پرەمەر-مينيستر ولجاس بەكتەنوۆ الماتىدا وتكەن ەۋرازيالىق ۇكىمەتارالىق كەڭەس وتىرىسىندا ەاەو-عا قاتىسۋشى ەلدەر ۇكىمەتتەرىنىڭ باسشىلارىمەن وداق شەڭبەرىندەگى ءوزارا ءىس-قيمىلدىڭ نەگىزگى اسپەكتىلەرى مەن ىنتىماقتاستىقتىڭ كەلەشەگىن تالقىلادى. وندا كەدەرگىسىز ساۋدانى دامىتۋ, ىسكەرلىك احۋالدى قالىپتاستىرۋ, تۋريستىك الەۋەتتى اشۋ ماسەلەلەرى قارالدى.
وتىرىسقا ەۋرازيالىق ەكونوميكالىق وداققا مۇشە مەملەكەتتەر دەلەگاتسيالارىنىڭ باسشىلارى: بەلارۋس رەسپۋبليكاسىنىڭ پرەمەر-ءمينيسترى رومان گولوۆچەنكو, قىرعىز رەسپۋبليكاسى مينيسترلەر كابينەتىنىڭ توراعاسى – پرەزيدەنت اكىمشىلىگىنىڭ باسشىسى ادىلبەك قاسىماليەۆ, رەسەي فەدەراتسياسى ۇكىمەتىنىڭ توراعاسى ميحايل ميشۋستين, ارمەنيا رەسپۋبليكاسىنىڭ ۆيتسە-پرەمەرى مگەر گريگوريان; ەاەو باقىلاۋشى ەلدەرى دەلەگاتسيالارىنىڭ باسشىلارى: يران يسلام رەسپۋبليكاسىنىڭ ءبىرىنشى ۆيتسە-پرەزيدەنتى ارەف موحامماد-رەزا; وزبەكستان رەسپۋبليكاسىنىڭ پرەمەر-ءمينيسترى ابدۋللا اريپوۆ, ازەربايجان پرەمەر-ءمينيسترى ءالي يدايات وعلى اسادوۆ, ەەك القاسىنىڭ توراعاسى باقىتجان ساعىنتاەۆ قاتىستى.
ولجاس بەكتەنوۆ ءوز سوزىندە وداق ەلدەرى اراسىنداعى ساۋدانى دامىتۋ مەن ەكونوميكالىق ينتەگراتسيانىڭ ماڭىزدىلىعىنا ەرەكشە نازار اۋداردى.
«قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ ەۋرازيالىق ەكونوميكالىق وداق ەكونوميكالىق ينتەگراتسيا جانە ءوزارا ساۋدا-ساتتىقتى دامىتۋ ۇدەرىسى تابىستى جۇزەگە اسىرىپ جاتقان اسا ماڭىزدى الاڭداردىڭ ءبىرى رەتىندە ءوزىنىڭ تيىمدىلىگىن دالەلدەگەنىن اتاپ كورسەتتى. سونىمەن قاتار ۇلتتىق دەڭگەيدە, سونداي-اق ەاەو شەڭبەرىندە سىرتقى جاعدايلارعا ءتيىمدى بەيىمدەلۋ مۇمكىندىگى ءبىزدىڭ ەكونوميكالارىمىزدىڭ باسەكەگە قابىلەتتىلىگىن قامتاماسىز ەتۋدىڭ نەگىزگى فاكتورىنا اينالادى», دەپ اتاپ ءوتتى و.بەكتەنوۆ.
وسى ورايدا قازاقستان تاراپى وداق شەڭبەرىندە بىرلەسكەن جۇمىستىڭ بىرقاتار باسىم باعىتىن اتاپ ءوتتى. بۇگىنگى تاڭدا ەاەو قۇقىقتىق جۇيەسى ەكونوميكالىق بىرلەستىككە مۇشە ەلدەرگە بەلگىلى ءبىر ونىمدەردى اكەلۋگە ۋاقىتشا ۆەتەرينارلىق جانە فيتوسانيتارلىق شارالاردى ەنگىزۋگە مۇمكىندىك بەرەدى. مۇنداي شارالاردى قولدانۋ شەكتەۋ بەلگىلەگەن مەملەكەت اۋماعى ارقىلى ترانزيتكە توسقاۋىل قويادى, سول ارقىلى مەجەلى ەلگە كىرۋگە تىيىم سالىنادى. ساۋدا قاتىناستارىندا كەدەرگىسىز ورتا قۇرۋدىڭ ماڭىزدى ەكەنى باسا ايتىلدى.
قازاقستان پرەمەر-ءمينيسترى ورنىقتى ەكونوميكالىق ءوسۋدى قامتاماسىز ەتۋ ءۇشىن قولايلى بيزنەس-ورتا قالىپتاستىرۋدىڭ ماڭىزدىلىعىنا توقتالدى. بۇگىنگى تاڭدا وداق اۋماعىندا رەتتەۋشى جانە ناقتى اسەرلەردى باعالاۋ تەتىگى جۇمىس ىستەيدى. كاسىپكەرلىك قىزمەتتى جۇرگىزۋ جاعدايىن جاقسارتۋ ءۇشىن بىرلەستىك شەڭبەرىندە حالىقارالىق شارتتارعا ناقتى اسەردى باعالاۋ تەتىگىن قولدانۋدى كەڭەيتۋ ۇسىنىلدى.
سونداي-اق تۋريستىك سالاداعى ىنتىماقتاستىقتىڭ كەلەشەگىنە نازار اۋدارىلدى. تانىمال باعىتتار مەن كورىكتى جەرلەر تۋرالى بىرىڭعاي اقپاراتتىق رەسۋرس قۇرۋ بويىنشا جۇمىستى كۇشەيتۋ جونىندە ۇسىنىس ەنگىزىلدى.
وتىرىس قورىتىندىسى بويىنشا قاتىسۋشىلار ەاەو-نىڭ ەكونوميكالىق الەۋەتىن نىعايتۋعا, ىسكەرلىك احۋالدى جاقسارتۋعا جانە بىرلەسكەن جوبالاردى ىسكە اسىرۋعا باعىتتالعان بىرقاتار قۇجاتتارعا قول قويدى.