قازاقستان كاسىپوداقتارى فەدەراتسياسى ەلىمىزدەگى ەڭ ءىرى ۇيىمداردىڭ ءبىرى سانالادى. ونىڭ قۇرامىندا 2 ميلليونعا جۋىق مۇشە بار ەكەنىن ەسكەرسەك, ۇيىمنىڭ جۇمىسى تۋرالى كوپشىلىك كوكەيىندە ساۋالدار تۋىندايتىنى دا زاڭدىلىق. مىنە, سول ساۋالدارعا جاۋاپ بەرۋ ءۇشىن كەشە ورتالىق كوممۋنيكاتسيالار قىزمەتىندە «قازاقستان كاسىپوداقتارى فەدەراتسياسىنىڭ 2014 جىلعى قورىتىندىلارى جانە 2015 جىلدىڭ ماقساتتارى» اتتى ارنايى بريفينگ ءوتكىزىلدى.
ەلباسى ەڭبەك زاڭدىلىعىنىڭ ساقتالۋىندا كاسىپوداقتار ءرولىنە ەرەكشە ماڭىز بەرىپ كەلەدى. وسىعان وراي وتكەن جىلى «كاسىبي وداقتار تۋرالى» زاڭ قابىلدانىپ, فەدەراتسيا جۇمىسىن وڭتايلاندىرۋ قولعا الىنعانى بەلگىلى.
سودان بەرى اتقارىلعان جۇمىستاردىڭ بارىسىن اڭگىمەلەپ بەرۋ ءۇشىن كەشە قازاقستان كاسىپوداقتارى فەدەراتسياسىنىڭ توراعاسى ابىلعازى قۇسايىنوۆ باستاعان قۇرامىندا تاۋ-كەن ءوندىرىسى ەڭبەككەرلەرى كاسىپوداعىنىڭ توراعاسى اسىلبەك نۇرالين, كومىر ءوندىرىسى ەڭبەككەرلەرى كاسىپوداعىنىڭ توراعاسى ميحايل نيكيفوروۆ, مۇناي-گاز كەشەنى ءوندىرىسى ەڭبەككەرلەرى كاسىپوداعى توراعاسىنىڭ ورىنباسارى ەلەنا مۇستافينا جانە قازاقستان كاسىپوداقتارى فەدەراتسياسى قۇقىق جونىندەگى دەپارتامەنت ديرەكتورىنىڭ ورىنباسارى لاۋرا سەيفۋللينا بار توپ وكق-عا ارنايى كەلىپتى. بۇل رەتتە, ەلىمىزدە 6 ميلليوننان استام جالدامالى جۇمىسشىنىڭ جانە 180 مىڭ جۇمىس بەرۋشىنىڭ بار ەكەندىگىن ايتا كەتكەن ءجون.
قازاقستان كاسىپوداقتارى فەدەراتسياسىنىڭ توراعاسى ءسوز رەتى كەلگەندە ءۇش جىل قاتارىنان تالقىدان وتكەن «كاسىبي وداقتار تۋرالى» زاڭنىڭ بىلتىر قابىلدانعانىن, وعان سايكەس فەدەراتسيا ءوزىنىڭ ءححىىى سەزىن وتكىزگەن جانە جاڭا جارعى قابىلدانعانىن دا تىلگە تيەك ەتە كەتتى. ءا.قۇسايىنوۆتىڭ پايىمىنشا, جاڭا زاڭ كاسىپوداقتار قوزعالىسىن ودان ءارى دامىتۋعا دەگەن قادامدى تۇبىرىمەن وزگەرتكەن. جاڭا زاڭدا «الەۋمەتتىك ارىپتەستىكتىڭ» دەڭگەيلەرى ۇكىمەت, كاسىبي وداقتار جانە جۇمىس بەرۋشىلەر دەپ بەلگىلەنسە, ۇشجاقتى سالالىق كەلىسىم بازالىق قۇجات بولىپ سانالعان.
مينيسترلىك جانە سالالىق كاسىبي وداقتار دا وزدەرىنىڭ كەلىسىمدەرىنە قول قويسا, بۇل سالالىق ۆەدومستۆولار مەن سالالىق كوەففيتسيەنتتەردى قوسا العاندا جالاقى دەڭگەيىنە تىكەلەي اسەر ەتەتىنى اتاپ ءوتىلدى. ءۇشىنشى دەڭگەي رەتىندە جەرگىلىكتى اتقارۋشى ورگاندار: اكىمدىكتەر, اۋماقتىق كاسىپوداقتار جانە جۇمىس بەرۋشىلەر بولىپ بەلگىلەنسە, وڭىردەگى ەڭبەك داۋلارىن سولار شەشەتىن بولادى.
كادر ماسەلەسىن كوتەرگەن توراعا 2013 جىلدان باستاپ كاسىپوداقتارعا مۇشە بولۋ سانىنىڭ ارتقاندىعىن دا العا تارتتى. جاڭا زاڭعا سايكەس كاسىپوداقتار الەۋمەتتىك اسپەكتىلەردى قامتيتىن زاڭ جوبالارى ءجونىندەگى جۇمىس توپتارىنا قاتىسىپ, ءوز ۇسىنىستارىن دا بەرە الادى ەكەن. ۇجىمدىق كەلىسىمشارتتاردىڭ 34,5 پايىزى قازاقستان كاسىپوداقتارى فەدەراتسياسىنا تيەسىلى بولسا, جالپى كاسىپوداقتارى بار جەرلەردە ۇجىمدىق كەلىسىمشارتتارمەن قامتىلۋ 94,6 پايىزعا جەتىپتى. وسىلايشا ۇجىمدىق كەلىسىمشارت ارقىلى كاسىپورىنداعى تۇيتكىلدى ماسەلەلەر شەشىمىن تاۋىپ كەلەدى ەكەن.
مەملەكەت باسشىسىنىڭ «نۇرلى جول» جاڭا ەكونوميكالىق ساياساتى كاسىپوداقتاردىڭ كوڭىلىنەن شىققاندىعىن جەتكىزگەن توراعا داعدارىستى جىلدارى جاڭا جۇمىس ورىندارىن اشۋ ماڭىزدى ەكەندىگىنە توقتالدى. ونىڭ ايتۋىنشا, زاۋىتتاعى ءبىر جۇمىس ورنىن اشۋ ءۇشىن كەم دەگەندە 3 جىل جۇمساۋ كەرەك بولسا, ال «نۇرلى جول» باعدارلاماسى بويىنشا 200 مىڭعا تارتا جۇمىس ورنىن اشۋ كوزدەلىپ وتىر.
ءسوز رەتى كەلگەندە ءا.قۇسايىنوۆ قازاقستان كاسىپوداقتارى فەدەراتسياسى جانىنان وقىتۋ جانە ەڭبەك داۋلارىن زەرتتەۋ ورتالىعى قۇرىلعاندىعىن, وندا باستاۋىش كاسىپوداق ۇيىمدارى باسشىلارى وقىتىلاتىنىن دا قاپەرگە سالا كەتتى. جىل سايىن 2,5-3 مىڭ ادام وقىتىلارىن ءسوز ەتكەن ول «بىلىمگە قۇرىلعان ۇنقاتىسۋ ۇلكەن تيىمدىلىككە اكەلەدى» دەگەن ويىمەن دە بولىسە كەتتى.
بۇدان كەيىن بىرقاتار سۇراقتارعا جاۋاپ بەرىلدى. قازاقستاندىق جۇمىسشىلاردىڭ شەتەلدىك ارىپتەستەرى الدىندا قۇقى قانشالىقتى قورعالعان دەگەن سۇراققا وراي جاۋابىندا توراعا 2013 جىلى قۇزىرلى ورگاندار 70 مەكەمەگە 200 تەكسەرۋ وتكىزگەندىگىن جەتكىزدى. ونىڭ مالىمەتىنە قاراعاندا, سول كەزدە 128 ەڭبەك زاڭدىلىعىن بۇزۋشىلىق انىقتالسا, ال 2014 جىلى 400 تەكسەرىس ناتيجەسىندە 4 فاكت تابىلعان.
اسقار تۇراپباي ۇلى,
«ەگەمەن قازاقستان».