قازاق ۇلتتىق قىزدار پەداگوگيكالىق ۋنيۆەرسيتەتىنىڭ كىتاپحاناسىنا بيىل كۇردەلى جوندەۋ جاسالىپ, ۇلاعاتتى ۇستاز سەرالى قانيەۆتىڭ ەسىمى بەرىلدى, دەپ حابارلايدى Egemen.kz.
كىتاپحانانىڭ اشىلۋىندا ءسوز سويلەگەن عىلىم جانە جوعارى ءبىلىم ءمينيسترى ساياسات نۇربەك: «شىن مانىندە بۇگىن – ايتۋلى كۇن. كەز كەلگەن ءبىلىم وشاعىنىڭ جۇرەگى – ول كىتاپحانا. ەڭ جوعارى ستاندارتتا جاسالعان, ەڭ مىقتى ەلەكتروندىق, تسيفرلىق پلاتفورمالارى بار بۇل عىلىمي كىتاپحانا ستۋدەنتتەر مەن وقىتۋشىلار, جالپى كىتاپسۇيەر قاۋىم ءۇشىن بىلىمدەرىن ارتتىرۋعا باعىتتالعان مىقتى ورتالىق بولارىنا سەنىمىم مول», دەپ اتاپ ءوتتى.
سەرالى قاني ۇلى – قازاق ۇلتتىق قىزدار پەداگوگيكالىق ۋنيۆەرسيتەتىنىڭ دامۋىنا ۇلكەن ۇلەس قوسقان ارداقتى ۇستاز, بەلگىلى عالىم, فيزيكا-ماتەماتيكا عىلىمدارىنىڭ كانديداتى, دوتسەنت, قازاق سسر اعارتۋ ءىسىنىڭ ۇزدىگى, كسرو جوعارى مەكتەبىنىڭ ۇزدىگى, ەڭبەك ارداگەرى. 40 جىلعا جۋىق قازاق قىزدار پەداگوگيكالىق ينستيتۋتىندا قىزمەت ەتىپ, مىڭداعان شاكىرت تاربيەلەدى.
كىتاپحانانىڭ سالتاناتتى اشىلۋ راسىمىنە الماتى قالاسىنىڭ اكىمى ەربولات دوساەۆ, قازاق ۇلتتىق قىزدار پەداگوگيكالىق ۋنيۆەرسيتەتىنىڭ باسقارما توراعاسى-رەكتورى گۇلميرا قاناي جانە ۇستازدىڭ جاقىن تۋىستارى دا قاتىستى.
الماتى قالاسىنىڭ اكىمى ەربولات دوساەۆ بۇل كىتاپحانا ءبىلىم مەن مادەنيەتتىڭ ناعىز ورتالىعى ەكەنىن اتاپ وتسە, ۇلاعاتتى ۇستازدىڭ كەلىنى جانات دەربيسالينا ۋنيۆەرسيتەت ۇجىمىنا العىسىن ءبىلدىرىپ, «اكەمىزگە وسىنداي قۇرمەت كورسەتىلىپ جاتقانىنا وتە قۋانىشتىمىز. ول كىسىنىڭ ەسىمى ۋنيۆەرسيتەت قابىرعاسىندا, جۇرەگىمىزدە ماڭگىلىككە ساقتالادى», دەدى.
ءىس-شارا اياسىندا قر عىلىم جانە جوعارى ءبىلىم ءمينيسترى ساياسات نۇربەك سەرالى قانيەۆتىڭ ۇلى بەرىك قانيەۆكە كىتاپحانانىڭ اشىلۋىنا زور ۇلەس قوسقانى ءۇشىن العىس حات تابىستادى. سونىمەن قاتار قازاق ۇلتتىق قىزدار پەداگوگيكالىق ۋنيۆەرسيتەتىنىڭ باسقارما توراعاسى-رەكتورى گۇلميرا قاناي دا ريزاشىلىعىن ءبىلدىرىپ, زاماناۋي جابدىقتالعان كىتاپحانا ستۋدەنتتەردىڭ ساپالى ءبىلىم الۋىنا زور ىقپال ەتەتىندىگىن اتاپ ءوتتى.
كىتاپحانا ستۋدەنتتەر, وقىتۋشىلار جانە زەرتتەۋشىلەر ءۇشىن زاماناۋي ءبىلىم بەرەتىن مادەني ورتالىققا اينالادى. مۇندا ولار عىلىمي قورلارمەن جۇمىس ىستەپ, وقۋ جانە زەرتتەۋ جۇمىستارىن جۇرگىزۋ ءۇشىن ەڭ سوڭعى تەحنولوگيالاردى پايدالانا الادى. جاڭا كىتاپحانا كەڭىستىگى ىڭعايلىلىق پەن جايلىلىقتى ەسكەرە وتىرىپ جوبالانعان. وندا توپتىق جانە جەكە جۇمىستارعا ارنالعان الاڭدار بار. سونداي-اق وزىق جابدىقتار مەن ەلەكتروندىق رەسۋرستار قولجەتىمدى.
ءىس-شارادا قوناقتار جاڭارتىلعان كىتاپحانا عيماراتىنا ەكسكۋرسيا جاساپ, ءبىلىم بەرۋ ساپاسىن ارتتىرۋعا باعىتتالعان جاڭالىقتارمەن تانىستى.