شىعىس قازاقستان وبلىسىنداعى ريددەر قالاسىندا دەمالىستا بولعان رەسەي اسكەري-اۋە اكادەمياسىنىڭ كۋرسانتى اسەت ساكەنوۆ ءورت كەزىندە ادام ءومىرىن قۇتقارىپ قالدى, دەپ حابارلايدى Egemen.kz.
قاڭتار ايىنىڭ باسىندا قالاداعى كوپقاباتتى ۇيلەردىڭ ءبىرىنىڭ بەسىنشى قاباتىنداعى پاتەردە ءورت بولعان. ءۇيدىڭ بالكونىنان ءتۇتىندى بايقاعان اسەت قۇتقارۋ قىزمەتىنە قوڭىراۋ شالىپ, ءوزى سول جەرگە جۇگىرە جونەلدى.
بەسىنشى قاباتقا كوتەرىلگەن ول ورتەنىپ جاتقان پاتەردى تاۋىپ, ەسىكتى اشتى. ىشكە تىزەرلەپ ەنگەن اسەت بولمەلەردىڭ بىرىنەن ەر ادامنىڭ سۇلباسىن بايقادى. العاشىندا ول اۋا جەتىسپەي, كوزى اشىعاندىقتان الگى ادامعا جەتە الماعان. سىرتقا شىعىپ, كورشىلەردەن قولشام الىپ, قايتادان جانىپ جاتقان پاتەرگە كىردى. ءسويتىپ ول ەر ادامدى سىرتقا الىپ شىقتى.
ءوز ءومىرىن قاتەرگە تىككەن ەرجۇرەك جىگىتتىڭ كىم ەكەنى ەكى كۇننەن كەيىن بەلگىلىى بولدى. ول – ريددەر تۋماسى, پروفەسسور ن. ە. جۋكوۆسكي جانە يۋ. ا. گاگارين اتىنداعى اسكەري-اۋە اكادەمياسىنىڭ بەسىنشى كۋرس كۋرسانتى (ۆورونەج ق.) اسەت ساكەنوۆ بولىپ شىقتى.
ۆورونەجگە جول ءجۇرۋدىڭ الدىندا شىعىس قازاقستان وبلىسى قورعانىس ىستەرى جونىندەگى دەپارتامەنتى باستىعىنىڭ ورىنباسارى مايور جاسۇلان ساتبالديەۆ ونى العىس حاتپەن ماراپاتتادى. ال جەرگىلىكتى اكىمدىك اسەتتىڭ اناسىنا تەلەديدار, ال باتىردىڭ وزىنە العىس حات تابىس ەتتى.
«اسەت – ناعىز قاھارمان. ول ەش ويلانباستان ءوز ءومىرىن قاتەرگە تىگىپ, جالىن ىشىندە قالعان ادامدى قۇتقارىپ قالۋعا اسىقتى. بۇل ناعىز ەرجۇرەكتىك پەن ادامگەرشىلىكتىڭ كورىنىسى», دەپ اتاپ ءوتتى ج.ساتبالديەۆ.
سونداي-اق دەپارتامەنت وكىلى جارتى جىلدان كەيىن كۋرسانت لەيتەنانت اتاعىن الاتىنىن اتاپ ءوتتى. وقۋدى اياقتاعاننان كەيىن اسەت ساكەنوۆ ۇشقىشسىز ۇشۋ كەشەندەرىن قولدانۋ جانە پايدالانۋ جونىندەگى مامان رەتىندە قازاقستان ارمياسىندا قىزمەتىن جالعاستىرادى.