بيىلعى جىل كوپۇلتتى قازاقستان حالقى ءۇشىن ايرىقشا قۋانىش پەن قۇرمەت سەزىمىنىڭ ساۋلەلەرىمەن نۇرلانىپ باستالدى دەگىم كەلەدى. ەلباسى نۇرسۇلتان ءابىش ۇلى نازارباەۆ 2015 جىلدى قازاقستان حالقى اسسامبلەياسىنىڭ جىلى دەپ جاريالادى. بۇل بەدەلدى قوعامدىق ۇيىمنىڭ ءوزى قۇرىلعان 20 جىلدىق بەلەستە اتقارعان قىرۋار جۇمىستارىنا بەرىلگەن جوعارى باعا جانە ەرتەڭگى ەرەن ىستەردىڭ جاۋاپكەرشىلىگىن العا تارتقان پايىم ەكەندىگىن بىلەمىز. ويتكەنى, تاۋەلسىز ەلىمىز ۇنەمى بيىك ماقساتتار جەتەگىمەن ۇلكەن جەتىستىكتەرگە جەتىپ كەلەدى. «كورىنگەن تاۋدىڭ الىستىعى جوق» دەگەندەي, «ماڭگىلىك ەلدىڭ» كىرپىشتەرى قالانا باستادى. بۇل ورايدا قازاقستان حالقى اسسامبلەياسى ىنتىماق تۋىن بيىك ۇستايتىنى كامىل. سول ابىرويلى ساپتا اقمولا وبلىستىق «يستوكي» سلاۆيان مادەني-اعارتۋ بىرلەستىگى دە وزىندىك ۇلەسىن قوساتىنى انىق.
ءبىزدىڭ قوعامدىق بىرلەستىگىمىز 1991 جىلى قۇرىلىپ, قازىرگى تاڭدا سلاۆيان حالىقتارىنىڭ سالت-ءداستۇرى مەن مادەنيەتىنىڭ جاڭعىرۋىنا ايتارلىقتاي ۇلەس قوسىپ وتىر. بىرلەستىك – قازاقستان تاۋەلسىزدىگىنىڭ قۇرداسى. وسىنىڭ ءوزى ورتالىقتىڭ ەلمەن بىرگە بارلىق سىندارلى وتكەلدەر مەن سىناقتى كەزەڭدەردى باستان كەشىرىپ, ورتاق وتانىمىزدىڭ گۇلدەنۋىنە ۇلەس قوسقاندىعىن اڭعارتادى ءارى تولعانىستى سەزىمگە بولەيدى.
تاۋەلسىز مەملەكەتىمىز قىسقا مەرزىمدە كوپ ۇلتتىلىعىمەن قوسا, بىرلىگى جاراسقان, قۇت-بەرەكەسى مولايعان ەل رەتىندە الەم نازارىنا ىلىكتى. بۇل ەلباسى ن.ءا.نازارباەۆتىڭ ۇستانىپ وتىرعان ساليقالى ساياساتى مەن تۇڭعىش رەت قازاقستان حالقى اسسامبلەياسىن قۇرعانداعى كورەگەندىگىنىڭ جەمىسى دەۋىمىز كەرەك. قوعامىمىزدىڭ باستى قۇجاتى – پرەزيدەنتتىڭ ءداستۇرلى جولداۋلارى حالىقتار دوستىعى مەن ءوزارا تۇسىنىستىكتى نىعايتۋ ۇرانىمەن باستالاتىنى, بۇل باعىتتا كەڭ كولەمدى جۇمىستار جۇرگىزىلەتىنى ءار شاڭىراقتىڭ شاتتىق نۇرى دەپ ەسەپتەيمىز. سوندىقتان, وبلىسىمىزداعى 41 ەتنومادەني بىرلەستىكتىڭ بارلىعى وزىنە جۇكتەلگەن مىندەتتەردى جوعارى جاۋاپكەرشىلىكپەن ورىنداپ, ەلباسى, قازاقستان حالقى اسسامبلەياسىنىڭ توراعاسى ن.ءا.نازارباەۆتىڭ سەنىمىن اقتاۋعا كۇش سالاتىنى انىق.
بىرلەستىگىمىزدى كوكشەتاۋ قالاسىنىڭ قۇرمەتتى ازاماتى زينايدا سانچيلو 15 جىل بويى باسقارىپ, جەمىستى ءىزىن قالدىردى. ءوزىمىز دە جاس كەزىمىزدەن بىرلەستىك جۇمىسىنا ارالاسقاندىقتان, ەڭ باستى قۇندىلىعىمىز – ۇلتتى ۇيىستىرۋشى قازاق حالقىمەن باۋىرمالدىق قارىم-قاتىناستى, دوستىق ءتۇسىنىستىكتى نىعايتۋدى ءبىرىنشى كەزەكتەگى پارىز سانايمىز. ءبىزدىڭ عانا ەمەس, وبلىسىمىزدى مەكەندەيتىن بارلىق ەتنوستىڭ تاعدىرىندا قازاق حالقىنىڭ كەڭقولتىق كوڭىلى مەن تاپ-تازا ىقىلاس-پەيىلى ايرىقشا ورىن الادى.
بىزدە «ورىس ءانى» حالىقتىق ءان-بي ءانسامبلى, «زلاتو» جاستار ۆوكالدىق ءانسامبلى مەن ءوزىم جەتەكشىلىك ەتەتىن «يۋنوست سينەگوريا», «ۋلىبكا» ۇلگىلى انسامبلدەرى, باسقا دا مۇددەلەر بويىنشا ۇيىرمەلەر جۇمىس ىستەسە, كەز كەلگەن كوپشىلىك شارامىز قازاق حالقىنىڭ مارتەبەسىن كوتەرۋمەن بايلانىستىرىلا جۇرگىزىلەدى. بىرلەستىگىمىزدىڭ «ادام جانە ونىڭ تاعدىرى», «جۇلدىزدار جۇلدىزدى جاعادى», «الەم بالا كوزىمەن», «ءازىلىمىز جاراسسا», بالالارعا ارنالعان «جول قوزعالىسى بەلگىلەرى الەمىندە» اتتى ءىس-شارالارىنا قازاق, تاتار, ۋكراين, پولياك, چەشەن-ينگۋش, تاعى باسقا ۇلتتىڭ وكىلدەرى قاتىستى. ءوز كەزەگىندە, ءبىزدىڭ كونتسەرتتىك باعدارلامالارىمىز وزگە ۇلت وكىلدەرىنىڭ ءان-بيلەرىمەن جاراسىمدى ورنەكتەلەتىنىن ايتقىم كەلەدى.
ەلباسى, قازاقستان حالقى اسسامبلەياسىنىڭ توراعاسى نۇرسۇلتان ءابىش ۇلى نازارباەۆتىڭ وڭىرىمىزگە ءاربىر ساپارى ورتاق مەرەكەگە اينالىپ كەتە باراتىنى بار. بىلتىرعى جازدا پرەزيدەنتىمىز كوكشەتاۋ قالاسىنداعى جاڭا «دوستىق ءۇيىنىڭ» اشىلۋ سالتاناتىنا قاتىستى. ەمەن-جارقىن اڭگىمە قۇرىپ, ءان شىرقادىق. وسىنىڭ ءوزى بارشامىزدىڭ جۇرەگىمىزگە جىگەر قۇيادى, بولاشاعىمىزدىڭ جارقىندىعىن ايشىقتاي تۇسەدى.
ءبىزدىڭ ورتاق ۇيىمىزدە ۇلتتىق, ءدىني سالت-داستۇرلەر مەن مەرەكەلەر دە ورتاق. ءبىز وسىنداي قىزىقتى دا قۋانىشتى كۇندەردە, تاعىلىمدى شارالاردا ارقاشان بىرگەمىز. ءبىرتۇتاس قازاقستانىمىز جايناپ جاسارىپ, جاسامپازدىق بەلەستەردەن كورىنە بەرگەي.
گالينا بۋلىچەۆا,
«يستوكي» سلاۆيان مادەني-اعارتۋ بىرلەستىگىنىڭ ءتورايىمى.
اقمولا وبلىسى.