ەندى ەلىمىزدىڭ جانە شەتەلدىك اسكەري جوعارى وقۋ ورىندارىن ۇزدىك بىتىرگەن كۋرسانتتارعا «اعا لەيتەنانت» اسكەري اتاعى تابىستالادى, دەپ حابارلايدى Egemen.kz.
پرەزيدەنت قول قويعان جاڭا زاڭ اياسىندا اسكەري جوعارى وقۋ ورىندارىن ۇزدىك تامامداعان تۇلەكتەرگە اسكەري اتاق بەرۋ ءتارتىبى وزگەردى, زاڭعا سايكەس, ۇزدىك تۇلەكتەرگە بولاشاق قىزمەت ورنىن ءوز قالاۋىمەن تاڭداۋ مۇمكىندىگى دە بەرىلەدى.
«وسى وزگەرىستەردى ىسكە اسىرۋ ءۇشىن «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭعا تولىقتىرۋلار ەنگىزىلىپ, اسكەري قىزمەت وتكەرۋ قاعيدالارىن جاڭارتۋ جونىندەگى پرەزيدەنت جارلىعىنىڭ جوباسى ازىرلەندى» دەلىنگەن قورعانىس مينيسترلىگىنىڭ حابارلاماسىندا.
جاڭا نورمالار اسكەري قىزمەتشىلەردىڭ الەۋمەتتىك كەپىلدىكتەرىن كۇشەيتىپ, كۋرسانتتاردىڭ وقۋ مەن قىزمەتتەگى جەتىستىكتەرگە ۇمتىلىسىن ارتتىرۋعا باعىتتالعان.
ەسكە سالا كەتەيىك, اتالعان وزگەرىستەردى ەنگىزۋ تۋرالى العاش پرەزيدەنت قاسىم-جومارت توقاەۆ 6-مامىردا وتكەن مەملەكەتتىك ماراپات جانە اسكەري شەن تاپسىرۋ راسىمىندە ايتقان بولاتىن. جيىندا مەملەكەت باسشىسى قازاقستان – بىرىككەن ۇلتتار ۇيىمىنىڭ بىتىمگەرلىك ميسسياسىن دەربەس ورىنداۋ مارتەبەسىنە يە بولعان تاۋەلسىز مەملەكەتتەر دوستاستىعى ىشىندەگى جالعىز مەملەكەت ەكەنىنە توقتالدى.