ەلىمىزدەگى تىنىشتىق, بىرلىك, ادامي سىيلاستىق ىرىستى ەلدىڭ ۇلگىلى ىستەرىن الەمگە پاش ەتىپ وتىر. قوستاناي وبلىستىق ءباسپاسوز كلۋبىنا ىشكى ساياسات باسقارماسىنىڭ مۇرىندىق بولۋىمەن ءتۇرلى پارتيالار بەلسەندىلەرى باس قوستى. ولار الدىمەن ەلىمىزدەگى وتە ماڭىزدى ساياسي وقيعا پرەزيدەنت سايلاۋىنىڭ ءادىل جانە تابىستى وتكەنىن ايتتى. دەموكراتيالىق ۇستانىمدى ۇستانعان ەلىمىزدەگى بىرنەشە پارتيالار بار. بىراق ولاردىڭ ويلاعانى «اققۋ, شورتان, شاياننىڭ» كەبى ەمەس, ەلدىڭ بىرلىگى, ىنتىماعى, دامۋى ەكەن. پارتيالاردىڭ قوستاناي وڭىرىندەگى فيليالدارىنىڭ وكىلدەرى ونى ىسىمەن دالەلدەدى. «نۇر وتان», قازاقستان كوممۋنيستىك حالىق پارتياسى, جالپىۇلتتىق سوتسيال-دەموكراتيالىق پارتياسى, قازاقستاننىڭ «اۋىل» سوتسيال-دەموكراتيالىق پارتياسى, «بىرلىك» ءجانە «اقجول» دەموكراتيالىق پارتيالارىنىڭ جەرگىلىكتى جەردەگى بەلسەندىلەرى ىنتىماقتاسا وتىرىپ, قازاقستان حالقىنىڭ بىرلىگى, وتان قورعاۋشىلار كۇنىمەن جانە جەڭىستىڭ 70 جىلدىق مەرەكەسىنە وراي قوستاناي وبلىسى تۇرعىندارىنا قۇتتىقتاۋ حات جولدادى. باسقوسۋدا پارتيالار وكىلدەرى وزدەرىنىڭ وبلىستىق فيليالدارى اتىنان وسى قۇتتىقتاۋ حاتقا قول قويدى. مۇنداي شارانى قوستاناي وبلىسى ەلىمىز بويىنشا ءبىرىنشى رەت وتكىزىپ وتىرعانىن دا ايتا كەتكەن ءجون.
– ۇلى وتان سوعىسى ءبىزدىڭ ورتاق تاريحىمىز, اتالارىمىز ءوزىنىڭ قانىن توگىپ, ءومىرىن بەرىپ, فاشيزمنەن ەلدى, جەردى قورعاپ قالدى. قازىر تىنىشتىعىمىزعا سىنا قاققىسى كەلەتىن كەيبىرەۋلەر ءبىزدىڭ تاريحىمىزدىڭ وزىنەن ىلىك تاپقىسى كەلەدى. ال ونى ءوزىنىڭ ارام پيعىلىنا پايدالانعىسى كەلەتىندەر دە تابىلماۋىنا كىم كەپىل؟ قاي پارتيا بولسا دا, الدىمەن ەلدىڭ تىنىشتىعىن ساقتاۋعا اتسالىسۋىمىز قاجەت. ءبۇگىن قوستانايلىقتارعا بىرىگىپ جازىپ وتىرعان مەرەكەلىك حاتىمىز سونداي يگى جۇمىستارىمىزدىڭ ءبىرى دەپ بىلەمىز, – دەدى جالپىۇلتتىق سوتسيال-دەموكراتيالىق پارتياسى وبلىستىق فيليالىنىڭ توراعاسى سەرگەي بوگاتىرەۆ. قۇتتىقتاۋ حات: «قۇرمەتتى قوستانايلىقتار! سىزدەردى بەيبىتشىلىك پەن كەلىسىمنىڭ, ەرلىك پەن قايسارلىقتىڭ مەرەكەلەرى قازاقستان حالقىنىڭ بىرلىگى كۇنىمەن, وتان قورعاۋشىلار كۇنىمەن جانە ۇلى جەڭىستىڭ 70 جىلدىعىمەن قۇتتىقتايمىز! ارداگەرلەرىمىزدىڭ مايداندا كورسەتكەن ەرلىگى بۇگىنگى ۇرپاق ءۇشىن ۇلگى. سوعىستاعى اتالار قانىمەن, تىلداعى اجەلەرىمىزدىڭ ماڭداي تەرىمەن كەلگەن بەيبىت ءومىردىڭ سالتاناتىن ەلىمىزدىڭ جاستارى جالعاستىراتىنىنا سەنەمىز. ولار ەرلىكتى ۇمىتپايدى», دەگەن جولدارمەن باستالادى.
پارتيالاردىڭ قوستاناي ءوڭىرىندەگى بەلسەندىلەرى بۇگىنگى ۋاقىتتىڭ كۇردەلى ەكەندىگىن دە ەسكە سالدى. دۇنيەجۇزىلىك ەكونوميكالىق داعدارىس كوپ ەلدەردى قۋسىرىپ كەلەدى. سونىمەن قاتار, تاسادا تۇرىپ تاس اتىپ, بوتەن ەلدى ءبۇلدىرىپ پايدا تاباتىندار دا امبەگە ايان. پارتيالار بەلسەندىلەرى ولارعا قارسى قارۋ – ەلدىڭ ءتاستۇيىن بىرلىگى, ىنتىماعى عانا ەكەنىن ايتتى. پارتيالار جەڭىس مەرەكەسىندە جاستارعا پاتريوتتىق تاربيە بەرەتىن شارالار جوسپارىن دا ءبولىستى. مىسالى, نۇروتاندىقتار جەڭىس مەرەكەسىندە «مەنىڭ اتامنىڭ پورترەتى» دەگەن كەڭ كولەمدەگى اكتسيانى جالعاستىرادى, سوتسيال-دەموكراتتار سوعىس ارداگەرلەرىنە گۇل شوقتارىن سىيلايدى, ال كوممۋنيستەر مايدانگەرلەرمەن كەزدەسۋلەر وتكىزۋدى مەجەلەپ قويدى.
ءنازيرا جارىمبەتوۆا,
«ەگەمەن قازاقستان».
قوستاناي.