اتىراۋ. 2 اقپان. اتىراۋ ءوڭىرىنىڭ باسشىسى باقتىقوجا ىزمۇحامبەتوۆتىڭ وكىمىمەن وبلىستىق ۆەتەريناريا باسقارماسىنا باسشى بولىپ ابدراحمانوۆ نۇرباي ناسيحات ۇلى تاعايىندالدى. بۇل تۋرالى «اتىراۋ» گازەتى حابارلادى.
وبلىستىق ۆەتەريناريا باسقارماسىنىڭ تىزگىنىن ۇستاعان نۇرباي ابدراحمانوۆتىڭ جاسى – 59-دا. بۇرىنعى گۋرەۆ اۋىل شارۋاشىلىعى تەحنيكۋمىن ۆەتتەحنيگ, الماتى زووتەحنيكالىق-مال دارىگەرلىك ينستيتۋتىن مال دارىگەرى ماماندىعى بويىنشا بىتىرگەن. ەڭبەك جولىن 1979 جىلى ۆەتتەحنيگ بولىپ باستاپ, سودان بەرى وسى سالادا ەڭبەك ەتىپ كەلەدى. ال 1993 جىلدان وسى كەزگە دەيىن اۋىل شارۋاشىلىعى مينيسترلىگى ۆەتەريناريالىق باقىلاۋ جانە قاداعالاۋ كوميتەتىنىڭ اتىراۋ وبلىستىق اۋماقتىق ينسپەكتسياسىندا باس مامان بولىپ قىزمەت ەتكەن.
ايتا كەتەيىك, جۋىردا اتىراۋ وبلىسىندا ۆەتەريناريا ماسەلەلەرىمەن اينالىساتىن جاڭا باسقارما قۇرىلعان بولاتىن. مۇنداي باسقارما ەلىمىزدىڭ تەك بىرقاتار ايماقتارىندا عانا بار. مۇنىڭ ءوزىن وبلىس باسشىلىعىنىڭ مال شارۋاشىلىعىن دامىتۋ, سونىڭ ىشىندە, مال باسىن كوبەيتۋگە دەگەن ۇمتىلىسىنان تۋعان يگى قادامى دەپ بىلگەن ءجون.
جولداسبەك شوپەعۇل.
دەرەك, سۋرەت: «اتىراۋ» گازەتى.