اگرارلىق ۋنيۆەرسيتەتتە اۋىلشارۋاشىلىعى دروندارىن زەرتتەۋ ورتالىعى اشىلدى

سالتاناتتى شارا بارىسىندا ۋنيۆەرسيتەتىنىڭ باسقارما توراعاسى-رەكتور, پرەزيدەنت جانىنداعى ۇلتتىق عىلىم اكادەمياسىنىڭ پرەزيدەنتى, اكادەميك اقىلبەك كۇرىشباەۆ: «مەملەكەت باسشىسى قاسىم-جومارت توقاەۆ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىندا ەلىمىزدەگى وزەكتى ماسەلەنىڭ ءبىرى – سۋ شارۋاشىلىعى سالاسىنا قاجەتتى گيدروتەحنيكتەر, گيدروتەحنيكالىق ينجەنەر-قۇرىلىسشىلار, گيدروگەولوگتار, گلياتسيولوگتار سياقتى بىلىكتى كادرلار دايارلاۋ مىندەتىن العا قويعان بولاتىن. وسىعان وراي, قازاق ۇلتتىق اگرارلىق زەرتتەۋ ۋنيۆەرسيتەتىندە 2024-2025 وقۋ جىلىندا نارىقتا سۇرانىسقا يە ماماندار دايارلاۋ ماقساتىندا «سۋ رەسۋرستارى جانە IT تەحنولوگياسى» فاكۋلتەتى قۇرىلدى. فاكۋلتەت سۋ رەسۋرستارىنىڭ وزىق تەحنولوگيالارىن پايدالانا وتىرىپ, سۋ رەسۋرستارىن ءتيىمدى باسقارۋدى, ساندىق تەحنولوگيالاردى يگەرگەن الەمدىك دەڭگەيدەگى بىلىكتى مامانداردى دايارلاۋعا كەڭىنەن جول اشادى. قازۇازۋ ەلىمىزدەگى اگروونەركاسىپتىك سەكتوردى دامىتۋ جانە بىلىكتى ماماندار دايارلاۋ جۇمىستارىن ءساتتى جالعاستىرا وتىرىپ, قىتاي اگرارلىق ۋنيۆەرسيتەتىمەن جانە EAVISION كومپانياسىمەن بىرلەسىپ, بىرەگەي جوبا – «قازاقستان-قىتاي اۋىلشارۋاشىلىعى دروندارىن زەرتتەۋ جانە وقىتۋ ورتالىعىن» اشىپ وتىر. بۇل ورتالىقتىڭ باستى ماقساتى – زاماناۋي درون مودەلدەرىمەن جانە ترەناجەرلارمەن جابدىقتالعان ۇشقىشسىز ۇشاتىن اپپاراتتاردى باسقارا الاتىن, ولاردى اۋىل شارۋاشىلىعىنىڭ ءتۇرلى سالالارىن دامىتۋعا ءتيىمدى قولدانا وتىرىپ, پراكتيكالىق ماسەلەلەردى شەشۋدە, مونيتورينگ, كارتا جاساۋ, قورشاعان ورتانى زەرتتەۋ جانە اۋىل شارۋاشىلىعىنا قاتىستى باسقا دا تاپسىرمالاردى جۇزەگە اسىرا الاتىن بىلىكتى ماماندار دايىنداۋ» دەپ اتاپ ءوتتى.

قازاق ۇلتتىق اگرارلىق زەرتتەۋ ۋنيۆەرسيتەتى قىتايدىڭ 40-تان استام ۋنيۆەرسيتەتتەرىمەن, عىلىمي زەرتتەۋ ۇيىمدارىمەن جانە كومپانيالارىمەن بەلسەندى ىنتىماقتاسا وتىرىپ, سۋ شارۋاشىلىعى, ورمان شارۋاشىلىعى اگرونوميا, ۆەتەريناريا, زووينجەنەرلەر, ازىق-ت ۇلىك قاۋىپسىزدىگىنىڭ تەحنولوگتارى, جەر كاداسترى ماماندارىن دايىندايتىن ءتۇرلى حالىقارالىق ورتالىقتار مەن زەرتحانالار اشىلدى.

بيىل تامىز ايىندا  ۋنيۆەرسيتەتتە «تاشكەنت يرريگاتسيا جانە اۋىلشارۋاشىلىعىن مەحانيكالاندىرۋ ينجەنەرلەرى ينستيتۋتى» ۇلتتىق زەرتتەۋ ۋنيۆەرسيتەتىنىڭ فيليالى اشىلىپ, 31 ستۋدەنت وقۋدى باستاپ كەتكەن بولاتىن.  مۇنىمەن قوسا اقش-تىڭ جەتەكشى وقۋ ورنى نەبراسكا لينكولن ۋنيۆەرسيتەتىمەن بىرلەسىپ, ءوزارا ءتيىمدى ارىپتەستىكتى دامىتۋ اياسىندا «ەxtension services ورتالىعى» قۇرىلىپ, ەلىمىز فەرمەرلەرى اراسىندا جاڭا تەحنولوگيالار مەن عىلىمي ازىرلەمەلەردى ۇسىنۋ جانە تاراتۋ جونىندەگى ىنتىماقتاستىق جوبالارى قولعا الىنعان ەدى. سونداي اق «Dayu Irrigation Group» كومپانياسىمەن بىرلەسىپ, سۋ رەسۋرستارىن اقىلدى باسقارۋ ءۇشىن «قازاقستان-قىتاي سۋ ۇنەمدەۋدى تسيفرلى باسقارۋ» زەرتحاناسى قۇرىلدى. «DAYU irrigation Group» كومپانياسى, سۋدى ولشەيتىن قۇرالدار مەن زەرتحانالىق جابدىقتاردى جەتكىزۋگە 1 ميلليون دوللاردان استام ينۆەستيتسيا سالدى. ناتيجەسىندە الماتى وبلىسىنداعى شەلەك وزەنىندە سۋدى ساندىق ەسەپتەۋ تەحنولوگيالارى ەنگىزىلىپ, سۋارۋدىڭ ءتۇرلى تەحنولوگيالارى قولدانىستا. ال لانچجوۋ ۋنيۆەرسيتەتىمەن  بىرلەسىپ اشىلعان «قازاقستان-قىتاي اقىلدى اۋىل شارۋاشىلىعى» ورتالىعىندا 3  عىلىمي زەرتحانا جانە 3 پلاتفورما قۇرىلىپ جاتىر.

ورتالىقتىڭ اشىلۋى بارىسىندا EAVISION كومپانياسىنىڭ ديرەكتورى تسزاي حوي ۋنيۆەرسيتەت ۇجىمىنا ميكرواۆتوبۋستىڭ كىلتىن تابىس ەتتى.

الماتى