عالام عاجاپتارى: ەڭ ماڭىزدى كۇن

اڭگىمە وڭتۇستىككورەيالىقتاردىڭ ومى­رىندەگى ەڭ ماڭىزدى سىناق – سۋنىن تۋرالى. بۇل – جۇزدەگەن مىڭ ستۋدەنتتىڭ بولاشاعىن شەشەتىن ۇلتتىق ۋنيۆەرسيتەتكە قابىلداۋ ەمتيحانى. ەمتيحان كۇنى تەستىلەۋ ورتالىقتارى ورنالاسقان اۋدانداردا جولدار جابىلادى, مۋزىكا قوسۋعا, جوندەۋ جۇمىسىن جۇرگىزۋگە, شۋ شىعارۋعا تىيى­م سالىنادى. ەلدە ءتىپتى, ۇشاق رەيستەرى مەن قۇرىلىس جۇمىستارى دا توقتايدى. مۇنىڭ ءبارى تىنىشتىقتى بۇزباۋ ماقساتىندا جاسالادى. وقۋشىلاردىڭ ەمتيحانعا كەشىكپەۋى ءۇشىن قىزمەتكەرلەردىڭ جۇمىس كۇنى ءبىر ساعاتقا كەش باستالادى. ويتكەنى جولدا كەپتەلىس بولماۋى قاجەت. بۇل ەمتيحاننىڭ ماڭىزدىلىعى سونشالىق, اتا-انالار بالالارىن سىناققا بالاباقشا كەزىنەن باستاپ دايىندايدى.

جاساندى ينتەللەكت باسقاراتىن زاۋىت

قىتايدا جاساندى ينتەللەكتىمەن باسقارىلاتىن العاشقى زاۋىت ىسكە قوسىلدى.

وسىدان بىرنەشە جىل بۇرىن ادامنىڭ ورنىن روبوت باسادى دەگەن ءسوز قيال سەكىلدى كورىنگەن بولسا, بۇگىندە ول شىندىققا اينالدى. زاۋىت اشساڭ دا قاپتاعان جۇمىسشى ىزدەپ اۋرەلەنبەيسىڭ. «Changan» مەن «Huawei» كومپانيالارى بىرىگىپ نەگىزىن قالاعان كاسىپورىننىڭ ءوندىرىسىن ءبىر عانا كومپيۋتەر باسقارادى. وندا 1 400 روبوت, 650 اۆتونومدى كولىك, 200-دەن استام وزدىگىنەن باسقارىلاتىن ستانسا بار. بۇل جۇيە سۇرانىسقا ساي اۆتوكولىكتەردى قۇراستىرىپ بەرەدى. زاۋىت تۇتىنۋشىدان اۆتوكولىكتىڭ مودەلىن, ءتۇسىن جانە باسقا دا پارامەترلەرىن ناقتىلاپ العاننان كەيىن وسى مالىمەتتەرگە سۇيەنە وتىرىپ, بارلىعىن اۆتوماتتى ىستەي بەرەدى.

ەرەكشە جۇمىس

ەكى رەت شام اۋىستىرىپ, 300 مىڭ دوللار تابۋعا بولادى. وسىنداي جوعارى جالاقىعا قاراماستان, بۇل جۇمىسقا قىزىعۋشىلار از. ويتكەنى ءومىرىڭدى قاۋىپكە تىگۋ كەرەك.

ماماننىڭ مىندەتى – بيىكتىگى 600 مەتر­دەن اساتىن مۇناراعا شىعىپ شامدى اۋىس­تىرۋ. ءبىر قاراعاندا وڭاي كورىنگەنىمەن, ولاي ەمەس. مۇنارا بيىكتەگەن سايىن ونىڭ تىرەكتەرى جىڭىشكەرە تۇسەدى. قۇلاپ كەتسەڭ, امان قالۋىڭ ەكىتالاي. مۇناراعا كوتەرىلۋ مەن ودان ءتۇسۋ كەمىندە 6 ساعات ۋاقىتتى الادى. ال ونىڭ ۇشار باسىنداعى جەلدىڭ جىلدامدىعى ساعاتىنا 100 شاقىرىمعا دەيىن جەتەدى. سوندىقتان جۇمىستى ورىندايتىن ادام بيىكتىكتەن قورىقپاۋ كەرەك. سونىمەن قاتار مىقتى فيزيكالىق دايىندىق قاجەت.