تۇرعىن ءۇي كەزەگىندە تۇرعان ازاماتتار ءوز مارتەبەسىن ەندى ونلاين وڭاي تەكسەرە الادى. بۇل تۋرالى «وتباسى بانك» ارنايى نۇسقاۋلىق جاريالادى, دەپ حابارلايدى Egemen.kz.
تۇرعىن ءۇي كەزەگىن تەكسەرۋ ءۇشىن ازاماتتار «وتباسى بانك» رەسمي سايتىنا كىرۋى قاجەت. قولايلى بولۋ ءۇشىن كومپيۋتەر نەمەسە نوۋتبۋك قولدانعان ءجون, سەبەبى ماماندار ءموبيلدى قۇرىلعىدا كەيبىر مالىمەتتەر تولىق اشىلماۋى مۇمكىن ەكەندىگىن ەسكەرتەدى.
پايدالانۋشى «قولجەتىمدى باسپانا» بولىمىنەن «تۇرعىن ۇيگە مۇقتاج ازاماتتار ءتىزىمىن» تاڭداپ, Excel فورماتىنداعى فايلدى جۇكتەي الادى.
سونىمەن قاتار, ازاماتتار ءوز ساناتىن (كوپبالالى وتباسى, مەملەكەتتىك قىزمەتكەر, جەتىم بالالار جانە ت.ب.) تاڭداۋ ارقىلى ناقتى كەزەگىن كورە الادى. سونداي-اق جۇيەدە جسن ەنگىزۋ ارقىلى تەك مارتەبەنى عانا بىلۋگە بولادى.
تۇرعىن ءۇي كەزەگىندەگى وزگەرىستەر: 16 مىڭنان استام ادام تىزىمنەن شىعارىلدى
تۇرعىن ءۇي كەزەگىن راستاۋ ءۇشىن ازاماتتار «Orken Otbasy Bank» پلاتفورماسى ارقىلى ينۆەنتاريزاتسيادان وتۋگە ءتيىس. بۇل ءراسىم ءار وتباسى مۇشەسىنىڭ جەكە راستاۋىن تالاپ ەتەدى جانە كەزەكتە تۇرۋ قۇقىعىن ساقتاۋعا مۇمكىندىك بەرەدى.
مامانداردىڭ ايتۋىنشا, تۇرعىن ءۇي كەزەگىنىڭ مارتەبەسىن مىندەتتى تۇردە تەكسەرىپ وتىرۋ قاجەت. ەگەر ستاتۋس «توقتاتىلعان» دەپ كورسەتىلسە, بۇل كەزەكتىڭ ۋاقىتشا توقتاتىلعانىن بىلدىرەدى. ال «اكتۋالدى» مارتەبەسى كەزەكتىڭ بەلسەندى ەكەنىن كورسەتەدى.
ەلىمىزدە باسپانا كەزەگىنە 18 جاستان اسقان قازاقستان ازاماتتارى نەمەسە قانداستار ءوتىنىش بەرە الادى. نەگىزگى شارت – سوڭعى 5 جىلدا مەنشىگىندە تۇرعىن ءۇيدىڭ بولماۋى جانە تۇراقتى تىركەۋدىڭ بولۋى. استانا, الماتى جانە شىمكەنت قالالارىندا تىركەۋ مەرزىمى كەمىندە 3 جىل بولۋى قاجەت.
ايتا كەتەيىك, 2026 جىلى ەل تۇرعىندارى زەينەتاقى جيناقتارىن تۇرعىن ءۇي ساتىپ الۋعا كوپتەپ پايدالانا باستاعان. ءۇش اي ىشىندە وسى ماقساتتا بجزق-دان شامامەن 135 ملرد تەڭگە شەشىپ الىنعان.