كەشە پرەمەر-مينيستردىڭ ءبىرىنشى ورىنباسارى باقىتجان ساعىنتاەۆ جۇمىس ساپارىمەن شىعىس قازاقستان جانە پاۆلودار وبلىستارىندا بولدى, دەپ حابارلادى پرەمەر-مينيستردىڭ ءباسپاسوز قىزمەتى.
وسكەمەندە ءبىرىنشى ۆيتسە-پرەمەر ورتالىق مەملەكەتتىك ورگاندار باسشىلارىنىڭ, ۇلتتىق كومپانيالار مەن بيزنەس-قاۋىمداستىقتار وكىلدەرىنىڭ قاتىسۋىمەن وتاندىق تاۋار وندىرۋشىلەردى قولداۋ ماسەلەسى جونىندە كەڭەس وتكىزدى.
ءوز سوزىندە ب.ساعىنتاەۆ وتاندىق ءوندىرۋشىنى قولداۋ داعدارىسقا قارسى ساياساتتىڭ نەگىزگى باعىتتارىنىڭ ءبىرى بولىپ تابىلاتىنىن اتاپ ءوتتى.
ۇكىمەت ەلدەگى 80-نەن استام ءىرى كاسىپورىنداردىڭ پروبلەمالىق ماسەلەلەرىن قارادى, جەرگىلىكتى مازمۇندى ارتتىرۋ جولىمەن ولاردى قولداۋ ءىس-شارالارىنىڭ جوسپارى قابىلداندى. ول ءۇشىن مەملەكەتتىك تاپسىرىستاردى باسىمدىقتى ورنالاستىرۋ, سونداي-اق, ءىرى ۇلتتىق كومپانيالاردىڭ, قازاقستاندىق وندىرۋشىلەرگە تاپسىرىس بەرۋى جوسپارلانىپ وتىر, دەدى ب.ساعىنتاەۆ.
ءوز كەزەگىندە, كاسىپورىندار ءوز ونىمدەرىمەن ءبىزدىڭ ىشكى سۇرانىسىمىزدى قاناعاتتاندىرىپ, سونىمەن بىرگە, تۇرعىندار ءۇشىن جۇمىس ورىندارىن ساقتاۋى ءتيىس, دەپ اتاپ ءوتتى ءبىرىنشى ۆيتسە-پرەمەر.
كەڭەس قورىتىندىسى بويىنشا شىعىس قازاقستان وبلىسى اكىمدىگى مەن ۇلتتىق كومپانيالار جانە جەرگىلىكتى تاۋار وندىرۋشىلەر اراسىندا جەرگىلىكتى مازمۇندى ارتتىرۋ بويىنشا مەموراندۋمدارعا قول قويىلدى.
ولاردىڭ قاتارىندا «قازاقستان تەمىر جولى» ۇك» اق, «ەۋرازيالىق توپ» جشس, «سامۇرىق-ەنەرگو» اق, «قازتسينك» جشس جانە باسقالار بار. قول قويىلعان مەموراندۋمداردىڭ جالپى سوماسى 74 ملرد. تەڭگەدەن اسىپ ءتۇستى.
سول سياقتى, شىعىس قازاقستان وبلىسى اكىمدىگى مەن جۇيە قۇراۋشى كاسىپورىندار جۇمىس ورىندارىن ساقتاۋ جانە وندىرىستىك ۇدەرىستەردى تۇراقتاندىرۋ بويىنشا مەموراندۋمداردى بەكىتتى. وعان قول قويعاندار ىشىندە «ۆوستوكتسۆەتمەت» جشس, «قازتسينك» جشس, «ۋكتمك» اق, «ازيا اۆتو» اق جانە باسقالار بار.
ب.ساعىنتاەۆتىڭ قاتىسۋىمەن وسى كۇننىڭ ەكىنشى جارتىسىندا پاۆلوداردا وتكەن كەڭەس شەڭبەرىندە دە ءدال وسىنداي مەموراندۋمدار بەكىتىلدى.
جەرگىلىكتى مازمۇندى دامىتۋ بويىنشا مەموراندۋمدارعا «قازاقستان تەمىر جولى» ۇك» اق, «قازمۇنايگاز» ۇك» اق, «ەۋرازيالىق توپ» جشس, «كەگوك» اق, «قازاقتەلەكوم» اق ءجانە باسقالار قول قويدى. كەلىسىلگەن سومانىڭ جالپى كولەمى 128 ملرد. تەڭگەدەن اسادى.
جۇمىس ورىندارىن ساقتاۋ جانە وندىرىستىك ۇدەرىستەردى تۇراقتاندىرۋ جونىندەگى مەموراندۋمعا «قازاقستان اليۋمينيى» اق, «قازاقستان ەلەكتروليز زاۋىتى» اق, «KSP Steel» جشس, «بوگاتىر كومىر» جشس جانە وڭىردەگى باسقا دا ءىرى كاسىپورىندار قول قويدى.