ءبىر سۋرەت ءبىر ادامنىڭ تاعدىرىن تۇبەگەيلى وزگەرتەدى دەپ كىم ويلاعان؟ دجەرەمي ميكستىڭ ەسىمى 2014 جىلى الەمگە ايگىلى بولادى. وكىنىشكە قاراي, قىلمىسكەر رەتىندە.
تۇتقىندالعان كەزىندە تۇسىرىلگەن سۋرەتى ينتەرنەتكە تاراعان ساتتەن باستاپ ونىڭ ءومىرى كۇرت وزگەردى. دجەرەميدىڭ كەلبەتى جەلى قولدانۋشىلارىن بەي-جاي قالدىرمايدى. سونىڭ ارقاسىندا «كورىكتى قىلمىسكەر» دەگەن لاقاپ اتى پايدا بولدى. وسىلايشا, دجەرەميگە ءسان الەمىندەگى ءىرى اگەنتتەردىڭ دە كوزى تۇسكەن. كەيىن ول بوستاندىققا شىققان سوڭ, بەدەلدى ءسان ۇيلەرىمەن كەلىسىمشارتقا وتىرىپ, تانىمال برەندتەردىڭ بەت-بەينەسىنە اينالادى. بۇگىندە ول – ءسان الەمىنىڭ جارىق جۇلدىزى.
قوزعالىستان قۋات وندىرەدى
جاپوندار تەحنولوگيا جاعىنان باسقالاردان كوش ىلگەرى. ولار, ءتىپتى, ءاربىر قوزعالىستى ەنەرگياعا اينالدىرىپ وتىر.
جاپون مەتروسى – ەلدەگى ەڭ قاربالاس ورىنداردىڭ ءبىرى. وندا كۇن سايىن ميلليونداعان ادام جۇرەدى. ەڭ كەرەمەتى ولار مەتروعا پەزوەلەكترلىك تەحنولوگيا ەنگىزگەن. بۇل تەحنولوگيا ادامداردىڭ قوزعالىسىنان قۋات وندىرەدى. مەترونى پايدالانۋ ارقىلى جاپوندار ستانسالاردى عانا ەمەس, بۇكىل ەلدى ەلەكتر ەنەرگياسىمەن قامتاماسىز ەتىپ وتىر. ءتىپتى بۇل تەحنولوگيا اۆتوجولداردا دا قولدانىلادى.
قوقىس قاراجاتقا اينالادى
نيگەريانىڭ لاگوس قالاسىنىڭ تۇرعىندارى مەكتەپتەگى وقۋعا اقشانى قوقىسپەن تولەيدى.
مۇندا قايتا وڭدەلەتىن قالدىقتاردى جيناۋ ارقىلى بالالاردىڭ ءبىلىم الۋىنا قاجەتتى قارجى جيناۋعا مۇمكىندىك بەرىلگەن. اتا-انالار مەن وقۋشىلار پلاستيك بوتەلكەلەردى, كارتون مەن باسقا دا قالدىقتاردى جيناپ, ولاردى قايتا وڭدەۋگە تاپسىرادى. ودان تۇسكەن قاراجات مۇعالىمدەردىڭ جالاقىسىن تولەۋگە, سونداي-اق مەكتەپ فورماسى مەن وقۋ-قۇرال جابدىقتارىن ساتىپ الۋعا جۇمسالادى. بۇل باستاما قارجىنى ۇنەمدەۋگە عانا ەمەس, ەلدى قوقىستان تازارتۋعا دا سەپتىگىن تيگىزەدى. قازىرگى تاڭدا جوبانى قالاداعى قىرىق مەكتەپ قولداپ, ىسكە اسىرىپ جاتىر. مىسالى, وسى باستاما ارقىلى ءبىر مەكتەپ تۇسكەن قاراجاتقا عيماراتىن كەڭەيتىپ, وقۋشىلار سانىن 70-تەن 120-عا جەتكىزگەن.