كەشەدەن بەرى استانادا اق بوران. اۋلانى, جولدى قار باسىپ, ءجۇرىس-تۇرىس قيىنداي ءتۇستى. قار تازالاۋشىلار تاڭنان بەرى تىنىمسىز جۇمىس ىستەپ جاتقاندا, «Yarbo» كومپانياسى قار تازالاۋشى روبوتىن تانىستىرىپ ۇلگەردى.
«Snow Blower S1 Plus – Yarbo» كومپانياسىنىڭ قار تازالاۋ جۇمىسىن جەڭىلدەتۋگە ارنالعان زاماناۋي تەحنولوگياسى. بۇل روبوت 40 سانتيمەترگە دەيىنگى قالىڭ قاردى تازالاپ, 3 تونناعا دەيىن قار شىعارا الادى. ونىڭ 180 گرادۋسقا بۇرىلاتىن قوندىرعىسى بار. روبوت «Yarbo» قوسىمشاسى ارقىلى اۋلانىڭ كارتاسىن جاساپ, تازالاۋ جوسپارىن قۇرادى. ول ءوز جۇمىسىن اۆتوماتتى تۇردە اتقارادى. قار تازالاۋشىلاردىڭ قازىرگى قاربالاس جۇمىسىن ەسكەرسەك, مۇنداي روبوتتار اسا قاجەت.
دنق-نانوقۇرىلعى
عالىمدار جاسۋشانىڭ ءپىشىنى مەن وتكىزگىشتىگىن وزگەرتە الاتىن دنق-نانوقۇرىلعى ويلاپ تاپتى.
بۇل قۇرىلعىلار جاسۋشا مەمبراناسىندا ارنايى ارنالار جاساپ, ۇلكەن مولەكۋلالاردىڭ, مىسالى, دارىلىك زاتتاردىڭ, جاسۋشاعا وتۋىنە مۇمكىندىك بەرەدى. ەڭ باستىسى – بۇل ارنالاردى قاجەت كەزدە اشىپ نەمەسە جاۋىپ قويۋعا بولادى. بۇل قۇرىلعىلار دنق-ورام (دنق-وريگامي) تەحنولوگياسى ارقىلى جاسالعان. ياعني دنق تىزبەكتەرى ارنايى قۇرىلىمدارعا جيناقتالىپ, ءپىشىنىن وزگەرتۋ جانە اينالاسىنداعى جاسۋشالارعا اسەر ەتۋ قابىلەتىنە يە. بۇل تەحنولوگيا دارىلەردى جاسۋشالارعا جەتكىزۋدىڭ جاڭا ادىستەرىن جاساپ, بولاشاق مەديتسينادا ۇلكەن ماڭىزعا يە بولماق.
ادامنىڭ تسيفرلىق نۇسقاسىن جاسايتىن جي
ستەنفورد ۋنيۆەرسيتەتى مەن «Google DeepMind» عالىمدارى جاساندى ينتەللەكتىنىڭ ادامنىڭ تسيفرلىق نۇسقاسىن جاساۋ تەحنولوگياسىن تانىستىردى.
بۇل جۇيە ەكى ساعاتتىق اڭگىمەدەن سوڭ ادامنىڭ مىنەز-قۇلقى مەن ويلاۋ ەرەكشەلىكتەرىن 85% دالدىكپەن قايتالاي الادى. جي ونىڭ ءبىلىمى مەن ينتەللەكتىن عانا ەمەس, سونىمەن قاتار مادەني, پسيحولوگيالىق, الەۋمەتتىك رەاكتسيالارىن دا دالمە-ءدال كوشىرەدى. مۇنداي تەحنولوگيانى زەرتتەۋلەردە, بيزنەستە, ساياساتتا قولدانۋعا بولادى. دەگەنمەن, ماماندار ەتيكا ەرەجەلەرىن بۇزباۋ ماڭىزدى ەكەنىن ەسكەرتىپ وتىر.