭ ادام تىركەلگەن.
كەيبىر جاستار العان ءبىلىمىن تاجىريبەدە قولدانا الماي, ۋاقىتشا جۇمىس ىزدەۋگە ءماجبۇر. ءتىپتى جوعارى جالاقى مەن جايلى ورىن ىزدەپ, شەتەل اساتىندار دا از ەمەس. وسى ماسەلەگە قاتىستى وڭىرلەردە قانداي جۇمىس اتقارىلىپ جاتقانىن جاڭاقورعان اۋداندىق مانساپ ورتالىعىنىڭ ديرەكتورى جاڭابەك تۇرلىبەكوۆتەن سۇراپ بىلگەن ەدىك.
«قازىرگى تاڭدا جاستار اراسىنداعى جۇمىسسىزدىق دەڭگەيى 4,6%-دى قۇراپ وتىر. 2024 جىلى اۋداندىق مانساپ ورتالىعىنا 1 190 ادام تىركەلدى, ولاردىڭ 563-ءى تۇراقتى جۇمىسقا ورنالاستى, 357 ادام جاستار تاجىريبەسىنە قاتىستى. جالپى, كەيىنگى جىلدارى جاستاردى جۇمىسپەن قامتۋ دەڭگەيى ارتىپ كەلەدى», دەيدى ج.تۇرلىبەكوۆ.
جۇمىسقا ورنالاسۋداعى قيىندىقتىڭ ءبىرى – جاستاردىڭ جۇمىس تاجىريبەسىنىڭ جوقتىعى. بۇل ماسەلەگە قاتىستى مەملەكەت بىرقاتار باعدارلاما ازىرلەدى. ولاردىڭ ىشىندە جاستار تاجىريبەسى, «ديپلوممەن – اۋىلعا» باعدارلاماسى, جاڭا بيزنەس يدەيالاردى ىسكە اسىرۋعا ارنالعان مەملەكەتتىك گرانتتار بار. جالپى, جاستاردىڭ ماماندىق تاڭداۋى مەن ەڭبەك نارىعىنداعى سۇرانىس اراسىندا سايكەسسىزدىك كوپ.
قازىردە شەتەلدەردە جۇمىس ىستەۋگە قىزىعۋشىلار جەتكىلىكتى. جاقىندا عانا كورەيادا جۇمىس ىستەپ كەلگەن ماتەماتيكا ءپانىنىڭ مۇعالىمى باقىتجان عالادين ۇلى شەتەلدە جۇمىس ىستەۋ, تابىس تابۋدىڭ ەرەكشەلىكتەرىن ايتا كەلىپ: «كورەيادا جۇمىس جۇيەسى ادام قۇندىلىعىنا نەگىزدەلگەن. بارلىق جۇمىسشىلارعا بىردەي جاعداي جاسالعان. سونداي-اق شەتەلدە ازىق-ت ۇلىك باعاسى جوعارى بولعانىمەن, باعا تۇراقتى. بۇل دا بولسا جاستاردىڭ جاعدايىن جاقسارتۋعا سەپتىگىن تيگىزەدى», دەيدى.
قالاي دەگەندە دە, ەڭبەك نارىعىندا بىلىكتى مامانعا سۇرانىس ارتقانىمەن, جۇمىسسىز جاستار سانى ازايماي وتىر. كاسىپ بار, بىراق جۇمىسسىزدار دا جەتىپ ارتىلادى. جىل سايىن شامامەن 250 مىڭداي جاس مامان ۇلكەن ەڭبەك جولىن باستايدى. بىراق كاسىبي ءبىلىمى بولعانىنا قاراماستان, ولاردىڭ بارلىعى بىردەي جۇمىس تابا بەرمەيدى. قازىردە جاستار جۇمىسسىزدىعى ماسەلەسىن شەشۋ باعىتىندا جۇمىسقا ورنالاستىرۋدىڭ ماقساتتى شارالارى جۇزەگە اسىرىلىپ جاتىر. بۇل ءىس-شارالار جاستارعا العاشقى جۇمىس تاجىريبەسىن الۋعا, ەڭبەك نارىعىنا بەيىمدەلۋگە كومەكتەسەدى دەپ سەنەمىز.
اسەل ماۋلەن,
ق.ا.ياساۋي ۋنيۆەرسيتەتىنىڭ ستۋدەنتى