شاراينا
پولشانىڭ سىرتقى ىستەر ءمينيسترى گجەگوج سحەتىنا جەڭىس كۇنى نەلىكتەن تەك ماسكەۋدە عانا اتالىپ وتىلەتىنىن تۇسىنبەيتىنىن مالىمدەدى. ونىڭ ويىنشا, بۇل مەرەكەنى پولشانىڭ ۆەستەرپلاتىندا دا ءوز دەڭگەيىندە مەرەكەلەۋگە بولار ەدى.
«ءبىزدىڭ ءبارىمىز جەڭىس تويى ماسكەۋدە تويلاناتىنىنا جەڭىل ۇيرەنىپ كەتكەنبىز. ال ەگەر بۇل كۇن لوندوندا نەمەسە بەرليندە اتاپ وتىلسە, ول بۇرىنعىدان دا تابيعي بولا تۇسپەس پە ەدى؟» دەيدى سحەتىنا. ونىڭ سوزىنە قاراعاندا, جەڭىس كۇنىن سوعىس باستالعان جەردە عانا اتاپ ءوتۋ ءتىپتى دە مىندەتتى ەمەس. ءسوز ورايىندا ايتا كەتسەك, پولشا پرەزيدەنتى برونيسلاۆ كوموروۆسكي ەكىنشى دۇنيەجۇزىلىك سوعىستىڭ اياقتالۋىن ەۋروپا ەلدەرىنىڭ باسشىلارىن شاقىرا وتىرىپ, 1939 جىلعى 1 قىركۇيەكتە ەكىنشى دۇنيەجۇزىلىك سوعىس باستالعان گدانسك جانىنداعى ۆەستەرپلاتت بۇعازىندا اتاپ ءوتۋدى جوسپارلاپ وتىر ەكەن.
مادۋرو بايدەنگە اۋىر ايىپ تاقتى
ۆەنەسۋەلا پرەزيدەنتى نيكولاس مادۋرو اقش-تىڭ ۆيتسە-پرەزيدەنتى دجوزەف بايدەندى ەلدە مەملەكەتتىك توڭكەرىستىڭ جاڭا كەزەڭىن وتكىزۋگە باستاماشىلىق نيەتى بار دەپ ايىپتادى. مۇنداي ءمالىمدەمەسىن ول 1 اقپان كۇنى جاسادى.
اتالعان كۇن ءحىح عاسىردىڭ ورتاسىنداعى دەموكراتيالىق كوتەرىلىسشىلەر قوزعالىسىنىڭ كوسەمى ەسەكيەل سامورانىڭ تۋعان كۇنى رەتىندە اتالىپ وتەدى. «سولتۇستىك يمپەريانىڭ بيلىگى مەنىڭ ۇكىمەتىمنىڭ تاعىنان تايدىرىلعانىن قالايدى. وسىعان وراي, مەن دجو بايدەندى ايىپتايمىن», دەلىنگەن ن.مادۋرونىڭ سوزىندە. پرەزيدەنت, سونداي-اق, سالتاناتتى راسىمگە قاتىسۋشىلاردى جوعارى دايىندىقتا تۇرۋعا شاقىرعان. ويتكەنى, سالتاناتقا ۆەنەسۋەلا ۇلتتىق قارۋلى كۇشتەرىنىڭ وفيتسەرلەرى دە قاتىسسا كەرەك.
جانجالداسۋشىلار بيلىكتى ءبولىپ الدى
وڭتۇستىك سۋدان پرەزيدەنتى سالۆا كير مەن كوتەرىلىسشىلەر كوسەمى ريەك ماشار كەشە بيلىك وكىلەتتىلىگىن ءبولىسۋ تۋرالى كەلىسىم جاساستى. بۇل قادام 15 ايدان بەرى جالعاسىپ كەلە جاتقان قارۋلى جانجالدى تۇپكىلىكتى رەتتەۋگە مۇمكىندىك بەرەدى دەۋگە نەگىز بار.
تاراپتاردىڭ بيلىكتى ءبولىسۋ تۋرالى كەلىسىمىنە سايكەس, كير جاڭا اكىمشىلىكتىڭ پرەزيدەنتى بولىپ قالادى, ال ماشار ۆيتسە-پرەزيدەنتتىككە تاعايىندالاتىن بولادى. ەكى كوشباسشى كەلىسسوزدى 20 اقپاندا جالعاستىرۋ تۋرالى ۋاعدالاسقان. وڭتۇستىك سۋدانداعى ساياسي جانە ەتنوسارالىق قاقتىعىستار 2013 جىلدىڭ جەلتوقسانىندا باستالعان ەدى. ال وڭتۇستىك سۋدان جەر بەتىندەگى ەڭ «جاس» مەملەكەت بولىپ تابىلادى. ول 2011 جىلدىڭ شىلدەسىندەگى رەفەرەندۋمنىڭ قورىتىندىسى بويىنشا تاۋەلسىز مەملەكەت رەتىندە جاريالانعان-تىن.
اقش-تىڭ بيۋدجەتى – 4 تريلليون دوللار
اقش پرەزيدەنتى باراك وباما كونگرەسكە 2016 جىلدىڭ بيۋدجەتىن قابىلداۋدى ۇسىنادى. الداعى قارجى جىلىنىڭ بيۋدجەت كولەمى 4 تريلليون دوللاردى قۇرايدى. قارجى تاپشىلىعى 474 ميلليارد دوللار نەمەسە ءىجو-ءنىڭ 2,5 پايىزى شاماسىندا بولادى دەپ كۇتىلىپ وتىر.
كونگرەسكە بارعان كەزىندە وباما, سونىمەن قاتار, تۇرعىنداردىڭ اسا باي بولىگىنە سالىقتى ۇلعايتۋ جونىندە ۇسىنىس جاساماق. تابىستارىن شەتەلدەردە قالدىراتىن اسا ءىرى كورپوراتسيالارعا قاتىستى فيسكالدى ساياساتتى دا قاتاڭداتۋدى ۇسىناتىن بولادى. سونىمەن ءبىر مەزگىلدە, اقش ۇكىمەتى الەۋمەتتىك شىعىندار مەن سالىقتىق جەڭىلدىكتەر ەسەبىنەن ورتا تاپتىڭ تابىستارىن جوعارىلاتۋدى كوزدەپ وتىر. وبامانىڭ جاسايتىن ۇسىنىستارىنا سايكەس, بيۋدجەت تاپشىلىعى ءار جىل سايىن ۇلعايا وتىرىپ, 2025 جىلعا قاراي 687 ميلليارد دوللاردى قۇرايتىن بولادى.
«ءال-جازيرا» ءجۋرناليسى – بوستاندىقتا
مىسىر پرەزيدەنتى ابدەل فاتاح اس-سيسي 7 جىلعا باس بوستاندىعىنان ايىرىلعان اۆستراليا ازاماتى, «ءال-جازيرا» تەلەارناسىنىڭ ءجۋرناليسى پيتەر گريستكە راقىمشىلىق جاساپ, تۇرمەدەن بوساتتى. ول «مۇسىلمان باۋىرلار» تىيىم سالىنعان قوزعالىسىنا قولداۋ كورسەتتى دەپ ايىپتالعان بولاتىن.
وتكەن جىلدىڭ 23 ماۋسىمىندا كايردىڭ قىلمىستىق سوتى كاتاردىڭ «ءال-جازيرا» تەلەارناسىنىڭ 7 قىزمەتكەرىن 7 جىلعا باس بوستاندىعىنان ايىرعان ەدى. جۋرناليستەرگە قاتىستى شىعارىلعان ۇكىم باتىس ەلدەرىندە جانە اۆستراليادا ۇلكەن قارسىلىق رەاكتسياسىن تۋعىزعان بولاتىن. كەزىندە مۇنداي جازاعا نارازىلىعىن, سونىمەن قاتار, بۇۇ-نىڭ ادام قۇقىقتارى جونىندەگى جوعارعى كوميسسارى ناۆي پيللەي دە بىلدىرگەن ەدى. ەندى پيتەر گريست ءوزىنىڭ باسقا ارىپتەستەرى دە تۇرمەدەن بوساتىلعانشا تىنىشتىق تاپپايتىنىن مالىمدەپ وتىر.
باقتالاسىنان ءتاجدى تارتىپ العان ارۋ
برازيليادا دا الەمنىڭ كوپتەگەن ەلدەرىندەگىدەي ارۋلار بايقاۋى وتكىزىلىپ تۇرادى. ەلدە سوڭعى وتكەن بايقاۋدا وقىس وقيعا بولدى. Miss Amazonas بايقاۋىنا قاتىسۋشى شەيسلانە حاياللا جەڭىمپاز اتانعان كەرول تولەدونىڭ ءتاجىن ول ونى باسىنا كيەر-كيمەستەن تارتىپ الىپ, جەرگە ءبىر-اق ۇرعان.
حاياللانىڭ پىكىرىنشە, تولەدو ءتاجدى «ساتىپ العان». ايتپەسە, ارۋ اتانۋعا مۇلدەم سايكەس كەلمەيدى. وقيعا بارىسىن كورەرمەندەر بەينەتاسپاعا جازىپ الىپ, ينتەرنەتكە سالىپ جىبەرگەن. وندا اۋەلى ەكىنشى ورىن العان حاياللا باسەكەلەسىنىڭ تابىسىنا قۋانعان سىڭاي تانىتادى دا, بىرنەشە سەكۋند وتەر-وتپەستەن اسەم اشەكەيدى جەڭىمپاز قىزدىڭ باسىنان ج ۇلىپ الىپ, جەرگە لاقتىرىپ جىبەرەدى. بۇل ارەكەتىن حاياللا «جۇرەگىم بۇيىرعان نارسەنى جاسادىم», دەپ ءوزىن اقتاپ الماقشى بولعان.
قىسقا قايىرىپ ايتقاندا:
*سيريانىڭ استاناسى – داماسك قالاسىندا ليۆاندىق قاجىلىققا بارۋشى شيتتەردى اكەلە جاتقان اۆتوبۋس جارىلىپ, 7 ادام قازا تاپسا, 20-شاقتىسى جارالانعان. لاڭكەستىكتى «ءال-كايدانىڭ» قۇرامىنا كىرەتىن سۇننيتتىك «ان-نۋسرا مايدانى» توبى جاسادى دەگەن كۇدىك بار.
*سولتۇستىك كورەيا امەريكالىق اۆيانوسەتستى سۋعا باتىرىپ جىبەرۋ بويىنشا جاتتىعۋ وتكىزگەن. جاتتىعۋعا قولباسشىلىقتى ەلدىڭ باسشىسى, مارشال كيم چەن ىننىڭ ءوزى جاساعان. ونىڭ مالىمدەمەسىندە ءوز ەلىنىڭ كەز كەلگەن سوعىستا, ءتىپتى, يادرولىق سوعىستا دا كەز كەلگەن جاۋعا قارسى تۇرا الاتىنى اتاپ كورسەتىلەدى.
*2 اقپانعا قاراعان ءتۇنى نيۋ-يوركتىڭ ورتالىعىنداعى مانحەتتەن اۋدانىندا اتىس بولدى. جەرگىلىكتى بيلىك وكىلدەرىنىڭ اقپاراتتارىنا قاراعاندا, اتىس سالدارىنان 1 ادام قازا تاپسا, 4-ەۋى جارالانعان. ولاردىڭ كىمدەر ەكەنى, نە ءۇشىن اتىسقانى, ۇستالعانى-ۇستالماعانى تۋرالى ەشتەڭە ايتىلمايدى.
*بيرجالىق ساۋدا-ساتتىق بارىسىندا ەۋرونىڭ باعامى 79 رۋبلدەن اسىپ ءتۇستى, ناقتىراق ايتقاندا, 79,36 رۋبل بولدى. ال 1 دوللار ءۇشىن 70,13 رۋبل بەرىلىپ وتىر. Brent ماركالى مۇنايدىڭ 1 باررەلىنىڭ باعاسى لوندون بيرجاسىندا 51,56 دوللاردى قۇراعان.
ينتەرنەت ماتەريالدارى نەگىزىندە ازىرلەندى.