اتىراۋ. 1 مامىر. اتىراۋلىقتار قازاقستان حالقىنىڭ بىرلىگى كۇنى مەرەكەسىن وبلىس ورتالىعىنداعى يساتاي مەن ماحامبەت باتىرلار ەسكەرتكىشى بوي كوتەرگەن الاڭدا اتاپ ءوتتى. بۇل تۋرالى egemen.kz ءتىلشىسى حابارلادى.
جۇرتشىلىق ەرتەسىمەن اتالعان الاڭعا قاراي توپ-توبىمەن اعىلدى. ۇلتتىق كيىمدەرىن كيىپ, ءبىر-بىرىمەن قول الىسىپ, ءتوس قاعىستىرعان ءتۇرلى ەتنوس وكىلدەرى بارشا حالىقتى ايتۋلى مەرەكەمەن قۇتتىقتاپ جاتتى. ايتقانداي, وڭىردە 17 ەتنومادەني بىرلەستىك وكىلدەرى تاتۋلىق پەن تۇراقتىلىقتى, دوستىق پەن بىرلىكتى نىعايتۋعا لايىقتى ۇلەسىن قوسىپ كەلەدى.
الاڭعا جينالعان جۇرتشىلىقتى وبلىس اكىمى باقتىقوجا ىزمۇحامبەتوۆ قۇتتىقتاپ, ەل بىرلىگىنىڭ ماڭىزىنا كەڭىنەن توقتالدى. ءوڭىردىڭ ءبىر توپ سوعىس جانە ەڭبەك ارداگەرىنە مەملەكەتتىك ماراپاتتار تاپسىردى. سونىمەن بىرگە, ەل بىرلىگىن نىعايتۋ, بەيبىتشىلىك پەن كەلىسىمدى ساقتاۋ جانە رۋحاني مادەنيەتتى دامىتۋعا قوسقان ۇلەسى ءۇشىن «بىرلىك» التىن مەدالىنە «تاتۋلىك» تاتار-باشقۇرت ەتنومادەني بىرلەستىگىنىڭ جەتەكشىسى گۇلسينا بايكەنوۆا مەن «اليا» ەۆرەي ەتنومادەني بىرلەستىگىنىڭ جەتەكشىسى پاۆەل تكاچ يە بولدى.
«ءبىزدىڭ ەلىمىز تاۋەلسىزدىگىن العالى بەرى كوپتەگەن جەتىستىككە قول جەتكىزدى. قازىرگى تاڭدا الەۋمەتتىك-ەكونوميكالىق جاعدايىمىز جاقسارا ءتۇستى. ەلىمىزدەگى بارلىق ەتنوس وكىلدەرى ءبىر-بىرىمەن تاتۋ, ءوز ءتىلىن, مادەنيەتىن دامىتۋعا مۇمكىندىك الدى. سونداي-اق, ءبارى دە مەملەكەتتىك ءتىلدى قۇرمەتتەيدى. ەلدەگى تاتۋلىقتىڭ نىعايعانى بيىلعى پرەزيدەنت سايلاۋىندا جانە ءبىر رەت دالەلدەندى», – دەيدى «تاتۋلىك» تاتار-باشقۇرت ەتنومادەني بىرلەستىگىنىڭ جەتەكشىسى گۇلسينا بايكەنوۆا (سۋرەتتە).
بۇل كۇنى ەتنومادەني بىرلەستىكتەردىڭ مۇشەلەرى اۋەلەتە ءان سالدى, مىڭ بۇرالا بي بيلەدى. ولار تەك ءوز تىلدەرىندە عانا ەمەس, قازاق اندەرىن دە شىرقادى.
جولداسبەك شوپەعۇل.
دەرەك:egemen.kz.
سۋرەت: راحىم قويلىباەۆ.