شيەلى اۋدانىندا «بيدايكول» دارىگەرلىك امبۋلاتورياسى پايدالانۋعا بەرىلدى. دەنساۋلىق ساقتاۋ مەكەمەسىنىڭ قۇرىلىسىنا وبلىستىق بيۋدجەتتەن 79 ميلليون 420 مىڭ تەڭگە قارجى بولىنگەن. بۇگىندە جاڭا زاماناۋي قۇرىلعىلارمەن جابدىقتالعان امبۋلاتوريادا 2 دارىگەر, 7 مەدبيكە جۇمىس ىستەيدى.
– جاڭا امبۋلاتوريا اۋرۋشاڭدىقتى دەر كەزىندە انىقتاۋعا مۇمكىندىك بەرىپ وتىر. ماسەلەن, قازىر اۋىلدا اۋرۋشاڭدىق 9,5 پايىزعا ازايىپ, تۋ كورسەتكىشى ارتتى. ەندى اۋىل تۇرعىندارى ەم الۋ ءۇشىن اۋدان ورتالىعىنا بارمايدى. مۇندا كۇندىزگى ەم قابىلداۋ ءبولىمى دە بار,– دەيدى شيەلى اۋدانىنىڭ باس دارىگەرى قازبەك شاۋكەباەۆ.
وتكەن جىلى «بيدايكول» اۋىلدىق مادەنيەت ءۇيى كۇردەلى جوندەۋدەن ءوتتى. 320 كورەرمەن زالى بار ونەر ورداسىندا ءتۇرلى ۇيىرمەلەر جۇمىس جاساۋدا.
اۋداندا «اق بۇلاق» باعدارلاماسى اياسىندا اۋقىمدى جۇمىستار اتقارىلۋدا. شيەلى كەنتىنىڭ ىشكى سۋ قۇبىرلارى جاڭارتىلىپ, سۋ كوتەرۋ مۇناراسى ورناتىلدى. باعدارلاما اياسىندا 8 ەلدى مەكەننىڭ اۋىز سۋ جۇيەسىن جاڭعىرتۋ جۇمىستارى قارالعان. بۇگىندە بەس اۋىلداعى قۇرىلىس جۇمىستارى اياقتالدى.
اۋداننىڭ تىنىس-ءتىرشىلىگىمەن تانىسقان قىرىمبەك كوشەرباەۆ ورتالىق كىتاپحانانىڭ جۇمىسىن دا كوزىمەن كوردى. كىتاپحانا ەسكى عيماراتتا ورنالاسقان. وقىرماندارعا قىزمەت كورسەتۋ ساپاسىن ارتتىرۋ ماقساتىندا جاڭا عيماراتقا كوشىرۋ ماسەلەسى قارالاتىن بولدى.
ەرجان بايتىلەس,
«ەگەمەن قازاقستان».
قىزىلوردا وبلىسى.